ಬ್ಯಾಂಕ್ಗಳ ಸೇವ್ ಲಾಕರ್ಗೆ ಹೆಚ್ಚಿನ ಸುರಕ್ಷತೆ ನೀಡಲು ಮುಂದಾಗಿರುವ ಭಾರತೀಯ ರಿಸರ್ವ್ ಬ್ಯಾಂಕ್ (ಆರ್ಬಿಐ), ಈ ಸಂಬಂಧದ ನಿಯಮವನ್ನು ಪರಿಷ್ಕರಿಸಿದೆ.
ಮುಂಬೈ: ಬ್ಯಾಂಕ್ಗಳ ಸೇವ್ ಲಾಕರ್ ನಿಯಮವನ್ನು ಪರಿಷ್ಕರಿಸಿರುವ ಭಾರತೀಯ ರಿಸರ್ವ್ ಬ್ಯಂಕ್ (ಆರ್ಬಿಐ), ನೂತನ ಮಾರ್ಗಸೂಚಿಯನ್ನು ಪ್ರಕಟಿಸಿದೆ. ಸೇವ್ ಲಾಕರ್ಗಳ ಬಗ್ಗೆ ಗ್ರಾಹಕರಿಂದ ವ್ಯಕ್ತವಾದ ದೂರು, ಬ್ಯಾಂಕಿಂಗ್ ವ್ಯವಸ್ಥೆ ಅತ್ಯಾಧುನಿಕಗೊಂಡಿರುವುದು ಹಾಗೂ ತಂತ್ರಜ್ಞಾನದಲ್ಲಿ ಆಗಿರುವ ಬದಲಾವಣೆ ಮತ್ತು ಸೇವ್ ಲಾಕರ್ ವಿಷಯದಲ್ಲಿ ಬ್ಯಾಂಕ್ಗಳು ಹಾಗೂ ಭಾರತೀಯ ಬ್ಯಾಂಕ್ಗಳ ಅಸೋಸಿಯೇಷನ್ (ಐಬಿಎ)ಗಳಿಂದ ಬಂದಂತಹ ಪ್ರತಿಕ್ರಿಯೆಗಳನ್ನು ಪರಿಶೀಲಿಸಿ ಆಗಸ್ಟ್ 18ರಂದೇ ಹೊಸ ನಿಯಮವನ್ನು ಆರ್ಬಿಐ ರೂಪಿಸಿದೆ.
ಲಾಕರ್ ಶುಲ್ಕ ಪಾವತಿ ಸಕಾಲದಲ್ಲಿ ಆಗದಿರುವ ಹಿನ್ನೆಲೆಯಲಿ ಅವುಗಳಿಗೆ ವಿಧಿಸುವಂತಹ ಶುಲ್ಕವನ್ನು ಲಾಕರ್ ಹಂಚಿಕೆ ಸಂದರ್ಭದಲ್ಲೇ ಗ್ರಾಹಕರಿಂದ ಠೇವಣಿ ರೂಪದಲ್ಲಿ ಪಡೆದುಕೊಳ್ಳುವುದು. ಇದು ಮೂರು ವರ್ಷದ ಲಾಕರ್ ಬಾಡಿಗೆ ಮತ್ತು ನಿರ್ವಹಣಾ ಶುಲ್ಕವಾಗಿದ್ದು, ಇದನ್ನು ಈಗಾಗಲೇ ಲಾಕರ್ ಹೊಂದಿರುವ ಮತ್ತು ಸಕ್ರಿಯವಾಗಿ ಖಾತೆ ನಿರ್ವಹಿಸುತ್ತಿರುವ ಗ್ರಾಹಕರಿಗೆ ಅನ್ವಯಿಸುವಂತಿಲ್ಲ.
