ಒಳಾಂಗಣ ವ್ಯಾಯಾಮ - ಹೊರಾಂಗಣ ವ್ಯಾಯಾಮ: ಯಾವುದು ಉತ್ತಮ?

ಮಧುಮೇಹ, ಬೊಜ್ಜು, ಹೃದಯದ ತೊಂದರೆ ಸೇರಿದಂತೆ ಅನೇಕ ಆರೋಗ್ಯ ಸಮಸ್ಯೆಗಳ ನಿವಾರಣೆಗೆ ವ್ಯಾಯಾಮ ಒಂದು ಉತ್ತಮ ಮಾರ್ಗ. ವ್ಯಾಯಾಮ ಮಾಡುವುದರಿಂದ ಮಾನಸಿಕ ಆರೋಗ್ಯವೂ ವೃದ್ಧಿಯಾಗುತ್ತದೆ.

ಕೋವಿಡ್ ಸಾಂಕ್ರಾಮಿಕದಿಂದಾಗಿ ನಗರ ಪ್ರದೇಶಗಳಲ್ಲಿ ಹಾಗೂ ಪಟ್ಟಣಗಳಲ್ಲಿ ಜನರು ಒಳಾಂಗಣ ವ್ಯಾಯಾಮ ಅಥವಾ ಮನೆಯೊಳಗೆ ವ್ಯಾಯಾಮ ಮಾಡಬೇಕಾದ ಸನ್ನಿವೇಶ ಸೃಷ್ಟಿಯಾಗಿತ್ತು. ಆದರೆ ಈಗೀಗ ಜನಜೀವನ ಸಹಜ ಸ್ಥಿತಿಗೆ ಮರಳುತ್ತಿರುವುದರಿಂದ ಹಲವರಲ್ಲಿ ಮತ್ತೆ ಗೊಂದಲ ಶುರುವಾಗಿದೆ. ಮನೆಯೊಳಗೆ ಅಥವಾ ಜಿಮ್‌ಗಳಲ್ಲೇ ವ್ಯಾಯಾಮ ಮಾಡುವುದು ಉತ್ತಮವೇ ಅಥವಾ ಹೊರಾಂಗಣ ವ್ಯಾಯಾಮ ಒಳ್ಳೆಯದೇ ಎಂಬ ಪ್ರಶ್ನೆ ಮೂಡಲಾರಂಭಿಸಿದೆ. ಈ ಎರಡೂ ವಿಧಾನದ ವ್ಯಾಯಾಮಗಳಿಂದಲೂ ಶರೀರಕ್ಕೆ ಒಳಿತಿದೆ. ಆದರೆ ಕೆಲವೊಂದು ಸಣ್ಣ ವ್ಯತ್ಯಾಸಗಳಿವೆ. ಆ ಕುರಿತು ಫಿಟ್ನೆಸ್ ತಜ್ಞರು ಹೀಗೆ ವಿವರಿಸುತ್ತಾರೆ;

ಹೊರಂಗಣ ವ್ಯಾಯಾಮ

ಲವಲವಿಕೆಗೆ ಸಹಕಾರಿ

ಹೊರಂಗಣ ವ್ಯಾಯಾಮ ಮಾಡುವುದರಿಂದ ಮನಸ್ಸು ಪ್ರಫುಲ್ಲವಾಗುತ್ತದೆ. ಸೂರ್ಯನ ಕಿರಣಗಳಿಗೆ ಮೈಯೊಡ್ಡುವುದರಿಂದ ಮನಸ್ಸನ್ನು ಲವಲವಿಕೆಯಿಂದಿರಿಸುವ ಹಾರ್ಮೋನುಗಳು ಚೆನ್ನಾಗಿ ಉತ್ಪತ್ತಿಯಾಗುತ್ತವೆ. ಚೆನ್ನಾಗಿ ಹಸಿವಾಗುವುದು, ಸೇವಿಸಿದ ಆಹಾರ ಪಚನವಾಗುವುದರ ಜತೆಗೆ ದೇಹದ ಚಯಾಪಚಯ ಪ್ರಕ್ರಿಯೆ ಚೆನ್ನಾಗಿರುತ್ತದೆ.

