ತೂಕ ಇಳಿಸಿಕೊಳ್ಳಲು ಸುಲಭವಾದ ಹಾಗೂ ಪರಿಣಾಮಕಾರಿ ಅಭ್ಯಾಸಗಳು

ಉತ್ತಮ ಆರೋಗ್ಯಕ್ಕಾಗಿ ತೂಕ ಇಳಿಸಿಕೊಳ್ಳುವುದು ನಿಮ್ಮ ತಕ್ಷಣದ ಯೋಜನೆಯಾಗಿದ್ದರೆ ಕೆಲ ಸೂಕ್ತ ಮಾರ್ಗೋಪಾಯಗಳನ್ನು ಕೆಳಗೆ ನೀಡಲಾಗಿದೆ. ತೂಕ ಇಳಿಸಿಕೊಳ್ಳಲು ತಿನ್ನುವ ಆಹಾರ ಪ್ರಮಾಣವನ್ನು ಅವೈಜ್ಞಾನಿಕವಾಗಿ ಕಡಿಮೆ ಮಾಡಿಕೊಳ್ಳುವುದು ಅಥವಾ ತಿನ್ನದೇ ಇರುವುದು ಸರಿಯಾದ ವಿಧಾನವಲ್ಲ.

ತಜ್ಞರ ಪ್ರಕಾರ ತೂಕ ಇಳಿಸಿಕೊಳ್ಳುವ ಪ್ರಯತ್ನದಲ್ಲಿ ತಪ್ಪು ತಿಳುವಳಿಕೆಯಿಂದಾಗಿ ಬಹಳಷ್ಟು ಜನ ಪೌಷ್ಟಿಕ ಆಹಾರವನ್ನು ತೆಗೆದುಕೊಳ್ಳುವತ್ತ ಗಮನ ಹರಿಸದೇ ಕಡಿಮೆ ಕ್ಯಾಲೊರಿಯಿರುವ ಆಹಾರಗಳನ್ನು ತೆಗೆದುಕೊಳ್ಳುತ್ತಾರೆ. ಇದು ಅವರಿಗೆ ಹೊಟ್ಟೆ ತುಂಬಿದ ಅನುಭವ ನೀಡದೆ ಹೆಚ್ಚು ಹಸಿವಾಗುವ ಭಾವನೆಯನ್ನು ನೀಡಿ ಪದೇ-ಪದೇ ತಿನ್ನುವಂತೆ ಮಾಡುತ್ತದೆ.

1. ಹೆಚ್ಚಿನ ಫೈಬರ್ (ನಾರಿನ) ಅಂಶ ಮತ್ತು ಪ್ರೋಟೀನ್‌ಗಳು ನಿಮ್ಮ ಆಹಾರದಲ್ಲಿರಲಿ: ಈ ಎರಡೂ ಅಂಶಗಳು ನಿಮ್ಮ ಆಹಾರದಲ್ಲಿ ಸೂಕ್ತ ಪ್ರಮಾಣದಲ್ಲಿದ್ದರೆ ರಕ್ತದಲ್ಲಿರುವ ಸಕ್ಕರೆಯ ಅಂಶವನ್ನು ಸಮತೋಲನದಲ್ಲಿಡಲು ಸಹಾಯ ಮಾಡುತ್ತವೆ. ಇವು ಜೀರ್ಣಕ್ರಿಯೆಯ ವೇಗವನ್ನು ಕಡಿಮೆ ಮಾಡುವುದರಿಂದ ನಿಮ್ಮ ದೇಹ ಚುರುಕಾಗಿರುವುದಲ್ಲದೇ ಹೆಚ್ಚಿನ ಸಮಯದವರೆಗೆ ಹೊಟ್ಟೆ ತುಂಬಿರುವ ಭಾವನೆಯಿರುತ್ತದೆ. ನಾರಿನ ಅಂಶ ಹೆಚ್ಚಿರುವ ಆಹಾರಗಳೆಂದರೆ ಹಣ್ಣುಗಳು (ಸೇಬು ಮತ್ತು ಕಪ್ಪು ದ್ರಾಕ್ಷಿ), ತರಕಾರಿಗಳು (ಸಿಪ್ಪೆ ಸಮೇತ ಆಲೂಗಡ್ಡೆ, ಹೂಕೋಸು, ಪಾಲಕ್, ಮತ್ತು ಬಟಾಣಿ), ಧಾನ್ಯಗಳು (ಬಾರ್ಲೆ, ಗೋಧಿ, ಓಟ್ಸ್, ಮತ್ತು ಜೋಳ), ಬೀಜ (ಕಡಲೆ ಬೀಜ, ಬಾದಾಮಿ), ಒಣಹಣ್ಣುಗಳು (ಖರ್ಜೂರ, ಸಕ್ಕರೆಬಾದಾಮಿ, ಏಪ್ರಿಕಾಟ್) ಮುಂತಾದವುಗಳು.

