ತನ್ನ ಸಾಮಾಜಿಕ ಜಾಲತಾಣಗಳಲ್ಲಿ ನಕಲಿ ಸುದ್ದಿ ಎಷ್ಟು ವೇಗವಾಗಿ ಹರಡುತ್ತದೆ ಎಂದು ತಿಳಿಯಲು ಫೇಸ್ಬುಕ್ ಭಾರತದಲ್ಲಿ ಒಂದು ಪರೀಕ್ಷೆ ನಡೆಸಿತು. 21 ದಿನದಲ್ಲಿ ನಕಲಿ ಸುದ್ದಿಗಳು ಭರಪೂರವಾಗಿ ಹರಿದಾಡಿದವು.
ನವದೆಹಲಿ: ನಕಲಿ ಸುದ್ದಿಗಳು ಎಷ್ಟು ವೇಗವಾಗಿ ಹರಡುತ್ತವೆ, ಅದರ ನಮೂನೆಗಳು ಹೇಗಿರುತ್ತವೆ ಎಂಬುದನ್ನು ತಿಳಿಯಲು ಸಾಮಾಜಿಕ ಜಾಲತಾಣದ ದಿಗ್ಗಜ ಫೇಸ್ಬುಕ್ .ಇಂಕ್ 2019ರ ಫೆಬ್ರವರಿಯಲ್ಲಿ ಒಂದು ಪ್ರಯೋಗ ನಡೆಸಿತು. ತನ್ನ ಈ ಲೆಕ್ಕಚಾರ ಭಾರತದ ಬಳಕೆದಾರರ ಮೇಲೆ ಹೇಗೆ ಪರಿಣಾಮ ಬೀರುತ್ತದೆ ಎಂದು ಪರೀಕ್ಷೆಗೆ ಒಡ್ಡಿತು.
ವೇಗವಾಗಿ ಪ್ರಗತಿಯಾಗುತ್ತಿರುವ ತನ್ನ ಸಾಗರೋತ್ತರ ಮಾರುಕಟ್ಟೆಯಲ್ಲಿ ಬಳಕೆದಾರರು ಏನನ್ನು ನೋಡುತ್ತಾರೆ ಎಂಬುದನ್ನು ತಿಳಿಯುವುದು ಅದರ ಉದ್ದೇಶವಾಗಿತ್ತು. ಇದಕ್ಕಾಗಿ ಒಂದು ಪರೀಕ್ಷಾರ್ಥ ಖಾತೆಯನ್ನು ತೆರೆದು, ಕಂಟೆಂಟ್ಗಳನ್ನು ಶಿಫಾರಸು ಮಾಡಿ ಇದಕ್ಕೆ ಪ್ರತಿಕ್ರಿಯೆ ಹೇಗಿರುತ್ತದೆ ಎಂಬುದನ್ನು ತಿಳಿಯಲು ಫೇಸ್ಬುಕ್ ಮುಂದಾಯಿತು. ಆದರೆ, ಇದರ ಫಲಿತಾಂಶ ಫೇಸ್ಬುಕ್ ಕಂಪನಿಯ ಸಿಬ್ಬಂದಿಯನ್ನು ಆಶ್ಚರ್ಯ ಚಕಿತರನ್ನಾಗಿ ಮಾಡಿತ್ತು.
