ಬೆಂಗಳೂರು: ಅಚ್ಚರಿಯ ಬೆಳವಣಿಗೆಯೊಂದರಲ್ಲಿ ಜಪಾನ್ ತನ್ನ ದೂರಪ್ರದೇಶಗಳಲ್ಲಿ ವಾಸಿಸುವ ಜನರ ಉಪಯೋಗಕ್ಕಾಗಿ ಇಬ್ಬಗೆಯ ಮೋಟಾರು ವಾಹನವೊಂದನ್ನು ವಿನ್ಯಾಸಗೊಳಿಸಿರುವುದಲ್ಲದೇ ಅದರ ಕಾರ್ಯಾಚರಣೆಯನ್ನೂ ಆರಂಭಿಸಿದೆ. ನೋಡಲು ಮಿನಿಬಸ್ನಂತೆ ಕಾಣುವ ಈ ವಾಹನ 21 ಜನರು ಪ್ರಯಾಣಿಸುವ ಸಾಮರ್ಥ್ಯ ಹೊಂದಿದ್ದು ಇದು ಸಾಂಪ್ರದಾಯಿಕ ರಸ್ತೆಗಳಲ್ಲಿ ಬಸ್ನಂತೆ ಹಾಗೂ ರೈಲು ಹಳಿಗಳ ಮೇಲೆ ರೈಲಿನಂತೆಯೂ ಚಲಿಸಬಲ್ಲದು.
ಇದರ ವಿಶೇಷತೆಯೇನೆಂದರೆ ಇದು ರಬ್ಬರ್ ಟೈರ್ಗಳ ಸಹಾಯದಿಂದ ರಸ್ತೆಯ ಮೇಲೂ ಹಾಗೂ ಉಕ್ಕಿನ ಚಕ್ರಗಳ ಸಹಾಯದಿಂದ ರೈಲು ಹಳಿಗಳ ಮೇಲೂ ಓಡಬಲ್ಲದು. ರಸ್ತೆಯಿಂದ ರೈಲು ಹಳಿಗೆ ಹಾಗೂ ಹಳಿಯಿಂದ ರಸ್ತೆಗೆ ಅವಶ್ಯಕತೆಗೆ ತಕ್ಕಂತೆ ತನ್ನಿಂತಾನೇ ಬದಲಾಗುವ ವಿನ್ಯಾಸವನ್ನು ಇದು ಹೊಂದಿದ್ದು ದಕ್ಷಿಣ ಜಪಾನ್ನ ತೀರಪ್ರದೇಶದ ದೂರ-ದೂರದ ಊರುಗಳ ಜನರ ಓಡಾಟಕ್ಕೆ ಇದು ಅತ್ಯಂತ ಸಹಕಾರಿಯಾಗಲಿದೆ.
ಸುದ್ದಿಮೂಲಗಳ ಪ್ರಕಾರ ಇದು ಜಪಾನ್ನ ಕೈಯೋ ನಗರದಲ್ಲಿ ಸಾರ್ವಜನಿಕ ಸೇವೆಗೆ ನಿಯೋಜಿತವಾಗಿದೆ. ರಸ್ತೆಯ ಮೇಲೆ ಇದು ಸಾಮಾನ್ಯ ಬಸ್ನಂತೆ ಕಂಡರೂ ರಸ್ತೆಯಿಂದ ಹಳಿಗೆ ಬದಲಾಗಬೇಕಾದಾಗ ಇದರ ಉಕ್ಕಿನ ಚಕ್ರಗಳು ಮುಂಭಾಗದ ರಬ್ಬರ್ ಚಕ್ರಗಳನ್ನು ಮೇಲೆತ್ತಿ ತಾವು ಹಳಿಗಳ ಮೇಲೆ ಹೋಗುವುದಲ್ಲದೇ ಇದರ ಹಿಂಭಾಗದ ರಬ್ಬರ್ ಚಕ್ರಗಳು ವಾಹನವನ್ನು ಹಳಿಗಳ ಮೇಲಕ್ಕೆ ತಳ್ಳಿ ರೈಲಿನಂತೆ ಚಲಿಸಲು ಅನುವು ಮಾಡಿಕೊಡುತ್ತದೆ.
ರಸ್ತೆಯ ಮೇಲೆ ಈ ವಾಹನವು ಪ್ರತಿ ಗಂಟೆಗೆ ಗರಿಷ್ಠ 60 ಕಿ.ಮೀ. ವೇಗದಲ್ಲೂ ಹಾಗೂ ಹಳಿಗಳ ಮೇಲೆ ಪ್ರತಿ ಗಂಟೆಗೆ ನೂರಕ್ಕೂ ಹೆಚ್ಚು ಕಿ.ಮೀ. ವೇಗದಲ್ಲಿ ಚಲಿಸಬಲ್ಲ ಸಾಮರ್ಥ್ಯವನ್ನು ಹೊಂದಿದೆ. ಡೀಸೆಲ್ ಮೊಟಾರ್ನಿಂದ ಚಲಿಸುವ ಈ ವಾಹನವು ಅನೇಕ ಬಣ್ಣಗಳಲ್ಲಿ ಲಭ್ಯವಿದೆ.
ಜಪಾನ್ನ ಅಸಾ ರೈಲ್ವೇ ಸಂಸ್ಥೆಯು ಈ ವಾಹನವನ್ನು ನಿರ್ವಹಿಸುತ್ತಿದ್ದು ದೂರದ ಪ್ರದೇಶದ ಜನರ ಓಡಾಟಕ್ಕೆ ಇದು ಸಹಾಕಾರಿಯಾಗಿದೆ, ಜನರನ್ನು ಸಮೀಪದ ರೈಲು ನಿಲ್ದಾಣಗಳಿಗೆ ತಲುಪಿಸಲೂ ಅನುಕೂಲಕರವಾಗಿದೆ ಎಂದು ಸಂಸ್ಥೆಯ ಮುಖ್ಯ ನಿರ್ವಾಹಕ ಅಧಿಕಾರಿ ಶಿಗೆಕಿ ಮಿಯುರಾ ತಿಳಿಸಿದ್ದಾರೆ. ಗ್ರಾಮೀಣ ಜನರ, ಅದರಲ್ಲೂ ವಯಸ್ಸಾದವರಿಗೆ ಇದು ಬಹಳ ಉಪಯುಕ್ತವಾಗಿರುವುದರ ಜೊತೆಗೆ ಪ್ರವಾಸಿಗರಿಗೂ ಉತ್ತಮ ಅನುಭವ ನೀಡಲಿದ್ದು ಒಳ್ಳೆಯ ಆದಾಯವನ್ನೂ ತರಲಿದೆ ಎಂದು ಅವರು ತಿಳಿಸಿದರು.
Japan starts the operation of first ever dual-mode motor vehicle
ಇದನ್ನೂ ಓದಿ: Message to mobile: ವಾಹನ ಸವಾರರು ಟ್ರಾಫಿಕ್ ನಿಯಮ ಉಲ್ಲಂಘಿಸಿದ ಕೆಲವೇ ನಿಮಿಷಗಳಲ್ಲಿ ಮೊಬೈನ್ ಗೆ ಸಂದೇಶ
ಇದನ್ನೂ ಓದಿ: High Court permit: ವಾಹನಗಳ ನೋಂದಣಿ: ಸ್ಮಾರ್ಟ್ ಕಾರ್ಡ್ ವಿತರಣೆ ಮುಂದುವರಿಸಲು ಹೈಕೋರ್ಟ್ ಅನುಮತಿ
Discussion about this post