2. ನಿಮ್ಮ ಆಹಾರಪಟ್ಟಿಗೆ ಸರಿಯಾದ ಆಹಾರಗಳನ್ನು ಸೇರಿಸಿ: ಆಹಾರ ತಿನ್ನದೇ ಇರುವುದು ಅಥವಾ ಕಡಿಮೆ ಆಹಾರ ತಿನ್ನುವುದಕ್ಕಿಂತ ಉತ್ತಮವಾದ ಪೌಷ್ಟಿಕ ಆಹಾರವನ್ನು ಸರಿಯಾದ ಪ್ರಮಾಣದಲ್ಲಿ ನಿಯಮಿತವಾಗಿ ಸೇವಿಸುವುದು ತೂಕ ಇಳಿಸಿಕೊಳ್ಳುವ ವೈಜ್ಞಾನಿಕ ವಿಧಾನ. ಜಂಕ್ ಪದಾರ್ಥಗಳು, ಮಸಾಲೆಯುಕ್ತ ಪದಾರ್ಥಗಳು, ಹಾಗೂ ಕುರುಕು ತಿಂಡಿಗಳನ್ನು ಆದಷ್ಟು ಕಡಿಮೆ ಮಾಡುವುದು ಉತ್ತಮ ಆರೋಗ್ಯ ಹೊಂದಲು ಸಹಕಾರಿ.

3. ಹೆಚ್ಚು ನೀರನ್ನು ಕುಡಿಯಿರಿ: ಇದು ತೂಕ ಇಳಿಸಿಕೊಳ್ಳಲು ಸುಲಭವಾದ ಒಂದು ಮಾರ್ಗ. ಹೆಚ್ಚು ನೀರನ್ನು ಕುಡಿಯುವುದು ನಮ್ಮ ಸಾಮಾನ್ಯ ಆರೋಗ್ಯಕ್ಕೂ ಒಳ್ಳೆಯದಾಗಿದ್ದು ಹೆಚ್ಚಿನ ಕ್ಯಾಲರಿಯಿರುವ ತಂಪು ಪಾನೀಯಗಳನ್ನು ಕುಡಿಯವುದನ್ನು ನಿಯಂತ್ರಿಸುತ್ತದೆ.

4. ಅಡೆ-ತಡೆಯಿಲ್ಲದ ಸುಖನಿದ್ರೆ: ಅವಶ್ಯವಿರುವಷ್ಟು ಪ್ರಶಾಂತ ನಿದ್ರೆ ಸಿಗದಿದ್ದರೆ ದೇಹಕ್ಕೆ ಆರಾಮ ಸಿಗದೆ ಹೆಚ್ಚಿನ ಪ್ರಮಾಣದ ಒತ್ತಡಕ್ಕೆ ಕಾರಣವಾಗಿ ಅದು ತೂಕ ಕಡಿಮೆ ಮಾಡುವ ಹಾರ್ಮೋನ್‌ಗಳ ಮೇಲೆ ನಕಾರಾತ್ಮಕ ಪರಿಣಾಮ ಬೀರುತ್ತದೆ, ಹಾಗಾಗಿ, ಚೆನ್ನಾಗಿ ನಿದ್ರೆ ಮಾಡುವುದು ಕೂಡ ದೇಹ ತೂಕ ಕಡಿಮೆ ಮಾಡಿಕೊಳ್ಳಲು ಸಹಾಯಕವಾಗುತ್ತದೆ. ಸುಖವಾಗಿ ನಿದ್ರೆ ಮಾಡಲು ಸಹಾಯ ಮಾಡುವ ಕೆಲ ಉಪಾಯಗಳೆಂದರೆ ಮಲಗುವ ಮುನ್ನ ಸ್ವಲ್ಪ ಓದುವುದು; ಗಣಕಯಂತ್ರ, ದೂರದರ್ಶನ, ಹಾಗೂ ಮೊಬೈಲ್‌ಗಳನ್ನು ಉಪಯೋಗಿಸದಿರುವುದು; ಹಾಗೂ ಲಘು ವ್ಯಾಯಾಮ ಮಾಡುವುದು.

ಪೌಷ್ಟಿಕ ಆಹಾರಯುಕ್ತ ಉತ್ತಮ ಆಹಾರಪದ್ಧತಿ, ಆರೋಗ್ಯಕರ ಹವ್ಯಾಸಗಳು, ದಿನ ನಿತ್ಯದ ವ್ಯಾಯಾಮಗಳು, ಹಾಗೂ ಸುಖನಿದ್ರೆಗಳಿಂದ ಕೂಡಿದ ಜೀವನಶೈಲಿಯಿಂದ ದೇಹದ ತೂಕ ಕಡಿಮೆ ಮಾಡಿಕೊಳ್ಳುವ ಪ್ರಯತ್ನದಲ್ಲಿ ಯಶಸ್ವಿಯಾಗಬಹುದು.

Simple steps to reduce excessive body weight and remain healthy

ಇದನ್ನೂ ಓದಿ: ಮಾಜಿ ಪ್ರಧಾನಿ ಮನಮೋಹನ್ ಸಿಂಗ್ ಆರೋಗ್ಯದಲ್ಲಿ ಏರುಪೇರು

ಇದನ್ನೂ ಓದಿ: ಕೋವಿಡ್ ಜನಕ ಚೀನಾ: ವಿಶ್ವ ಆರೋಗ್ಯ ಸಂಸ್ಥೆ ನೀಡಿದೆ ಶಾಕಿಂಗ್ ವರದಿ