ದೆಹಲಿಯಲ್ಲಿ ಕೋವಿಡ್‌ಗಿಂತ ಡೆಂಗ್ಯೂ ಪ್ರಕರಣಗಳು ಅಧಿಕ; ವಹಿಸಬೇಕಿದೆ ಎಚ್ಚರ

ನವದೆಹಲಿ: ರಾಷ್ಟ್ರ ರಾಜಧಾನಿ ದೆಹಲಿಯಲ್ಲಿ ನಿತ್ಯ ಕೊರೊನಾ ಪ್ರಕರಣಗಳ ಸಂಖ್ಯೆ 30ರ ಆಸುಪಾಸಿನಲ್ಲಿದ್ದರೆ ಡೆಂಗ್ಯೂ ಪ್ರಕರಣಗಳು ಇದಕ್ಕೆ ದ್ವಿಗುಣ ಮಟ್ಟದಲ್ಲಿ ಇದೆ. ದೆಹಲಿಯಲ್ಲಿ ಒಟ್ಟಾರೆ 5,277 ಡೆಂಗ್ಯೂ ಪ್ರಕರಣಗಳು ಈವರೆಗೆ ಕಾಣಿಸಿಕೊಂಡಿದ್ದು, ಇದರಲ್ಲಿ 3,740 ಪ್ರಕರಣಗಳು ನವೆಂಬರ್ ಮೊದಲ ಪಾಕ್ಷಿಕದಲ್ಲಿ ವರದಿಯಾಗಿದೆ.

2016ರಲ್ಲಿ 4,431, 2017ರಲ್ಲಿ 4,726, 2018ರಲ್ಲಿ 2,798, 2019ರಲ್ಲಿ 2,036, 2020ರಲ್ಲಿ 1,072 ಡೆಂಗ್ಯೂ ಪ್ರಕರಣಗಳು ನವೆಂಬರ್‌ವರೆಗೆ ವ್ಯಕ್ತವಾಗಿದ್ದವು. 2015ರಲ್ಲಿ ಡೆಂಗ್ಯೂ ಪ್ರಕರಣ ತೀವ್ರತರವಾಗಿತ್ತು. ಅಕ್ಟೋಬರ್‌ ತಿಂಗಳಲ್ಲಿ 10,600 ದಾಟಿತ್ತು.

ಲೋಕನಾಯಕ ಜಯಪ್ರಕಾಶ್ ನಾರಾಯಣ (ಎಲ್ಎನ್ಜೆಪಿ) ಆಸ್ಪತ್ರೆ ಸೇರಿದಂತೆ ಇನ್ನಿತರ ಸರ್ಕಾರಿ ಆಸ್ಪತ್ರೆಯಲ್ಲಿ ಡೆಂಗ್ಯೂ ಪ್ರತಿ ದಿನ 20ರಿಂದ 25 ಡೆಂಗ್ಯೂ ಶಂಕೆ ಪ್ರಕರಣ ವ್ಯಕ್ತವಾಗುತ್ತಿದೆ. 40ರಿಂದ 50 ಮಂದಿ ಜ್ವರದಿಂದ ಬಳಲುತ್ತಿರುವವರು ಆಸ್ಪತ್ರೆಗಳಿಗೆ ಎಡತಾಕುತ್ತಿದ್ದಾರೆ.
ಕಳೆದ ನಾಲ್ಕೈದು ವರ್ಷಕ್ಕೆ ಹೋಲಿಸಿದರೆ ಈ ಸಾರಿ ಡೆಂಗ್ಯೂ ಪ್ರಕರಣ ಅಧಿಕವಾಗಿದೆ. ಮುಂಗಾರಿನ ಅವಧಿ ಈ ಸಾರಿ ವಿಸ್ತರಣೆ ಆಗಿರುವುದು ಮತ್ತು ಸೊಳ್ಳೆ ಕಾಟ ಹೆಚ್ಚಾಗಿರುವುದು ಇದಕ್ಕೆ ಕಾರಣ ಎಂದು ಎಲ್ಎನ್ಜೆಪಿ ಆಸ್ಪತ್ರೆಯ ನಿರ್ದೇಶಕ ಸುರೇಶ್ ಕುಮಾರ್ ಹೇಳಿದ್ದಾರೆ.

ಡೆಂಗ್ಯೂ ತಡೆಗೆ ಕ್ರಮ
ಡೆಂಗ್ಯೂ ಸೋಂಕು ತಡೆಯಲು ಪೂರ್ವ ದೆಹಲಿ ನಗರಪಾಲಿಕೆಯು ಯಮುನಾ ನದಿಯ ದಂಡೆಯಲ್ಲಿ ಡ್ರೋನ್ ಮೂಲಕ ಲಾರ್ವಿಸೈಡ್ ಸಿಂಪಡಿಸುತ್ತಿದೆ. ಇದರಿಂದ ಸೊಳ್ಳೆಯ ಸಂತಾನೋತ್ಪತ್ತಿಗೆ ತಡೆಯಾಗುತ್ತದೆ.

ಗರ್ಭಿಣಿಯರಲ್ಲಿ ಜಾಗ್ರತೆ ಅಗತ್ಯ
ಡೆಂಗ್ಯೂ ಸೋಂಕು ಮಾನವರಲ್ಲಿ ತೀವ್ರವಾದ ರಕ್ತಸ್ರಾವಕ್ಕೆ ಕಾರಣವಾಗುತ್ತದೆ. ಡೆಂಗ್ಯೂ ಸೋಂಕು ಪ್ರಸರಣ ಅಧಿಕವಾಗಿರುವ ಈ ಹೊತ್ತಿನಲ್ಲಿ ಗರ್ಭಿಣಿಯರು ಅತ್ಯಂತ ಜಾಗರೂಕರಾಗಿರಬೇಕು. ಗರ್ಭಿಣಿಯರಿಗೆ ಡೆಂಗ್ಯೂ ತಗುಲಿದರೆ ಭ್ರೂಣಕ್ಕೆ ಸೆರೋಟೈಪ್-2 ಸೋಂಕು ತಗುಲುವ ಸಂಭವ ಇರುತ್ತದೆ. ಇದು ವಿಕೋಪಕ್ಕೆ ಹೋದರೆ ಹುಟ್ಟುವ ಶಿಶುವಿನ ತೂಕ ಕಡಿಮೆ ಇರುತ್ತದೆ. ಮಾರಣಾಂತಿಕವೂ ಆಗಬಹುದು.

ಇದನ್ನೂ ಓದಿ: ಹೆಚ್ಚುತ್ತಿದೆ ಡೆಂಗ್ಯೂ ಪ್ರಕರಣ: ಸೋಂಕಿನಿಂದ ರಕ್ಷಣೆಗೆ ಏನೇನು ಮಾಡಬೇಕು?