ಬೆಂಗಳೂರು: ಭಾರತದಾದ್ಯಂತ ಯಶ್ ಅಭಿಮಾನಿಗಳು ತೀವ್ರ ಕುತೂಹಲದಿಂದ ಕಾಯುತ್ತಿರುವ ಕೆಜಿಎಫ್ 2 ಚಿತ್ರದ ಬಿಡುಗಡೆಯು ನೆನೆಗುದಿಗೆ ಬಿದ್ದಿದ್ದು ಚಿತ್ರದ ತಯಾರಕರು ಬಿಡುಗಡೆಯ ದಿನಾಂಕ ನಿರ್ಧರಿಸಲು ಸಾಧ್ಯವಾಗದೆ ಅಯೋಮಯ ಪರಿಸ್ಥಿತಿಯಲ್ಲದ್ದಾರೆ. ಚಿತ್ರ ತಂಡವು ಈ ಮೊದಲು ಏಪ್ರಿಲ್ 14, 2022ರಂದು ಚಿತ್ರವನ್ನು ಬಿಡುಗಡೆ ಮಾಡಲು ನಿರ್ಧರಿಸಿತ್ತು. ಆದರೆ ಅಂದೇ ಬಾಲಿವುಡ್ ನಟ ಅಮೀರ್ ಖಾನ್ ನಟನೆಯ ಲಾಲ್ಸಿಂಗ್ ಚಡ್ಧಾ ಚಿತ್ರವೂ ಬಿಡುಗಡೆಯಾಗುತ್ತಿದ್ದು ಕೆಜಿಎಫ್ 2 ಚಿತ್ರವೂ ಅಂದೇ ಬಿಡುಗಡೆಯಾದರೆ ಎರಡೂ ಚಿತ್ರಗಳ ಮಧ್ಯೆ ಸ್ಪರ್ಧೆ ಏರ್ಪಡಲಿದೆ. ಇದು ಕೆಜಿಎಫ್ 2 ಚಿತ್ರದ ಬಿಡುಗಡೆಗೆ ಎದುರಾಗಿರುವ ದೊಡ್ಡ ಸಮಸ್ಯೆಯಾಗಿದೆ.
ಅಮೀರ್ ಖಾನ್ ಇದಕ್ಕಾಗಿ ಕ್ಷಮೆ ಯಾಚಿಸಿದ್ದು ಎರಡೂ ಚಿತ್ರಗಳೂ ಬೇರೆ-ಬೇರೆ ರೀತಿಯ ಕಥಾಹಂದರಗಳನ್ನು ಒಳಗೊಂಡಿರುವುದರಿಂದ ಹಾಗೂ ಎರಡಕ್ಕೂ ಸಾಕಷ್ಟು ಸಂಖ್ಯೆಯ ವಿಭಿನ್ನ ಪ್ರೇಕ್ಷಕವೃಂದ ಇರುವುದರಿಂದ ವ್ಯವಹಾರದ ದೃಷ್ಟಿಯಲ್ಲಿ ದೊಡ್ಡ ಸಮಸ್ಯೆಯೇನೂ ಆಗದು ಎಂದು ತಿಳಿಸಿದ್ದಾರೆ. ಆದರೂ ಕೆಜಿಎಫ್ 2 ತಂಡವು ಮಾತ್ರ ಖಚಿತ ನಿರ್ಧಾರಕ್ಕೆ ಬರಲು ಸಾಧ್ಯವಾಗಿಲ್ಲ, ಮಾತ್ರವಲ್ಲ ತಂಡವು ಚಿತ್ರದ ಬಿಡುಗಡೆಯ ದಿನಾಂಕವನ್ನು ಏಪ್ರಿಲ್ 2022ರ ಅಂತ್ಯಕ್ಕೆ ಅಥವಾ ಮೇ 2022ರ ವರೆಗೆ ಮೂಂದೂಡುವ ಬಗ್ಗೆಯೂ ಯೋಚಿಸುತ್ತಿದೆ ಎನ್ನುವ ವದಂತಿ ಹಬ್ಬಿದೆ.