ಮೂರು ವಾರದ ಅವಧಿಯಲ್ಲಿ ಬಳಕೆದಾರರು ನಕಲಿ ಸುದ್ದಿಯ ಬಿರುಗಾಳಿಯನ್ನೆ ಎಬ್ಬಿಸಿದರು. ಕಿಚ್ಚು ಹಚ್ಚು ಚಿತ್ರಗಳು ಮತ್ತು ಶಿರಚ್ಛೇದನ ಗ್ರಾಫಿಕ್ ಫೋಟೋಗಳು ಭರಪೂರವಾಗಿ ಹರಿದಾಡಿದವು. ಭಾರತೀಯ ವಾಯುಪಡೆ ಪಾಕ್ ಮೇಲೆ ಏರ್ಸ್ಟ್ರೈಕ್ ಮಾಡಿದಂತೆ, ಹಿಂಸೆಯ ಅತಿರೇಕದ ಸನ್ನಿವೇಶಗಳು, ಪಾಕಿಸ್ತಾನದಲ್ಲಿ ಬಾಂಬ್ ದಾಳಿಗೆ 300 ಉಗ್ರರು ಹತರಾಗಿದ್ದಾರೆಂಬ ನಕಲಿ ಸುದ್ದಿಯನ್ನು ‘ನಿಮ್ಮನ್ನು ನಗಿಸುವ ವಿಷಯಗಳು’ ಶೀಷರ್ಷಿಕೆಯಡಿ ಪೋಸ್ಟ್ ಮಾಡಿತ್ತು.
ಇವೆಲ್ಲವನ್ನು ನೋಡಿ ಹೌಹಾರಿದ ಫೇಸ್ಬುಕ್ ಸಿಬ್ಬಂದಿಯೊಬ್ಬರು ‘ನನ್ನ ಇಡೀ ಜೀವನದಲ್ಲಿ ನೋಡಲು ಅಸಾಧ್ಯವಾದಷ್ಟು ಹೆಣಗಳ ಚಿತ್ರವನ್ನು ನಾನು ಈ ಮೂರುವಾರದಲ್ಲಿ ನೋಡಿದೆ’ ಎಂದು ದಿಗ್ಭ್ರಾಂತಿ ವ್ಯಕ್ತಪಡಿಸಿದರು.
ಇದು ಸಮಗ್ರತೆಯ ದುಃಸ್ವಪ್ನ ಎಂದು ಫೇಸ್ಬುಕ್ನ ಈ ಪರೀಕ್ಷೆಯ ಮೇಲೆ 46 ಪುಟ ಸಂಶೋಧನಾ ಟಿಪ್ಪಣಿ ಬರೆದ ವಿಸಲ್ಬ್ಲೋವರ್ (ಅಪಸವ್ಯಗಳನ್ನು ಬಯಲು ಮಾಡುವವ) ಫ್ರಾನ್ಸಿಸ್ ಹೌಗೆನ್ ಕಟುವಾದ ಅಭಿಪ್ರಾಯ ಪಟ್ಟಿದ್ದಾರೆ.
ಕಂಟೆಂಟ್ ಅನ್ನು ಶಿಫಾರಸು ಮಾಡುವಲ್ಲಿ ಫೇಸ್ಬುಕ್ನ ಪಾತ್ರ ಏನು ಎಂಬುದನ್ನು ಅರಿಯಲು ಈ ಪರೀಕ್ಷೆಯನ್ನು ನಡೆಸಲಾಯಿತು.
ಫೇಸ್ಬುಕ್ ಶಿಫಾರಸು ಮಾಡಿದ ಪೇಜ್ಗಳು ಅಥವಾ ಗುಂಪುಗಳನ್ನು ಅದರ ಅಸಲಿತನವನ್ನು ಒರೆಗೆ ಹಚ್ಚದೆ ಬಳಕೆದಾರರು ಫೇಸ್ಬುಕ್ ಶಿಫಾರಸು ಮಾಡಿದ ಪೇಜ್ಗಳು ಅಥವಾ ಗುಂಪುಗಳ ಅಂಧಾನುಕರಣೆ ಮಾಡಿದರು. ಈ ಪರೀಕ್ಷೆಗಾಗಿ ಟ್ರಯಲ್ ಖಾತೆಗೆ ಹೈದರಾಬಾದ್ ಮೂಲದ ಜೈಪುರದಲ್ಲಿ ವಾಸಿಸುತ್ತಿರುವ 21 ವರ್ಷದ ಯುವತಿಯ ಕಲ್ಪಿತ ಪ್ರೊಫೈಲ್ ಬಳಕೆ ಮಾಡಲಾಗಿತ್ತು
Discussion about this post