ಕೋವಿಡ್ ವೈರಸ್ ಕಡಿಮೆ ಆಗಿದ್ದರೂ ಪೂರ್ಣವಾಗಿ ಹತೋಟಿಗೆ ಬಂದಿಲ್ಲ. ಈಗ ಓಮಿಕ್ರಾನ್ ಎಂಬ ಹೊಸ ಪ್ರಭೇದ ಕೂಡ ವ್ಯಾಪಕ ಆಗುತ್ತಿದೆ. ಇಂಥ ಸಂದರ್ಭದಲ್ಲಿ ಡೆಂಘಿ ಸೋಂಕು ತಗುಲಿದರೆ ಸಮಸ್ಯೆ ಬಿಗಡಾಯಿಸುವ ಸಾಧ್ಯತೆ ಹೆಚ್ಚಿದೆ. ಮಾರಣಾಂತಿಕವೂ ಆಗಬಹುದು.
‘ಈಡಿಸ್ ಈಜಿಪ್ಟಿಸ್’ ಎಂಬ ಹೆಣ್ಣು ಸೊಳ್ಳೆ ಮುಂಜಾನೆ ಮತ್ತು ಸೂರ್ಯ ಮುಳುಗುವ ಸಮಯದಲ್ಲಿ ಕಚ್ಚುವುದು ಹೆಚ್ಚು. ಇದರಿಂದ ಡೆಂಘಿ ಸೋಂಕು (ಡಿಇಎನ್ವಿ) ತಗುಲುತ್ತದೆ. ಡಿಇಎನ್ವಿಯಲ್ಲಿ ನಾಲ್ಕು ಸೆರೋಟೈಪ್ಸ್ಗಳನ್ನು ಗುರುತಿಸಲಾಗಿದೆ. (ಡಿಇಎನ್ವಿ- 1, 2, 3 ಮತ್ತು 4) ಪ್ರತಿ ಸೆರೋಟೈಪ್ ಬೇರೆ ಬೇರೆ ಇರುವ ಕಾರಣ ವ್ಯಕ್ತಿ ನಾಲ್ಕು ಸಾರಿ ಡೆಂಘಿ ತುತ್ತಾಗುವ ಸಂಭವ ಇರುತ್ತದೆ.
‘ಈಡಿಸ್ ಈಜಿಪ್ಟಿಸ್’ ಸೊಳ್ಳೆ ಕಚ್ಚಿದ ಐದಾರು ದಿನದಲ್ಲಿ ಸೋಂಕು ಬೆಳವಣಿಗೆ ಕಾಣುತ್ತದೆ. ಡೆಂಘಿ ಕಾಯಿಲೆಯಿಂದ ದೇಹ ಜರ್ಝರಿತವಾಗುತ್ತದೆ ಮತ್ತು ಇದರಿಂದ ಇನ್ನಿತರ ಕಾಯಿಲೆಗಳು ಅಮರಿಕೊಳ್ಳಬಹುದು. ಫ್ಲೂ ಜ್ವರ ಸರ್ವೇ ಸಾಮಾನ್ಯವಾಗಿ ಕಾಣುವ ಲಕ್ಷಣ. ಕೆಲವರಿಗೆ ತೀವ್ರತರಹವಾದ ಡೆಂಘಿ ಹೆಮರಾಜಿಕ್ ಜ್ವರ (ಡಿಎಚ್ಎಫ್) ಕಾಣಿಸಿಕೊಳ್ಳಬಹುದು. ಇದನ್ನು ಉಪೇಕ್ಷಿಸಿದರೆ ಮರಣ ಸಂಭವಿಸುವ ಸಾಧ್ಯತೆಯೂ ಇದೆ.
