ಕ್ರೈಂ ಥ್ರಿಲ್ಲರ್ ವೆಬ್ ಸೀರಿಸ್‌ನಲ್ಲಿ ಕಾಣಿಸಿಕೊಳ್ಳಲಿದ್ದಾರೆ ರವೀನಾ ಟಂಡನ್

1990ರ ದಶಕದ ಮೋಹಕ ನಟಿ ರವೀನಾ ಟಂಡನ್ ಮತ್ತೆ ಬಣ್ಣಹಚ್ಚಿದ್ದಾರೆ. ಆದರೆ, ಈ ಭಾರಿ ಹಿರಿತೆರೆಗಲ್ಲ. ಡಿಜಿಟಲ್ ತೆರೆಗೆ. ಹೌದು, ರವೀನಾ ನಟಿಸಿರುವ ಅರಣ್ಯಕ್ ವೆಬ್ ಸೀರಿಸ್ ಡಿಸೆಂಬರ್ 10,2021ರಂದು ನೆಟ್‌ಫ್ಲಿಕ್ಸ್‌ನಲ್ಲಿ ಪ್ರಸಾರವಾಗಲಿದೆ.

‘ವೀಕ್ಷಕರೇ, ಲೈಟ್ಸ್, ಕ್ಯಾಮೆರ, ಆಕ್ಷನ್.. ರೆಡೀ. ರವೀನಾ ಟಂಡನ್ ಮತ್ತೆ ಬಣ್ಣದ ಲೋಕಕ್ಕೆ ವಾಪಸಾಗುತ್ತಿದ್ದಾರೆ. ಇಷ್ಟುದಿನ ಗೌಪ್ಯವಾಗಿಟ್ಟಿದ್ದ ವಿಷಯ ಇವತ್ತು ಹೊರಬಂದಿದೆ. ಡಿಸೆಂಬರ್ ತಿಂಗಳಲ್ಲಿ ಆಕೆ ನಟಿಸಿರುವ ವೆಬ್ ಸೀರಿಸ್ ಪ್ರಸಾರಗೊಳ್ಳುತ್ತಿದೆ. ಸ್ವಾಗತಿಸಿ’ ಎಂದು ಬರೆದುಕೊಳ್ಳುವ ಮೂಲಕ ನೆಟ್‌ಫ್ಲಿಕ್ಸ್ ಸಂಸ್ಥೆ ತನ್ನ ಅಧಿಕೃತ ಸಾಮಾಜಿಕ ಜಾಲತಾಣದಲ್ಲಿ ಟಂಡನ್ ಆಗಮನವನ್ನು ಸಂಭ್ರಮಿಸಿದೆ.

ಟಂಡನ್ ಅಭಿನಯಸಿರುವ ವೆಬ್ ಸೀರಿಸ್ ಕ್ರೈಂ ಥ್ರಿಲ್ಲರ್ ಕಥಾವಸ್ತುವನ್ನು ಒಳಗೊಂಡಿದೆ. ಮಂಜಿನ ನಗರಿಗೆ ಪ್ರಯಾಣಿಕನಾಗಿ ಬಂದು ನಾಪತ್ತೆಯಾಗುವ ಒರ್ವ ಮಧ್ಯವಯಸ್ಕ ವಿದೇಶಿ ಪ್ರಜೆಯ ಕಥೆ ಇದು. ಪೊಲೀಸ್ ಅಧಿಕಾರಿಯಾಗಿ ರವೀನಾ ಟಂಡನ್ ಅಭಿನಯಿಸಿದ್ದಾರೆ. ಹುಡುಕಾಟದಲ್ಲಿ ವಿದೇಶಿಗನ ಮೂಳೆಗಳು ದೊರೆಯುತ್ತವೆ. ಅಲ್ಲಿಂದ ಸರಣಿ ಕೊಲೆಗಳನ್ನು ಬೇಧಿಸಿಕೊಂಡು ಹೋಗುವುದೇ ಅರಣ್ಯಕ ವೆಬ್ ಸೀರೀಸ್‌ನ ತಿರುಳು.

47 ವರ್ಷದ ರವೀನಾ ಟಂಡನ್ 1990ರಿಂದ 2000 ದಶಕದ ತನಕ ಬಹುಬೇಡಿಕೆಯ ನಟಿಯಾಗಿದ್ದರು. ಮೊಹ್ರಾ, ಜಿದ್ದಿ, ಅಂದಾಜ್ ಅಪ್ನಾ ಅಪ್ನಾ, ದಮನ್ ಮುಂತಾದ ಚಿತ್ರಗಳಲ್ಲಿ ನಟಿಸಿದ್ದಾರೆ.

ಅರಣ್ಯಕ ವೆಬ್ ಸರಣಿಯನ್ನು, ರಮೇಶ್ ಚಿಪ್ಪಿ ಎಂಟರ್ ಟೈನ್ ಮೆಂಟ್ ಮತ್ತು ಕಪೂರ್ ಫಿಲ್ಮ್ಸ್ ನಿರ್ಮಾಣ ಮಾಡುತ್ತಿದೆ. ರೋಹನ್ ಚಿಪ್ಪಿ ನಿರೂಪಣೆಯಲ್ಲಿ ತೆರೆದುಕೊಳ್ಳುವ ವೆಬ್ ಸೀರೀಸ್ ಅನ್ನು ವಿನಯ್ ವೈಕುಲ್ ನಿರ್ದೇಶನ ಮಾಡಿದ್ದಾರೆ. ರವೀನಾ ಟಂಡನ್ ಜೊತೆಗೆ ಪರಮ್ ಬ್ರತಾ ಚಟರ್ಜಿ, ಅಸ್ತೋಶ್ ರಾಣಾ, ಮೇಘನಾ ಮಲ್ಲಿಕ್, ಜಾಕೀರ್ ಹುಸೇನ್ ಮುಂತಾದವರು ನಟಿಸಿದ್ದಾರೆ.

ಇದಲ್ಲದೇ ರವೀನಾಟಂಡನ್ ಕನ್ನಡದ ಯಶ್ ನಾಯಕ ನಟನಾಗಿರುವ, ಪ್ರಶಾಂತ್ ನೀಲ್ ನಿರ್ದೇಶನದ ಕೆಜಿಎಫ್ -2ನಲ್ಲಿ ಸಂಜಯ್ ದತ್, ಶ್ರೀನಿಧಿ ಶೆಟ್ಟಿ, ಪ್ರಕಾಶ್ ರಾಜ್ ಮುಂತಾದವರ ಜೊತೆ ನಟಿಸಿದ್ದಾರೆ. ಈ ಚಿತ್ರ ಏಪ್ರಿಲ್ 14, 2022ಕ್ಕೆ ಬಿಡುಗಡೆಗೊಳ್ಳಲಿದೆ.

ಇದನ್ನೂ ಓದಿ: ಸಂಚಾರಿ ವಿಜಯ್ ಅಭಿನಯದ ಆ್ಯಕ್ಟ್ 1978 ಸೇರಿ ಕನ್ನಡದ 4 ಸಿನಿಮಾ ಪನೋರಮಾಕ್ಕೆ