ಲಖೀಂಪುರ್ ಖೇರಿ ಹಿಂಸಾಚಾರ ಖಂಡಿಸಿ ಅ.18 ರಂದು ‘ರೈಲ್ ರೋಕೋ’ ಚಳುವಳಿ.

ನವದೆಹಲಿ: ಉತ್ತರಪ್ರದೇಶದ ಲಖೀಂಪುರ್ ಖೇರಿ ಹಿಂಸಾಚಾರವನ್ನು ಪ್ರತಿಭಟಿಸಿ ಅ.18 ರಂದು ‘ರೈಲ್ ರೋಕೋ’ ಚಳುವಳಿ ನಡೆಸಲಾಗುವುದು ಎಂದು ಸಂಯುಕ್ತ ಕಿಸಾನ್ ಮೋರ್ಚಾದ ನಾಯಕರು ಹೇಳಿದ್ದಾರೆ.

ಸುದ್ದಿಗೋಷ್ಠಿ ನಡೆಸಿದ ಕಿಸಾನ್​ ಮೋರ್ಚಾ ನಾಯಕ ಯೋಗೇಂದ್ರ ಯಾದವ್​, ಅ.12 ರಂದು ಯುಪಿಯ ಎಲ್ಲಾ ಜಿಲ್ಲೆಗಳಲ್ಲಿ ‘ಕಲಶ್​ ಯಾತ್ರಾ’ ನಡೆಸಲಾಗುವುದು; ಅ.18 ರಂದು ‘ರೈಲ್ ರೋಕೋ’ ಚಳುವಳಿ ನಡೆಸಲಾಗುವುದು ಮತ್ತು ಅ.26 ರಂದು ಲಖನೌನಲ್ಲಿ ‘ಮಹಾಪಂಚಾಯತ್​’ ನಡೆಸಲಾಗುವುದು ಎಂದರು. ಜೊತೆಗೆ, ಅ.15 ಕ್ಕೆ ದಸರಾ ಸಂದರ್ಭಕ್ಕೆ ರೈತರು, ಪ್ರಧಾನ ಮಂತ್ರಿ ನರೇಂದ್ರ ಮೋದಿ ಮತ್ತು ಗೃಹ ಸಚಿವ ಅಮಿತ್​ ಷಾ ಅವರ ಪ್ರತಿಕೃತಿ ದಹನ ಮಾಡಲಿದ್ದಾರೆ ಎಂದರು.

ಪ್ರತಿಭಟನಾಕಾರ ರೈತರೂ ಮೂವರು ಬಿಜೆಪಿ ಕಾರ್ಯಕರ್ತರನ್ನು ಸಾಯಿಸಿದ್ದಾರಲ್ಲಾ ಎಂದು ಕೇಳಿದ ಸುದ್ದಿಗಾರರ ಪ್ರಶ್ನೆಗೆ ಉತ್ತರಿಸಿದ ಭಾರತ್​ ಕಿಸಾನ್​ ಯೂನಿಯನ್​ ನಾಯಕ ರಾಕೇಶ್ ತಿಕಾಯತ್​, “ಅದು ಆ್ಯಕ್ಷನ್​ಗೆ ರಿಯಾಕ್ಷನ್​ ಆಗಿತ್ತು. ಅದಕ್ಕಾಗಿ ಯಾವುದೇ ಯೋಜನೆ ನಡೆದಿರಲಿಲ್ಲ. ಆದ್ದರಿಂದ ಅದು ಕೊಲೆ ಆಗುವುದಿಲ್ಲ” ಎಂದಿದ್ದಾರೆ ಎಂದು ಎಎನ್​​ಐ ಸುದ್ದಿ ಸಂಸ್ಥೆ ವರದಿ ಮಾಡಿದೆ.