New Year 2022 Greetings: ವರ್ಷಾರಂಭದ ಸುಸಂದರ್ಭಕ್ಕೆ ಪ್ರೀತಿಪಾತ್ರರಿಗೆ-ಮಿತ್ರರಿಗೆ ಶುಭ ಕೋರುವ ಸಂದೇಶಗಳು ಹೀಗಿದ್ದರೆ ಚೆಂದವಲ್ಲವೇ?

ಇನ್ನೇನು ಕೆಲವೇ ಗಂಟೆಗಳಲ್ಲಿ 2021ನೇ ವರ್ಷವು ತಾನು ನೇಪಥ್ಯಕ್ಕೆ ಸರಿದು ಹೊಸವರ್ಷ 2022ಕ್ಕೆ ದಾರಿ ಮಾಡಿಕೊಡಲು ತುದಿಗಾಲಲ್ಲಿ ನಿಂತಿದೆ. ನಿಮ್ಮ ಬಂಧು-ಮಿತ್ರರಿಗೆ, ವಿಶೇಷ ಪ್ರೀತಿಪಾತ್ರರಿಗೆ ಹೊಸ ವರ್ಷದ ಶುಭಸಂದೇಶಗಳನ್ನು ಕೋರಲು, ಹೊಸ ವರ್ಷದ ಕಾರ್ಡ್‌ಗಳನ್ನು ಕಳುಹಿಸಲು ನೀವೂ ಕಾಯುತ್ತಿದ್ದೀರಲ್ಲವೇ, ಹೆಚ್ಚಿನವರು ಈಗಾಗಲೇ ಸಂದೇಶಗಳನ್ನು ಕಳುಹಿಸಲು ಪ್ರಾರಂಭಿಸಿಯೇಬಿಟ್ಟಿರುತ್ತಾರೆ.

ಎಲ್ಲಾ ಹಳೆಯ ವಾದ-ವಿವಾದಗಳನ್ನು, ಮನ-ಮತಭೇದಗಳನ್ನು, ಆತಂಕ-ಅನುಮಾನಗಳನ್ನು ಹಿಂದೆ ಸರಿಸಿ ಹೊಸತನದಿಂದ ಸಂಬಂಧಗಳಿಗೆ ಪುನಶ್ಚೇತನವನ್ನು ನೀಡುವ ಒಂದು ಸದವಕಾಶ ಈ ಹೊಸ ವರ್ಷಾರಂಭ. ಕಳೆದ ಕೆಲ ವರ್ಷಗಳಿಂದ ಇಡೀ ವಿಶ್ವವೇ ಕೊರೋನಾ ಮಹಾಮಾರಿಯಿಂದ ಹಾಗೂ ಇನ್ನೂ ಕೆಲ ಸಮಸ್ಯೆಗಳ ಬೇಗುದಿಯಲ್ಲಿ ಬೆಂದಿದ್ದು ನೊಂದ ಮನಗಳಲ್ಲಿ ಹೊಸ ಭರವಸೆಯನ್ನು ಮೂಡಿಸಬೇಕಾದ ಅವಶ್ಯಕತೆ ಹಿಂದೆಂದಿಗಿಂತ ಇಂದು ಹೆಚ್ಚಾಗಿದೆ. ನಿಮ್ಮ ಅನುಕೂಲಕ್ಕಾಗಿ ಕೆಲ ಸಂದೇಶಗಳನ್ನು ನೀಡಲಾಗಿದೆ:

