ತುಪ್ಪದ ಹುಡುಗಿ ಎಂದೇ ಖ್ಯಾತರಾಗಿರುವ ನಟಿ ರಾಗಿಣಿ ದ್ವಿವೇದಿ ಸದ್ಯ ಬ್ಯುಸಿಯಾಗಿದ್ದಾರೆ. ಇತ್ತೀಚಿಗಷ್ಟೆ ಹೊಸ ಸಿನಿಮಾವೊಂದಕ್ಕೆ ಸಹಿ ಹಾಕಿದ್ದಾರೆ. ವಿಶೇಷ ಅಂದರೆ, ಆ ಚಿತ್ರದ ಮುಹೂರ್ತ ಸದ್ದಿಲ್ಲದೆ ನಡೆದುಹೋಗಿದೆ. ಚಿತ್ರದ ಹೆಸರು ಸಾರಿ, ಕರ್ಮ ರಿಟರ್ನ್ಸ್ ಅಂತ. ಆಕ್ಷನ್, ಕ್ರೈಂ, ಥ್ರಿಲ್ಲರ್ – ಈ ಮೂರು ಈ ಚಿತ್ರಕಥೆಯಲ್ಲಿ ಹದವಾಗಿ ಮಿಳಿತಗೊಂಡಿರುವ ಚಿತ್ರವನ್ನು ಬ್ರಹ್ಮ ನಿರ್ದೇಶಿಸುತ್ತಿದ್ದಾರೆ. ರಾಗಿಣಿ ಅವರ ಪ್ರಕಾರ ಕರ್ಮ ರಿಟರ್ನ್ಸ್ ಚಿತ್ರದಲ್ಲಿ ದೊರೆತಿರುವುದು ಅದ್ಬುತವಾದ ಪಾತ್ರವಂತೆ.
ನನಗೆ ಈವರೆಗಿನ ಸಿನಿಮಾ ಪಯಣದಲ್ಲಿ ದೊರೆತ ಭಿನ್ನ ಪಾತ್ರ ಇದು. ಏಕೆಂದರೆ, ಎರಡು ಶೇಡ್ ಗಳಲ್ಲಿ ನಾನು ಕಾಣಿಸಿಕೊಳ್ಳಲಿದ್ದೀನಿ. ಜೊತೆಗೆ ಆಕ್ಷನ್ ಕೂಡ ಇದೆ. ಆಕ್ಷನ್ ಕಮ್ ಥ್ರಿಲ್ಲರ್ ಇರೋದರಿಂದ ಕಥೆಲಿ ಟ್ವಿಸ್ಟ್ ಗಳು ಇವೆ. ಬೇರೆ ಚಿತ್ರಕ್ಕಿಂತ ಭಿನ್ನವಾಗಿ ನನ್ನ ನೀವು ನೋಡಬಹುದು ಎಂದು ಹೆಮ್ಮೆಯಿಂದ ಹೇಳಿಕೊಳ್ಳುತ್ತಾರೆ ರಾಗಿಣಿ. ಈಚಿತ್ರವು ಕನ್ನಡದೊಂದಿಗೆ ಇಂಗ್ಲೀಷ್, ಹಿಂದಿ ಭಾಷೆಯಲ್ಲಿ ನಿರ್ಮಾಣವಾಗಲಿದೆ. ಜಗತ್ತಿನ ಎಲ್ಲ ಚಿತ್ರೋತ್ಸವಗಳಲ್ಲೂ ಕರ್ಮವನ್ನು ಪ್ರದರ್ಶಿಸುವ ಇರಾದೆ ಚಿತ್ರತಂಡಕ್ಕಿದೆ.
ಒಂದು ಮೂಲದ ಪ್ರಕಾರ ರಾಗಿಣಿ ಅವರ ಕೈಯಲ್ಲಿ ಇದಲ್ಲದೆ ಇನ್ನು ಮೂರು, ನಾಲ್ಕು ಚಿತ್ರಗಳಿವೆ. ಮುಂದಿನ ವಾರ ರಾಣಾ ಚಿತ್ರದ ಹಾಡಿನ ಶೂಟಿಂಗ್ ಕೂಡ ನಿಗದಿಯಾಗಿದೆ. ರಾಗಿಣಿ ಮುಖ್ಯಪಾತ್ರದಲ್ಲಿರುವ ಜಾನಿ ವಾಕರ್ ಚಿತ್ರ ಶೀಘ್ರದಲ್ಲಿಯೇ ಸೆಟ್ಟೇರಲಿದೆ. ಕೋವಿಡ್ ಕಾರಣದಿಂದ ಚಿತ್ರ ನಿರ್ಮಾಣ ಸ್ಥಗಿತ ಗೊಂಡಿದ್ದರಿಂದ ರಾಗಿಣಿ ಹೊಸ ಸಿನಿಮಾಗಳನ್ನು ಒಪ್ಪಿಕೊಂಡಿರಲಿಲ್ಲ. ಈಗ ರಾಗಿಣಿ ಬಿಡುವಿಲ್ಲದ ನಟಿಯಾಗಿದ್ದಾರೆ.
ಕರ್ಮ ರಿಟರ್ನ್ಸ್ ಚಿತ್ರಕ್ಕೆ ಸಂಗೀತ ರಾಜು ಎಮ್ಮಿಗನೂರು ಅವರದು. ಅಲ್ಟಿಮೇಟ್ ಶಿವು ಅವರ ಸಾಹಸವಿದೆ. ರಾಗಿಣಿ ಜೊತೆ ರಣವೀರ್, ಯುಕ್ತ ಪೆರ್ವಿ, ಅಫ್ಜಲ್ ಮನೋಜ್ ಮುಂತಾದವರು ನಟಿಸುತ್ತಿದ್ದಾರೆ.
ಇದನ್ನೂ ಓದಿ: ಪ್ರತಿಭೆಗಳನ್ನು ಗುರುತಿಸುತ್ತಿದ್ದ ಅಪ್ಪು ಅಣ್ಣ: ಫ್ರೆಂಚ್ ಬಿರಿಯಾನಿ ಖ್ಯಾತಿಯ ನಟ ಡ್ಯಾನಿಷ್ ಭಾವುಕ ನುಡಿನಮನ
Discussion about this post