ರನ್ನಿಂಗ್ ಅಥವಾ ಹಗ್ಗದ ಸಹಾಯದ ಜಂಪಿಂಗ್: ತೂಕ ಕಳೆದುಕೊಳ್ಳಲು ಯಾವುದು ಉತ್ತಮ?

ಆಧುನಿಕ ಜೀವನ ಶೈಲಿಯಿಂದ ದೇಹದ ತೂಕ ಹೆಚ್ಚಾಗುವುದು, ಹೃದಯ ಸಂಬಂಧಿ ಸಮಸ್ಯೆಗಳು ಜನರನ್ನು ಹೆಚ್ಚೆಚ್ಚು ಕಾಡಲಾರಂಭಿಸಿವೆ. ಹೀಗಾಗಿ ಜನ ಹಲವು ವ್ಯಾಯಾಮಗಳ ಮೊರೆಹೋಗುತ್ತಿದ್ದಾರೆ. ಶರೀರದ ತೂಕ ಕಡಿಮೆ ಮಾಡಿಕೊಳ್ಳಲು ಬಯಸುವುದಾದರೆ ಓಡುವ ವ್ಯಾಯಾಮ ಉತ್ತಮವೇ ಅಥವಾ ಹಗ್ಗದ ಸಹಾಯದ ಜಂಪಿಂಗ್ ಮಾಡುವುದು ಒಳ್ಳೆಯದೇ? ಈ ಎರಡೂ ವ್ಯಾಯಾಮಗಳ ಬಗ್ಗೆ ತಜ್ಞರು ಏನು ಹೇಳುತ್ತಾರೆ? ಇಲ್ಲಿದೆ ಮಾಹಿತಿ.

ತೂಕ ಇಳಿಸಿಕೊಳ್ಳಲು ಬಯಸುವುದಾದರೆ ನಮ್ಮ ಆಹಾರ–ವಿಹಾರ, ದಿನಚರಿ, ದೈಹಿಕ ಚಟುವಟಿಕೆಗಳ ವಿಚಾರದಲ್ಲಿ ಸ್ಥಿರವಾಗಿರಬೇಕು. ಪ್ರತಿಯೊಬ್ಬರ ದೇಹ ಪ್ರಕೃತಿಯೂ ಭಿನ್ನವಾಗಿರುವುದರಿಂದ ಆಯಾ ಶರೀರ ಪ್ರಕೃತಿಗೆ ಹೊಂದಿಕೊಂಡು ವಿಭಿನ್ನ ವಿಧಾನಗಳ ವ್ಯಾಯಾಮಗಳನ್ನು ಅನುಸರಿಸುವುದು ಉತ್ತಮ.

ಇದನ್ನೂ ಓದಿ: ದಿನನಿತ್ಯದ ಕಠಿಣ ವ್ಯಾಯಾಮವೇ ಸೋಹಾ ಅಲಿಖಾನ್ ಉತ್ತಮ ಆರೋಗ್ಯದ ಗುಟ್ಟು

ಖರ್ಚಿಲ್ಲದೆ, ಸುಲಭವಾಗಿ ಮಾಡಬಹುದಾದ ವ್ಯಾಯಾಮಗಳೆಂದರೆ ಓಟ ಮತ್ತು ಹಗ್ಗದ ಸಹಾಯದ ಜಂಪಿಂಗ್. ಈ ಎರಡೂ ವ್ಯಾಯಾಮಗಳು ಹೃದಯದ ಸ್ನಾಯುಗಳನ್ನು ಬಲಗೊಳಿಸುವುದಲ್ಲದೆ ಆರೋಗ್ಯಕರ ತೂಕ ಮತ್ತು ಎಲುಬಿನ ಸಾಂಧ್ರತೆಯನ್ನು ಹೊಂದಲು ನೆರವಾಗುತ್ತವೆ. ಜೊತೆಗೆ ದೇಹದ ಒಟ್ಟಾರೆ ಕ್ಷಮತೆಗೆ ಸಹಾಯ ಮಾಡುತ್ತವೆ ಎಂದು ಫಿಟ್ನೆಸ್ ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ.

ಹಗ್ಗದ ಸಹಾಯದಿಂದ ಮಾಡುವ ಜಂಪಿಂಗ್‌ನ ಪ್ರಯೋಜನಗಳು ಇಲ್ಲಿವೆ;

* ಹೆಚ್ಚು ಕ್ಯಾಲರಿಯನ್ನು ಕಳೆದುಕೊಳ್ಳುವುದು ನಿಮ್ಮ ಉದ್ದೇಶವಾಗಿದ್ದರೆ ಓಟಕಿಂತಲೂ ಹಗ್ಗದ ಸಹಾಯದಿಂದ ಮಾಡುವ ಜಂಪಿಂಗ್ ಉತ್ತಮ. ಒಂದು ನಿಮಿಷದ ಈ ವ್ಯಾಯಾಮದಿಂದ ಸುಮಾರು 10–16 ಕ್ಯಾಲೊರಿ ವ್ಯಯ ಮಾಡಬಹುದು. 10 ನಿಮಿಷಗಳ ಮೂರು ಆವೃತ್ತಿಯಂತೆ 30 ನಿಮಿಷಗಳ ಕಾಲ ಜಂಪಿಂಗ್ ಮಾಡುವುದರಿಂದ ಸುಮಾರು 480ರಷ್ಟು ಕ್ಯಾಲೊರಿಗಳನ್ನು ವ್ಯಯ ಮಾಡಬಹುದು. ಇದು ಸುಮಾರು 8 ಮೈಲಿಗಳ ಓಟದಲ್ಲಿ ದೊರೆಯುವ ವ್ಯಾಯಾಮಕ್ಕೆ ಸಮ ಎಂದು ತಜ್ಞರು ಹೇಳಿದ್ದಾರೆ.