2022ರ ಹೊಸ ವರ್ಷವು ನಿಮ್ಮ ಜೀವನದ ಅತ್ಯಂತ ಶುಭಪ್ರದ ವರ್ಷವಾಗಲಿ. ನಿಮಗೆ ಈ ಹೊಸವರ್ಷದಲ್ಲಿ ಅಪರಿಮಿತ ಆನಂದ ಹಾಗೂ ಯಶಸ್ಸುಗಳು ದೊರೆತು ನಿಮ್ಮ ಹೃದಯವು ಬಯಸುವ ಎಲ್ಲಾ ಬಯಕೆಗಳೂ ಕೈಗೂಡಲಿ. ನಿಮಗೆ ಹಾಗೂ ನಿಮ್ಮೆಲ್ಲಾ ಪ್ರೀತಿಪಾತ್ರರಿಗೆ ಹೊಸವರ್ಷದ ಶುಭಾಶಯಗಳು.
ಹೊಸ ವರ್ಷದ ಶುಭಾಶಯಗಳು, ಈ ಹೊಸ ವರ್ಷವು ನಿಮ್ಮ ಬಾಳಿನ ಪುಸ್ತಕದಲ್ಲಿ ಆನಂದದ ಹೊಸ ಅಧ್ಯಾಯವನ್ನೇ ರಚಿಸಲಿ.
ಹೊಸ ವರ್ಷವು ನಿಮಗೆ ಶುಭವನ್ನೂ, ನೀವು ಬಯಸುವ ಆಹಾರದೊಂದಿಗೆ ನೆಮ್ಮದಿಯ ನಿದ್ದೆಯನ್ನೂ, ಉತ್ತಮ ಸ್ನೇಹಿತರ ಸಹವಾಸವನ್ನು, ಸುಂದರತಾಣಗಳಿಗೆ ಪ್ರವಾಸವನ್ನೂ, ಶಾಂತಿ-ನೆಮ್ಮದಿಗಳೊಂದಿಗೆ ಅಭ್ಯುದಯಗಳನ್ನೂ ಹೊತ್ತು ತರಲಿ; ನನ್ನ ಹೃತ್ಪೂರ್ವಕ ಶುಭಾಶಯಗಳು.
ನಿಮ್ಮೆಲ್ಲಾ ಆಸೆ-ಆಕಾಂಕ್ಷೆಗಳಿಗೂ ಹಾಗೂ ಕನಸುಗಳೂ ಕೈಗೂಡಿ ನೀವು ಆನಂದಿಂದ ವಿಹರಿಸುವಂತಾಗಲಿ.
ನಿಮ್ಮ ಹೊಸ ವರ್ಷದ ನಿಶ್ಚಯಗಳು ಯಶಸ್ವಿಯಾಗಿ ಕೈಗೂಡಲಿ; ನಿಮ್ಮ ಜೀವನವು ಶಾಂತಿ-ನೆಮ್ಮದಿಗಳಿಂದ ಕೂಡಿ ನಿಮ್ಮ ಭಾಗ್ಯೋದಯವಾಗಲಿ.
2022ರ ಹೊಸವರ್ಷದಲ್ಲಿ ನಿಮ್ಮ ಜೀವನವು ಹೊಸ ಸಾಹಸಗಳಿಂದ ಹಾಗೂ ಸಾಧನೆಗಳಿಂದ ಕೂಡಿ ಪ್ರೀತಿ-ಪಾತ್ರರೊಂದಿಗೆ ನೀವು ಆನಂದದ ಕ್ಷಣಗಳನ್ನು ಅನುಭವಿಸುವಂತಾಗಲಿ, ಶುಭಾಶಯಗಳು.
ವಿಶ್ವವೇ ಸಾಂಕ್ರಾಮಿಕ ಮಹಾಮಾರಿಯನ್ನು ಎದುರಿಸುತ್ತಿರುವ ಈ ಸೂಕ್ಷ್ಮ ಸಂದರ್ಭದಲ್ಲಿ ನಿಮಗೆ ಹಾಗೂ ನಿಮ್ಮ ಕುಟುಂಬದ ಎಲ್ಲಾ ಸದಸ್ಯರಿಗೆ ಉತ್ತಮ ಮಾನಸಿಕ ಧೈರ್ಯ, ಆರೋಗ್ಯ, ಹಾಗೂ ಅಭ್ಯುದಯವನ್ನು ಕೋರುತ್ತೇನೆ.
365 ಖಾಲಿ ಪುಟಗಳ ಪುಸ್ತಕದ ಮೊದಲ ಪುಟ ನಾಳೆ ತೆರೆದುಕೊಳ್ಳಲಿದ್ದು ನಿಮ್ಮ ಸಾಧನೆಯ ರಂಗು-ರಂಗಿನ ಚಿತ್ತಾರ ಅದರಲ್ಲಿ ಮೂಡಲಿ.
ಯಶಸ್ಸಿನ ಶಿಖರವನ್ನೇರುವ ನಿಮ್ಮ ಸತತ ಪ್ರಯತ್ನದಲ್ಲಿ ಆರಾಮ-ವಿರಾಮಕ್ಕೂ ಸ್ವಲ್ಪ ಸಮಯ ಮೀಸಲಿಡಿ, ಹೊಸವರ್ಷದ ಶುಭಾಕಾಂಕ್ಷೆಗಳು.
ಸಂದಿಗ್ಧ ಸಮಯದಲ್ಲಿ ಜೊತೆಯಿದ್ದು ಬೆಂಬಲಿಸಿದ್ದಕ್ಕಾಗಿ ಹೃತ್ಪೂರ್ವಕ ಧನ್ಯವಾದಗಳು, ಹೊಸವರ್ಷದಲ್ಲಿ ನಮ್ಮ ಗೆಳೆತನ ಮತ್ತಷ್ಟು ಗಟ್ಟಿಗೊಳ್ಳಲಿ, 2022 ನಮ್ಮೆಲ್ಲರಿಗೂ ಶುಭವನ್ನು ತರಲಿ.