ಆರೋಗ್ಯವೇ ಭಾಗ್ಯ ಎಂಬುದು ಹಿರಿಯರ ಮಾತು. ಈ ಒತ್ತಡದ ಜೀವನದಲ್ಲಿ ಈ ಮಾತು ಹೆಚ್ಚು ಪ್ರಸ್ತುತ. ದೇಹಾರೋಗ್ಯವನ್ನು ಉತ್ತಮ ಸ್ಥಿತಿಯಲ್ಲಿ ಇರಿಸಿಕೊಳ್ಳಲು ಅನೇಕರು ಜಿಮ್ಗೆ ಹೋಗಿ ವ್ಯಾಯಾಮ ಮಾಡುತ್ತಾರೆ. ಇಂಥ ವ್ಯಾಯಾಮಕ್ಕಿಂತ ದಿನಾ 10 ಸಾವಿರ ಹೆಜ್ಜೆಯ ವೇಗದ ನಡಿಗೆ ಉತ್ತಮವೆಂದು ಕೆಲವರು ಹೇಳುತ್ತಾರೆ. ನಗರಗಳಲ್ಲಿ ಪಾರ್ಕ್, ಮೈದಾನ, ರಸ್ತೆಯೇ ನಡಿಗೆಯ ವೇದಿಕೆ ಆಗಿದೆ. ಈಗ ಗ್ರಾಮಗಳಲ್ಲೂ ದ್ವಿಚಕ್ರದ ಮೋಟಾರು ವಾಹನ ಹೆಚ್ಚಳವಾಗಿರುವುದರಿಂದ ನಡೆದಾಡುವುದು ಕಡಿಮೆ ಆಗಿದೆ. ಆದರೆ, ನಗರ ಪ್ರದೇಶದ ಜನರಿಗೆ ಹೋಲಿಸಿದರೆ ಹಳ್ಳಿಗರು ನಿತ್ಯದ ಕಾರ್ಯಕ್ಕೆ ಕಾಲ್ನಡಿಗೆಯನ್ನು ರೂಢಿಯಲ್ಲಿ ಇರಿಸಿಕೊಂಡಿದ್ದಾರೆ.
1. ಅಮೆರಿಕದ ಹೃದ್ರೋಗ ತಜ್ಞರ ಅಸೋಸಿಯೇಷನ್ ಪ್ರಕಾರ ವಾರಕ್ಕೆ 150 ನಿಮಿಷಗಳ ವ್ಯಾಯಾಮ ಅಗತ್ಯ. ಇದು ವ್ಯಾಯಾಮ ಮತ್ತು ನಡಿಗೆಯ ಮಿಶ್ರವಾಗಿರಬೇಕು. ವಾರದ ಐದು ದಿನ ತಲಾ 30 ನಿಮಿಷದಂತೆ ಜಿಮ್ ವರ್ಕ್ಔಟ್ ಅನ್ನು ಈ ಅಸೋಸಿಯೇಷನ್ ಶಿಫಾರಸು ಮಾಡಿದೆ. ವ್ಯಾಯಾಮ ಮಾಡಲು ಆಗದವರು 10 ಸಾವಿರ ಹೆಜ್ಜೆಯ ನಡಿಗೆಯನ್ನು ಮಾಡಬಹುದು. ಒಟ್ಟಾರೆ ಗುರಿ ದೇಹಾರೋಗ್ಯ ಕಾಪಾಡಿಕೊಳ್ಳುವುದಾಗಿದೆ. ಇದಕ್ಕೆ ಮಾರ್ಗ ಭಿನ್ನ ಅಷ್ಟೆ ಎನ್ನುತ್ತದೆ ಅಸೋಸಿಯೇಷನ್.