ಬ್ಯಾಂಕ್ನಿಂದ ಲಾಕರ್ಗಳಿಗೆ ಆಗುವ ಹಾನಿ ಅಥವಾ ನಷ್ಟಕ್ಕೆ ಅವುಗಳೇ ಸಂಪೂರ್ಣ ಹೊಣೆ ಆಗಿದ್ದು. ಇದಕ್ಕೆ ಬ್ಯಾಂಕ್ ಆಡಳಿತ ಮಂಡಳಿ ಅನುಮೋದಿಸಿದ ನೀತಿಗೆ ಬದ್ಧವಾಗಿರಬೇಕು. ಲಾಕರ್ ವ್ಯವಸ್ಥೆಗಳು ಸಮರ್ಪಕವಾಗಿ ಕಾರ್ಯನಿರ್ವಹಿಸುವುದನ್ನು ಬ್ಯಾಂಕ್ಗಳು ಗ್ರಾಹಕರಿಗೆ ಖಾತರಿ ಪಡಿಸಬೇಕು. ಸೇವಾ ನ್ಯೂನತೆ ಆಗಬಾರದು. ಲಾಕರ್ ಇರುವ ಸ್ಟ್ರಾಂಗ್ ರೂಂಗಳಿಗೆ ಅನಧಿಕೃತ ಪ್ರವೇಶ ಇಲ್ಲದಂತೆ ಸುರಕ್ಷತೆ ನೀಡಬೇಕು. ದರೋಡೆ ಇಲ್ಲವೆ ಕಳ್ಳತನ ಆಗದಂತೆ ಖಾತರಿ ನೀಡುವುದೂ ಬ್ಯಾಂಕ್ಗಳ ಹೊಣೆಗಾರಿಕೆ.
ನೈಸರ್ಗಿಕ ವಿಕೋಪ ಘಟಿಸಿದ ಸಂದರ್ಭದಲ್ಲಿ ಲಾಕರ್ಗಳಿಗೆ ಗ್ರಾಹಕರಿಂದ ಮುಂಗಡವಾಗಿ ಪಡೆದಂತಹ ಠೇವಣಿಯನ್ನು ಹಿಂದುರುಗಿಸಬೇಕು. ಭೂಕಂಪನ, ಪ್ರವಾಹ ಇತ್ಯಾದಿ ನೈಸರ್ಗಿಕ ವಿಕೋಪದ ವೇಳೆ ಲಾಕರ್ಗಳಿಗೆ ಆಗುವ ಹಾನಿಗೆ ಬ್ಯಾಂಕ್ಗಳು ಜವಬ್ದಾರಿಯಲ್ಲ. ಆದರೆ, ಇಂಥ ವಿಪತ್ತುಗಳಿಂದ ಪರಿಪೂರ್ಣ ರಕ್ಷಣೆ ಹೊಂದಲು ಸೂಕ್ತ ಕ್ರಮಗಳನ್ನು ಬ್ಯಾಂಕ್ಗಳು ಅಳವಡಿಸಿಕೊಂಡಿರುವುದು ಅಗತ್ಯ.
ಬ್ಯಾಂಕ್ ಸಿಬ್ಬಂದಿಯ ಅಚಾತುರ್ಯ ಅಥವಾ ಗುಣಮಟ್ಟದ ದೋಷದ ಕಾರಣ ಸಂಭವಿಸುವ ಅಗ್ನಿ ಆಕಸ್ಮಿಕ ಅಥವಾ ಕಟ್ಟಡ ಕುಸಿತದಿಂದ ಹಾನಿಯುಂಟಾದರೆ ಲಾಕರ್ಗಳಿಗೆ ವಿಧಿಸುವ ವಾರ್ಷಿಕ ಶುಲ್ಕದ ನೂರು ಪಟ್ಟು ಪರಿಹಾರವನ್ನು ಬ್ಯಾಂಕ್ಗಳು ಗ್ರಾಹಕರಿಗೆ ಭರಿಸಿಕೊಡಬೇಕು. ಅಪಾಯಕಾರಿ ವಸ್ತುಗಳನ್ನು ಲಾಕರ್ನಲ್ಲಿ ಇರಿಸುವಂತಿಲ್ಲವೆಂಬ ಕರಾರು ಇರುವಂತಹ ಒಪ್ಪಂದವನ್ನು ಗ್ರಾಹಕರೊಂದಿಗೆ ಬ್ಯಾಂಕ್ಗಳು ಮಾಡಿಕೊಂಡಿರಬೇಕು.
Discussion about this post