ಕೆಜಿಎಫ್ 1 ಚಿತ್ರವು ಬಿಡುಗಡೆಯಾದಾಗ ಭಾರತದಾದ್ಯಂತ ವಿವಿಧ ಭಾಷೆಗಳಲ್ಲಿ ಏಕಕಾಲದಲ್ಲಿ ಬಿಡುಗಡೆಯಾಗಿತ್ತಲ್ಲದೆ ಉತ್ತರ-ದಕ್ಷಿಣ ಭಾರತಗಳ ಅಂತರವಿಲ್ಲದೆ ಭರ್ಜರಿ ಯಶಸ್ಸನ್ನೂ ಕಂಡಿತ್ತು, ಅಲ್ಲದೇ ಯಶ್ ಅವರಿಗೂ ಈ ಚಿತ್ರವು ದೇಶಾದ್ಯಂತ ಕೋಟ್ಯಂತರ ಅಭಿಮಾನಿಗಳನ್ನು ಸೃಷ್ಟಿಸಿಕೊಟ್ಟಿತ್ತು. ಚಿತ್ರದ ಪ್ರಥಮ ಭಾಗದ ಯಶಸ್ಸು ಅಭಿಮಾನಗಳಲ್ಲಿ ಎರಡನೇ ಭಾಗದ ಬಗ್ಗೆ ಹೆಚ್ಚಿನ ನಿರೀಕ್ಷೆಯನ್ನೂ ಹಾಗೂ ಕಾತರವನ್ನೂ ಹುಟ್ಟುಹಾಕಿದ್ದಲ್ಲದೇ ಎರಡನೆಯ ಭಾಗದ ಹಕ್ಕುಗಳನ್ನು ದಾಖಲೆಯ ಮೊತ್ತಕ್ಕೆ ಮಾರಾಟ ಮಾಡಲು ಚಿತ್ರ ತಂಡಕ್ಕೆ ದಾರಿ ಮಾಡಿಕೊಟ್ಟಿತ್ತು.
ಚಿತ್ರವು ಭಾರತದಾದ್ಯಂತ ವಿವಿಧ ಭಾಷೆಗಳಲ್ಲಿ ಬಿಡುಗಡೆಯಾಗಬೇಕಾಗಿರುವುದರಿಂದ ಚಿತ್ರ ತಂಡವು ಈ ಹಂತದಲ್ಲಿ ಯಾವುದೇ ಅಪಾಯ ಮೈಮೇಲೆಳೆದುಕೊಳ್ಳಲು ಸಿದ್ಧವಾಗಿಲ್ಲ. ಕೋವಿಡ್ ಸಮಸ್ಯೆಯಿಂದ ಅನೇಕ ಹಿಂದಿ ಚಿತ್ರಗಳು ಬಿಡುಗಡೆಗೆ ಸಿದ್ಧವಾಗಿದ್ದು ಅವೆಲ್ಲವೂ ಮುಂದಿನ ದಿನಗಳಲ್ಲಿ ಬಿಡುಗಡೆಗೊಳ್ಳಲು ತುದಿಗಾಲಲ್ಲಿ ನಿಂತಿರುವುದರಿಂದ ಚಿತ್ರದ ಬಿಡುಗಡೆಗೆ ಸೂಕ್ತ ದಿನಾಂಕವನ್ನು ನಿಗದಿಪಡಿಸುವುದು ಕೆಜಿಎಫ್ 2 ಚಿತ್ರ ತಂಡಕ್ಕೆ ದೊಡ್ಡ ಸವಾಲಾಗಿ ಪರಿಣಮಿಸಿದೆ.
Release of much awaited pan-India film KGF 2 may get postponed
ಇದನ್ನೂ ಓದಿ: ಭಾರೀ ಸದ್ದು ಮಾಡುತ್ತಿದೆ “ಭಾವಚಿತ್ರ”ದ ಟ್ರೇಲರ್!
ಇದನ್ನೂ ಓದಿ: ಯಶ್ vs ಅಮೀರ್ ಖಾನ್: ಚಿತ್ರಪ್ರೇಮಿಗಳ ಆಯ್ಕೆ ಯಾವುದು?
Discussion about this post