2. ನಿತ್ಯ 10 ಸಾವಿರ ಹೆಜ್ಜೆ ನಡೆದಾಡುವುದು ಸುಲಭದ ಗುರಿ. ಇದಕ್ಕಾಗಿ ವಾಯುವಿಹಾರ ಮಾಡಬೇಕೆಂದೇನೂ ಇಲ್ಲ. ಕಚೇರಿಗೆ ನಡೆದು ಹೋಗುವುದು. ಮಾರುಕಟ್ಟೆಗೆ ಕಾಲ್ನಡುಗೆಯಲ್ಲಿ ಹೋಗಿ ಬಂದರೂ ಆದೀತು. ಅಥವಾ ಮಕ್ಕಳೊಂದಿಗೆ ಆಟೋಟವಾದರೂ ಅಡ್ಡಿಯಿಲ್ಲ. ಸಂಧುಗಳನ್ನು ಆರೋಗ್ಯವಾಗಿಟ್ಟುಕೊಳ್ಳಲು ನಡಿಗೆ ಉತ್ತಮ ಕ್ರಮ. ವಾಯುವಿಹಾರ ಮಾಡುವುದರಿಂದ ಮಿದುಳಿನ ಕೋಶಗಳು ಜಾಗೃತವಾಗುತ್ತವೆ. ಅರಿವು ಮತ್ತು ಏಕಾಗ್ರತೆ ಹೆಚ್ಚಳ ಆಗುತ್ತದೆ. ಒತ್ತಡದಿಂದ ಮುಕ್ತಿ ಸಿಗುತ್ತದೆ. ತೂಕ ಇಳಿಸಿಕೊಳ್ಳಲು ಇದು ಸಹಕಾರಿ.
3. ವ್ಯಾಯಾಮ ಅಥವಾ 10 ಸಾವಿರ ಹೆಜ್ಜೆಯ ನಡಿಗೆ ಯಾವುದನ್ನೇ ಮಾಡಿದರೂ ಅದರಿಂದ ಹೃದಯದ ರಕ್ತನಾಳದ ಸಹಿಷ್ಣುತಾ ಶಕ್ತಿ ಹೆಚ್ಚುತ್ತದೆ. ಇದರಿಂದ ಚೇತೋಹಾರಿ ಜೀವನ ಶೈಲಿ ಸಿದ್ಧಿಸುತ್ತದೆ. ವಿವಿಧ ಕಾಯಿಲೆಗಳು ಅಮರಿಕೊಳ್ಳುವುದನ್ನು ತಡೆಯುತ್ತದೆ ಅಥವಾ ಮುಂದೂಡುತ್ತದೆ. ಸಂಧುಗಳಲ್ಲಿ ಸಮಸ್ಯೆ ಇರುವವರು ನಡೆಯುವುದು ಉತ್ತಮ. ದೇಹವನ್ನು ಹುರಿಗೊಳಿಸಬೇಕೆಂದು ಬಯಸುವ ಯುವ ಜನತೆ ಜಿಮ್ನಲ್ಲಿ ವರ್ಕ್ಔಟ್ ಮಾಡುವುದು ಲೇಸು. ಆದರೆ, ಉತ್ತಮ ಅಭ್ಯಾಸ ಕ್ರಮವೆಂದರೆ ಇವೆರಡನ್ನೂ ಸಮತೋಲನವಾಗಿ ಮಾಡುವುದು. ಅಥವಾ ದಿನ ಬಿಟ್ಟು ದಿನ ಮಾಡುವುದು.
4. ನಡಿಗೆಯಿಂದ ಹೃದ್ರೋಗದ ಸಮಸ್ಯೆ ಕಡಿಮೆ ಆಗುತ್ತದೆ. ಸೈಕಲ್ ತುಳಿಯುವುದು, ಈಜುವಿಕೆ, ಜಲ ವ್ಯಾಯಾಮವೂ ಹೃದಯ ಸಂಬಂಧಿ ಕಾಯಿಲೆಯನ್ನು ದೂರ ಮಾಡುತ್ತದೆ ಎಂಬುದು ತಜ್ಞರ ಅಭಿಪ್ರಾಯ.
ಇದನ್ನೂ ಓದಿ: Health: ವ್ಯಾಯಾಮಕ್ಕೂ ಮಾನಸಿಕ ಆರೋಗ್ಯಕ್ಕೂ ಸಂಬಂಧವಿರುವುದನ್ನು ನಿರೂಪಿಸಿದ ಅಧ್ಯಯನ
Discussion about this post