ವಿಟಮಿನ್ ಡಿ ಲಭ್ಯತೆ

ಹೊರಾಂಗಣ ವ್ಯಾಯಾಮದ ಸಂದರ್ಭ ಸೂರ್ಯನ ಬಿಸಿಲು ಮೈಗೆ ತಾಗುವುದರಿಂದ ದೇಹಕ್ಕೆ ಸಾಕಷ್ಟು ಪ್ರಮಾಣದಲ್ಲಿ ವಿಟಮಿನ್ ಡಿ ದೊರೆಯುತ್ತದೆ.

ಆನಂದದಾಯಕ…

ಜಿಮ್‌ನಲ್ಲಿ ಟ್ರೆಡ್‌ಮಿಲ್‌ನಲ್ಲಿ ಓಡುವುದರಿಂದ ಏಕತಾನತೆ ಮೂಡಬಹುದು. ಆದರೆ ಉದ್ಯಾನವನಗಳಲ್ಲಿ, ಬೀದಿಗಳಲ್ಲಿ ಓಡುವುದು ಒಂಥರಾ ಆನಂದದಾಯಕ ಅನುಭವ ನೀಡುತ್ತದೆ. ಹೊರಾಂಗಣ ವ್ಯಾಯಾಮದ ಕೆಲವೇ ಕೆಲವು ಸಮಸ್ಯೆಗಳೆಂದರೆ ಮಾಲಿನ್ಯ, ತಾಪಮಾನ ಇತ್ಯಾದಿ. ಆದರೆ ಇವುಗಳಿಗಿಂತಲೂ ಒಳಿತೇ ಹೆಚ್ಚು ಎನ್ನುತ್ತಾರೆ ತಜ್ಞರು.

ಒಳಾಂಗಣ ವ್ಯಾಯಾಮ

ಒಳಾಂಗಣ ವ್ಯಾಯಾಮವನ್ನು ಸರಳವಾಗಿ, ಸುಲಭವಾಗಿ ಮಾಡಬಹುದು. ವೃತ್ತಿಪರ ಫಿಟ್ನೆಸ್ ತಜ್ಞರ ಸಲಹೆಯೊಂದಿಗೆ ಅಥವಾ ಆನ್‌ಲೈನ್ ಮೂಲಕ ಸಲಹೆ ಸೂಚನೆಗಳನ್ನು ಪಡೆದುಕೊಂಡು ಕೂಡ ಒಳಾಂಗಣ ವ್ಯಾಯಾಮ ಮಾಡಬಹುದು. ಒಳಾಂಗಣ ವ್ಯಾಯಾಮದಲ್ಲಿ ಯೋಗಾಭ್ಯಾಸ ಹೆಚ್ಚು ಸೂಕ್ತವಾದದ್ದು.

ತರಬೇತುದಾರರ ನೆರವಿನಿಂದ ವ್ಯಾಯಾಮ ಮಾಡುವುದರಿಂದ ಹೆಚ್ಚು ಸಮರ್ಪಕವಾಗಿ ಮಾಡಲು ಅನುಕೂಲ. ಜಿಮ್‌ಗಳಲ್ಲಾದರೆ ಅತ್ಯಾಧುನಿಕ ಸೌಲಭ್ಯಗಳಿದ್ದು ನುರಿತ ತಜ್ಞರ ನೆರವಿನಿಂದ ವ್ಯಾಯಾಮ ಮಾಡಬಹುದು. ಇದು ಕೂಡ ಆರೋಗ್ಯದ ದೃಷ್ಟಿಯಿಂದ ಒಳ್ಳೆಯದೇ ಎನ್ನುತ್ತಾರೆ ತಜ್ಞರು.