ಲೂಧಿಯಾನ ಕೋರ್ಟ್​ ಸಂಕೀರ್ಣದಲ್ಲಿ ಸ್ಫೋಟ: ಮಾಜಿ ಹೆಡ್​ ಕಾನ್​ಸ್ಟೆಬಲ್​ ಸಂಚುಕೋರ

ಚಂಡೀಗಡ: ಪಂಜಾಬ್​ನ ಲೂಧಿಯಾನ ಜಿಲ್ಲಾ ಕೋರ್ಟ್​ ಸಂಕೀರ್ಣದಲ್ಲಿ  ಬುಧವಾರ ಸಂಭವಿಸಿದ ಸ್ಫೋಟ ಪ್ರಕರಣಕ್ಕೆ ಉದ್ಯೋಗದಿಂದ ವಜಾಗೊಂಡಿದ್ದ ಪೋಲಿಸ್‌ ಹೆಡ್​ ಕಾನ್​ಸ್ಟೆಬಲ್​ ಕಾರಣ ಎಂಬುದು ದೃಢಪಟ್ಟಿದೆ. ಕೋರ್ಟ್​ನ ಎರಡನೇ ಮಹಡಿಯ ಶೌಚಾಲಯದಲ್ಲಿ  ಸುಧಾರಿತ ಸ್ಫೋಟಕ ಸಾಧನವನ್ನು (ಐಇಡಿ) ಜೋಡಣೆ ಮಾಡುವಾಗ ಅದು ಸ್ಫೋಟಿಸಿ ಆರೋಪಿ ಗಗನ್​ದೀಪ್​ ಸಿಂಗ್​ ಸಾವನ್ನಪ್ಪಿದ್ದಾನೆ ಎಂದು ಪಂಜಾಬ್​ ಪೊಲೀಸ್​ ಮಹಾನಿರ್ದೇಶಕ ಸಿದ್ಧಾರ್ಥ್​ ಚಟ್ಟೋಪಾಧ್ಯಾಯ ಹೇಳಿದ್ದಾರೆ.

ಗಗನದೀಪ್​ ಸಿಂಗ್​ ಡ್ರಗ್ಸ್​ ಪ್ರಕರಣದ ಸಂಬಂಧ 2019ರಲ್ಲಿ ಬಂಧಿತನಾಗಿದ್ದ ಮತ್ತು ಸೇವೆಯಿಂದ ವಜಾಗೊಂಡಿದ್ದ. ಈತ ಕಳೆದ ಸೆಪ್ಟೆಂಬರ್​ನಲ್ಲಿ ಜಾಮೀನಿನ ಮೇಲೆ ಬಿಡುಗಡೆಯಾಗಿದ್ದರೂ, ಪ್ರಕರಣದ ವಿಚಾರಣೆಗೆ ಕೋರ್ಟ್​ಗೆ ಬರುತ್ತಿದ್ದ. ಜಡ್ಜ್​ ಮತ್ತು ವಕೀಲರನ್ನು ಹೆದರಿಸಲು ಶೌಚಾಲಯದಲ್ಲಿ ಸ್ಫೋಟಕ ಸಾಧನ ಇರಿಸಲು ಹೋಗಿ ಅದನ್ನು ಜೋಡಿಸುವ ವೇಳೆ ಸ್ಫೋಟಗೊಂಡ ಸತ್ತಿದ್ದಾನೆ ಎಂದು ತಿಳಿಸಿದ್ದಾರೆ.

ಗಗನದೀಪ್​ಗೆ ಮಾದಕವಸ್ತು ಜಾಲದೊಂದಿಗೆ ಮೊದಲೇ ನಂಟು ಇತ್ತು. ಈ ಪ್ರಕರಣದಲ್ಲಿ ಜೈಲು ಸೇರಿದ ಮೇಲೆ ಖಲಿಸ್ತಾನ್​ ಉಗ್ರರು ಇಲ್ಲವೆ ಪಾಕ್​ ಉಗ್ರರ ಜತೆ ನಂಟು ಹೊಂದಿರುವವರೊಂದಿಗೆ ಸಂಬಂಧ ಅಥವಾ ಐಎಸ್​ಐ ಜತೆಗಿನ ನಂಟು ಹೊಂದಿರುವ ಸಾಧ್ಯತೆ ಇದೆ. ಆದ್ದರಿಂದ  ಎಲ್ಲ ಕೋನಗಳಲ್ಲೂ ತನಿಖೆ ನಡೆಸಲಾಗುತ್ತಿದೆ ಎಂದು ವಿವರಿಸಿದ್ದಾರೆ.

ಆರೋಪಿ​ಗೆ ಸ್ಫೋಟಕ ಸಾಮಗ್ರಿಗಳು ಎಲ್ಲಿ ಸಿಕ್ಕವು ಎಂಬ ಬಗ್ಗೆಗೂ ತನಿಖೆ ನಡೆಯುತ್ತಿದೆ. ಆತನ ಸ್ನೇಹಿತರು, ಸೋದರರನ್ನು ವಿಚಾರಣೆ ನಡೆಸಲಾಗುತ್ತಿದೆ. ಗಗನದೀಪ್​ ಮನೆಯಲ್ಲಿದ್ದ ಲ್ಯಾಪ್​ಟಾಪ್​ ವಶಪಡಿಸಿಕೊಳ್ಳಲಾಗಿದೆ ಎಂದು ಹೇಳಿದ್ದಾರೆ.

ಈ ಐಇಡಿ ಸ್ಫೋಟದಿಂದ  ಐವರು ಗಾಯಗೊಂಡಿದ್ದರು. ಅಕ್ಕಪಕ್ಕದ ಕೋಣೆಗಳ ಕಿಟಕಿ ಗಾಜು ಒಡೆದಿತ್ತು. ರಾಷ್ಟ್ರೀಯ ತನಿಖಾ ಸಂಸ್ಥೆ (ಎನ್​ಐಎ), ರಾಷ್ಟ್ರೀಯ ಭದ್ರತಾ ದಳ (ಎನ್​ಎಸ್​ಜಿ) ತಂಡಗಳು ಲೂಧಿಯಾನ ಕೋರ್ಟ್‌ಗೆ ಭೇಟಿ ನೀಡಿದ್ದವು.

Ludhiana Blast Accused Assembled Bomb In Court Washroom

ಇದನ್ನು ಓದಿ: Bomb Explosion: ಲೂಧಿಯಾನ ಕೋರ್ಟ್​ ಸಂಕೀರ್ಣದಲ್ಲಿ ಸ್ಫೋಟ: ಒಬ್ಬನ ಸಾವು

ಇದನ್ನೂ ಓದಿ: ಬಿಹಾರದ ಗಯಾದಲ್ಲಿ ನಾಲ್ವರನ್ನು ಕೊಂದು ನೇಣಿಗೇರಿಸಿದ ನಕ್ಸಲರು