ಕೈ-ಕಾಲಿಲ್ಲದ ಅಂಗವಿಕಲನಿಗೆ ಕೆಲಸದ ಆಫರ್‌ ನೀಡಿದ ಆನಂದ್‌ ಮಹೀಂದ್ರಾ

ನವದೆಹಲಿ: ಕೈ-ಕಾಲು ಊನವಾಗಿರುವ ಅಂಗವಿಕಲೊಬ್ಬರು ವಿಶಿಷ್ಟ ವಾಹನದಲ್ಲಿ ಓಡಾಡುತ್ತಿರುವ, ಜೀವನೋತ್ಸದಿಂದ ಇರುವ ವಿಡಿಯೋವನ್ನು ನೋಡಿದ ಉದ್ಯಮಿ ಆನಂದ್‌ ಮಹೀಂದ್ರಾ, ಆ ವ್ಯಕ್ತಿಗೆ ಉದ್ಯೋಗದ ಆಫರ್‌ ನೀಡಿದ್ದಾರೆ.

ಪತ್ನಿ, ಇಬ್ಬರು ಮಕ್ಕಳು, ವಯಸ್ಸಾದ ತಂದೆ ಇದ್ದಾರೆ. ಹೀಗಾಗಿ ನಾನು ದುಡಿಯಬೇಕಿದೆ. ಐದು ವರ್ಷದಿಂದ ಸ್ಕೂಟಿಯಲ್ಲಿ ಓಡಾಡುತ್ತಿದ್ದೇನೆ. ಜನರು ನನ್ನನ್ನು ನೋಡಿ ಮರುಕ ಪಡುತ್ತಿದ್ದರು. ಕೆಲವರು ನೆರವು ನೀಡುತ್ತಿದ್ದರು. ಈಗ ನಾನು ಹಾಕಿರುವ ವಿಡಿಯೋವನ್ನು ನೀಡಿ ಆನಂದ್‌ ಮಹೀಂದ್ರಾ, ಕೆಲಸ ಕೊಡಿಸುವುದಾಗಿ ಹೇಳಿದ್ದಾರೆ ಎಂದು ಅಂಗವಿಕಲ ವ್ಯಕ್ತಿ ಹರ್ಷಗೊಂಡಿದ್ದಾರೆ.

ಅಂಗವಿಕಲ ವ್ಯಕ್ತಿ ಟ್ವಿಟರ್‌ನಲ್ಲಿ ಹಾಕಿಸಿದ್ದ ಈ ವಿಡಿಯೋವನ್ನು ನೋಡಿದ ಆನಂದ್‌ ಮಹೀಂದ್ರಾ, ಈ ವಿಡಿಯೋ ಎಷ್ಟು ಹಳೆಯದೆಂದು ಗೊತ್ತಿಲ್ಲ. ಆದರೆ, ಅಂಗವೈಕಲ್ಯದಲ್ಲೂ ಜೀವನೋತ್ಸವನ್ನು ಇರಿಸಿಕೊಂಡಿರುವ ಈ ಮನುಷ್ಯ ನಿಜಕ್ಕೂ ಅದ್ಭುತ ಎಂದಿದ್ದಾರೆ. ಜತೆಗೆ ಇದನ್ನು ತಮ್ಮ ಸ್ನೇಹಿತ ರಾಮ್‌ ಎಂಬುವರಿಗೆ ಟ್ಯಾಗ್‌ ಮಾಡಿ, ಈತನಿಗೆ ಉದ್ಯೋಗ ನೀಡಬಹುದೆ ಎಂದು ಕೇಳಿದ್ದಾರೆ. ಮಹೀಂದ್ರಾ ಲಾಜಿಸ್ಟಿಕ್‌ ಕಳೆದ ಜನವರಿಯಲ್ಲಿ ಎಲೆಕ್ಟ್ರಿಕ್‌ ಲಾಸ್ಟ್ ಮೈಲ್‌ ಸರ್ವೀಸ್‌ ಎಂಬ ಸೇವೆಯನ್ನು ಆರು ನಗರಗಳಲ್ಲಿ ಆರಂಭಿಸಿದೆ. ಇದರಲ್ಲಿ ಅಂಗವಿಕಲ ವ್ಯಕ್ತಿಗೆ ಕೆಲಸ ನೀಡುವಂತೆ ಆನಂದ್‌ ಮಹೀಂದ್ರಾ ಹೇಳಿದ್ದಾರೆ.

ಈ ವಿಡಿಯೋವನ್ನು 50 ಸಾವಿರ ಜನರು ನೋಡಿದ್ದಾರೆ. ಅನೇಕರು ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ. ಜತೆಗೆ ಆನಂದ ಮಹೀಂದ್ರಾ ಅವರ ಔದಾರ್ಯವನ್ನು ಹೊಗಳಿದ್ದಾರೆ.

ಕಳೆದ ತಿಂಗಳು ಮಹಾರಾಷ್ಟ್ರದಲ್ಲಿ ಅಂಗವಿಲೊಬ್ಬರು ತಮ್ಮಗೆ ಅನುಕೂಲವಾಗುವಂತೆ ವಾಹನವನ್ನು ವಿನ್ಯಾಸ ಮಾಡಿಕೊಂಡಿದ್ದನ್ನು ನೋಡಿದ ಆನಂದ್‌ ಮಹೀಂದ್ರಾ, ಅವರಿಗೆ ಬಲೆರೊ ಎಸ್‌ಯುವಿ ವಾಹನವನ್ನು ಕೊಡುಗೆಯಾಗಿ ನೀಡಿದ್ದರು.

Anand Mahindra Offers A Job To Delhi Man With No Limbs. His Video Is Viral

ಇದನ್ನು ಓದಿ:ಆರು ರಾಜ್ಯಗಳಿಗೆ ಕೇಂದ್ರದಿಂದ ಹೆಚ್ಚುವರಿಯಾಗಿ 3,063.21 ಕೋಟಿ ರೂ. ನೆರವು
ಇದನ್ನೂ ಓದಿ: ಸ್ಪೂರ್ತಿದಾಯಕ ಜೀವನ: ಐಎಎಸ್ ಆರತಿ ಡೋಗ್ರಾ ಅವರ ಕಥೆ ಓದಿ