ನಟ ಶಾರುಖ್​ ಖಾನ್​ ಮನೆ ಮೇಲೆ ದಾಳಿ ನಡೆಸಿಲ್ಲವೆಂದ ಎನ್​ಸಿಬಿ

ಮುಂಬೈ: ಗೋವಾದಿಂದ ಮುಂಬೈಗೆ ಹೋಗುತ್ತಿದ್ದ ಐಷಾರಾಮಿ ಹಡಗಿನಲ್ಲಿ ಅಕ್ಟೋಬರ್​ 2ರಂದು ರೇವ್​ ಪಾರ್ಟಿ ನಡೆಸಿ ಮಾದಕವಸ್ತು ಸೇವನೆ ಆರೋಪದಲ್ಲಿ ಆರ್ಯನ್​ ಖಾನ್​ ಬಂಧಿತನಾಗಿರುವ ಹಿನ್ನೆಲೆಯಲ್ಲಿ ಆತನ ತಂದೆ ಮತ್ತು ಬಾಲಿವುಡ್​ನ ಖ್ಯಾತ ನಟ ಶಾರುಖ್​ ಖಾನ್​ ಅವರ ಮನೆ “ಮನ್ನತ್​’ಗೆ ಮಾದಕವಸ್ತು ನಿಯಂತ್ರಣ ಬ್ಯೂರೊ (ಎನ್​ಸಿಬಿ) ತಂಡ ಗುರುವಾರ ಭೇಟಿ ಕೊಟ್ಟಿತ್ತು. ಆದರೆ, ಅನೇಕ ಮಾಧ್ಯಮಗಳಲ್ಲಿ ಶಾರುಖ್​ ಮನೆ ಮೇಲೆ ಎನ್​ಸಿಬಿ ದಾಳಿ ನಡೆಸಿದೆ ಎಂಬ ವರದಿ ಬಿತ್ತರವಾದ ಹಿನ್ನೆಲೆಯಲ್ಲಿ, ಇದು ದಾಳಿಯಲ್ಲ. ದಾಖಲಾತಿ ಪ್ರಕ್ರಿಯೆ ಸಂಬಂಧದ ಭೇಟಿ ಎಂದು ಎನ್​ಸಿಬಿ ಅಧಿಕಾರಿ ಸಮೀರ್​ ವಾಂಖೆಡೆ ಹೇಳಿಕೆಯಲ್ಲಿ ಸ್ಪಷ್ಟಡಿಸಿದ್ದಾರೆ.

ವಿಶೇಷ ಕೋರ್ಟ್​ನಲ್ಲಿ ಆರ್ಯನ್​ ಅರ್ಜಿ ಬುಧವಾರ ಎರಡನೇ ಸಲವೂ ತಿರಸ್ಕೃತವಾದ ಹಿನ್ನೆಲೆಯಲ್ಲಿ ಆರ್ಯನ್​ ವಕೀಲರು ಈಗ ಬಾಂಬೆ ಹೈಕೋರ್ಟ್​ ಮೊರೆ ಹೋಗಿದ್ದಾರೆ. ಈ ಅರ್ಜಿ ಮಂಗಳವಾರದ ವಿಚಾರಣೆಯ ಪಟ್ಟಿ ಯಲ್ಲಿ ಇದೆ.
ಡ್ರಗ್ಸ್​ ಸೇವನೆ ಪ್ರಕರಣ ಸಂಬಂಧ ಆರ್ಯನ್​ ಖಾನ್​ ಸೇರಿ ಎಂಟು ಆರೋಪಿಯನ್ನು ಎನ್​ಸಿಬಿ ಅ. 2ರಂದು ಬಂಧಿಸಿತ್ತು. ನಂತರ 12 ಮಂದಿಯನ್ನು ಅರೆಸ್ಟ್​ ಮಾಡಿದೆ.

20 ದಿನದ ನಂತರ ಮಗನನ್ನು ಕಂಡ ಖಾನ್​
ಶಾರುಖ್​ ಖಾನ್​ ಅರ್ಥರ್​ ರೋಡ್​ ಜೈಲಿಗೆ ಗುರುವಾರ ಬೆಳಗ್ಗೆ ಭೇಟಿ ನೀಡಿದ್ದರು. ತಮ್ಮ ಮಗ ಆರ್ಯನ್​ ಬಂಧಿತನಾಗಿ 20 ದಿನದ ನಂತರ ಆತನನ್ನು ಅವರು ಮುಖಾಮುಖಿಯಾದರು. ಜೈಲಿನ ಸಂದರ್ಶಕರ ಕೋಣೆಯಲ್ಲಿದ್ದ 20 ನಿಮಿಷ ಇದ್ದ ಶಾರುಖ್​, ಮಗನನ್ನು ದೂರದಿಂದಲೇ ಕಂಡು ಇಂಟರ್​ಕಾಂನಲ್ಲಿ ಮಾತನಾಡಿದರು. ಶಾರುಖ್​ ಮತ್ತು ಗೌರಿ ದಂಪತಿ ಕಳೆದ ಶುಕ್ರವಾರ ವಿಡಿಯೋ ಕಾಲ್​ನಲ್ಲಿ ಆರ್ಯನ್​ ಜತೆ ಮಾತನಾಡಿದ್ದರು. ಶಾರುಖ್​ ಜೈಲಿಗೆ ಭೇಟಿ ನೀಡಿ ವಾಪಸಾದ ಕೆಲವು ಗಂಟೆ ಬಳಿಕ ಅವರ ಮನೆಗೆ ಎನ್​ಸಿಬಿ ತಂಡ ಭೇಟಿ ನೀಡಿತ್ತು.

ನಟಿ ಅನನ್ಯ ಪಾಂಡೆ ಲ್ಯಾಪ್​ಟಾಪ್​, ಮೊಬೈಲ್​ ವಶ
ಡ್ರಗ್ಸ್​ ಸೇವನೆ ಪ್ರಕರಣ ಆರೋಪಿಗಳ ವಾಟ್ಸ್​ಆ್ಯಪ್​ ಚಾಟ್​ನಲ್ಲಿ ಬಾಲಿವುಡ್​ ಹಿರಿಯ ನಟ ಚುಂಕಿ ಪಾಂಡೆ ಪುತ್ರಿ ಅನನ್ಯ ಪಾಂಡೆ ಹೆಸರು ಮೇಲಿಂದ ಮೇಲೆ ಕಾಣಿಸಿರುವ ಕಾರಣ ಎನ್​ಸಿಬಿ ತಂಡ ನಟಿ ಅನನ್ಯ ಪಾಂಡೆ ಮನೆಯಲ್ಲಿ ಶೋಧ ನಡೆಸಿದೆ. ಆಕೆಯ ಲ್ಯಾಪ್​ಟಾಪ್​, ಮೊಬೈಲ್​ಗಳನ್ನು ಜಪ್ತಿ ಮಾಡಿ ಕೊಂಡೊಯ್ದಿದೆ. ಜತೆಗೆ ಅನನ್ಯಳನ್ನು ತನ್ನ ಕಚೇರಿಯಲ್ಲಿ ವಿಚಾರಣೆ ನಡೆಸಿದೆ. ಮಗಳ ಜತೆಗೆ ಚುಂಕಿ ಪಾಂಡೆ ಕೂಡ ಎನ್​ಸಿಬಿ ಕಚೇರಿಗೆ ಬಂದಿದ್ದರು.

NCB Says no raid on Sharukh Khan House