ಸ್ನಾಯುಗಳು ಬಲಗೊಳ್ಳಲು ಸಹಕಾರಿ

ಜಂಪಿಂಗ್‌ನಿಂದ ದೇಹದ ಸ್ನಾಯುಗಳು ಬಲಿಷ್ಠವಾಗುತ್ತವೆ. ಪಾದಗಳ ಮೇಲೆ ಹೆಚ್ಚು ಒತ್ತಡ ಬೀಳುವುದಿಲ್ಲ. ಕರುಳಿನ ಕಾರ್ಯಕ್ಷಮತೆಯು ವೃದ್ಧಿಯಾಗುತ್ತದೆ. ಓಡಲು ಸಾಧ್ಯವಾಗದವರೂ ಕೂಡ ಇದನ್ನು ಮಾಡಬಹುದಾಗಿದೆ.

ಚುರುಕುತನ, ಲವಲವಿಕೆಗೆ ಸಹಕಾರಿ

ಹಗ್ಗವನ್ನು ಕೈಯ ಮಣಿಗಂಟಿನ ಸಹಾಯದಿಂದ ತಿರುವುವುದು ಮತ್ತು ಪಾದಗಳನ್ನು ಮೇಲೆತ್ತುವುದು, ಈ ಎರಡೂ ಕೆಲಸಗಳು ಏಕಕಾಲಕ್ಕೆ ನಡೆಯುವುದರಿಂದ ದೇಹದಲ್ಲಿ ಸಮನ್ವಯ ಸಾಧಿಸುವುದು ಸುಲಭವಾಗುತ್ತದೆ. ಜೊತೆಗೆ ಶರೀರದ ಸಾಮರ್ಥ್ಯವನ್ನು ಹೆಚ್ಚಿಸಲು ನೆರವಾಗುತ್ತದೆ. ಇದರಿಂದಾಗಿ ತನ್ನಿಂತಾನೇ ದೇಹವು ಚುರುಕಾಗುತ್ತದೆ.

ಓಟವೂ ಉತ್ತಮ…

ಪ್ರತಿದಿನ ಓಡುವುದೂ ಕೂಡ ಹೃದಯದ ಆರೋಗ್ಯದ ದೃಷ್ಟಿಯಿಂದ ಉತ್ತಮವಾದ ವ್ಯಾಯಾಮ. ಇದರಿಂದ ಹೃದಯದ ಸ್ನಾಯುಗಳು ಬಲಿಷ್ಠವಾಗುತ್ತವೆ. ರಕ್ತ ಪರಿಚಲನೆ ಸುಗಮವಾಗುತ್ತದೆ. ಕೊಲೆಸ್ಟ್ರಾಲ್ ಮಟ್ಟ ಕಡಿಮೆಯಾಗುತ್ತದೆ. ರಕ್ತದೊತ್ತಡ ಹಾಗೂ ಇತರ ಹೃದಯ ಸಂಬಂಧಿ ಸಮಸ್ಯೆಗಳನ್ನು ಕಡಿಮೆ ಮಾಡುವಲ್ಲಿ ಓಟದ ಪಾತ್ರ ಮಹತ್ವದ್ದು ಎಂದು ತಜ್ಞರು ಹೇಳಿದ್ದಾರೆ

ಶ್ವಾಸಕೋಶ ಶುದ್ಧಿಗೆ ಸಹಕಾರಿ

ಓಡುವುದರಿಂದ ಶ್ವಾಸಕೋಶದಲ್ಲಿ ಇರುವ ಕಾರ್ಬನ್ ಡೈಆಕ್ಸೈಡ್ ಸಂಪೂರ್ಣವಾಗಿ ಹೊರಬರುತ್ತವೆ. ಓಡುವ ಸಮಯದಲ್ಲಿ ದೀರ್ಘ ಉಸಿರಾಟ ಮಾಡುವುದರಿಂದ ಶ್ವಾಸಕೋಶಕ್ಕೆ ಸಂಬಂಧಿಸಿದ ಅವಯವಗಳ ಸಾಮರ್ಥ್ಯ ವೃದ್ಧಿಗೂ ನೆರವಾಗುತ್ತದೆ ಎಂದು ತಜ್ಞರು ಹೇಳಿದ್ದಾರೆ.

ಇದನ್ನೂ ಓದಿ: Opinion: ವಯಸ್ಸಾದ ಮಾತ್ರಕ್ಕೆ ಭಾರ ಎನಿಸಬೇಕೆ? ಹಿರಿಯ ನಾಗರಿಕರ ನೆಮ್ಮದಿಗೆ ಕಿರಿಯರು ಏನು ಮಾಡಬಹುದು?