ಸೋಂಕು ನಿಯಂತ್ರಣ ಕೇಂದ್ರ (ಸಿಡಿಸಿ) ಮಾಹಿತಿ ಪ್ರಕಾರ, ವಾರ್ಷಿಕವಾಗಿ 40 ಕೋಟಿ ಜನರು ಡೆಂಘಿ ಸೋಂಕಿಗೆ ಈಡಾಗುತ್ತಾರೆ. 10 ಕೋಟಿ ಜನರು ತೀವ್ರವಾಗಿ ನರಳುತ್ತಾರೆ. 40 ಸಾವಿರ ಮಂದಿ ಡೆಂಘಿಯಿಂದ ಸಾಯುತ್ತಾರೆ. ಈ ಸಾರಿ 129 ದೇಶಗಳಲ್ಲಿ ಡೆಂಗಿ ಕಾಣಿಸಿಕೊಂಡಿದ್ದು, ಇದರಲ್ಲಿ ಶೇ. 70ರಷ್ಟು ರಾಷ್ಟ್ರಗಳ ಏಷ್ಯಾದಲ್ಲಿ ಇವೆ. ಭಾರತದಲ್ಲಿ ಸುಮಾರು ಒಂದು ಲಕ್ಷಕ್ಕೂ ಅಧಿಕ ಕೇಸ್ಗಳು ಇವೆ ಎನ್ನಲಾಗಿದೆ.
ದೆಹಲಿ, ಹರಿಯಾಣ, ಕೇರಳ, ಪಂಜಾಬ್, ರಾಜಸ್ಥಾನ, ತನಿಳುನಾಡು, ಉತ್ತರ ಪ್ರದೇಶ, ಉತ್ತರಾಖಂಡ, ಜಮ್ಮು ಮತ್ತು ಕಾಶ್ಮೀರಗಳು ಡೆಂಘಿ ಪೀಡಿತವಾಗಿವೆ.
ಡೆಂಘಿಗೆ ಚಿಕಿತ್ಸೆಗೆ ನಿಖರವಾದ ಮದ್ದು ಇಲ್ಲ. ಸೋಂಕು ಪೀಡಿತರಿಗೆ ಸಾಮಾನ್ಯ ಜ್ವರಕ್ಕೆ ನೀಡಲಾಗುವ ಔಷಧ ನೀಡಲಾಗುತ್ತದೆ. ವಿಶ್ರಾಂತಿ ಪಡೆಯುವಂತೆ ಸೂಚಿಸಲಾಗುತ್ತದೆ. ನಿರ್ಜಲೀಕರಣ ತಪ್ಪಿಸಲು ಹೆಚ್ಚು ನೀರು ಅಥವಾ ಹಣ್ಣಿನ ಪೇಯವನ್ನು ಸೇವಿಸುವಂತೆ ತಿಳಿಸಲಾಗುತ್ತದೆ. ಡೆಂಘಿ ಮಕ್ಕಳಲ್ಲಿ ಕಾಣಿಸುವುದು ಹೆಚ್ಚು. ಹೀಗಾಗಿ ಈ ಬಗ್ಗೆ ಜಾಗ್ರತೆ ವಹಿಸಬೇಕು. ಡೆಂಘಿ ಲಕ್ಷಣ ಇರುವ ಅನುಮಾನ ವ್ಯಕ್ತವಾದ ಕೂಡಲೇ ವೈದ್ಯರನ್ನು ಕಾಣಬೇಕು. ಡಿಎಚ್ಎಫ್ ಬಳಲುತ್ತಿದ್ದವರನ್ನು ಆಸ್ಪತ್ರೆಗೆ ದಾಖಲಿಸಿ ಚಿಕಿತ್ಸೆ ಕೊಡಿಸಬೇಕು.
ಕೋವಿಡ್ ಇದ್ದವರಿಗೆ ಡೆಂಘಿ ಬಂದರೆ ಜೀವಕ್ಕೆ ಅಪಾಯವಾಗುವ ಸಾಧ್ಯತೆ ಇರುತ್ತದೆ. ಕೋವಿಡ್ನಿಂದಾಗಿ ದೇಹದ ಪ್ರತಿರೋಧಕ ಶಕ್ತಿ ಕುಂದಿರುತ್ತಿದೆ. ಇಂಥ ಸಮಯದಲ್ಲಿ ಡೆಂಘಿ ಕಾಸಿಕೊಂಡರೆ ಪ್ರತಿರೋಧಕ ಶಕ್ತಿ ಮತ್ತಷ್ಟು ನಷ್ಟವಾಗಿ ಸಾವು ಸಂಭವಿಸಬಹುದು ಎನ್ನುತ್ತಾರೆ ತಜ್ಞರು.
ಇದನ್ನೂ ಓದಿ: ವಿಶ್ವ ಸೊಳ್ಳೆ ದಿನದ ವಿಶೇಷ
Discussion about this post