ಗೌರಿ ಲಂಕೇಶ್ ಜೀವನ ಆಧರಿಸಿ ನಿರ್ಮಾಣವಾಗುತ್ತಿದೆ ಸಾಕ್ಷ್ಯಚಿತ್ರ; ಕವಿತಾ ಲಂಕೇಶ್ ನಿರ್ದೇಶನ

ಬೆಂಗಳೂರು: ಹಿರಿಯ ಪತ್ರಕರ್ತೆ, ಹೋರಾಟಗಾರ್ತಿ ಗೌರಿ ಲಂಕೇಶ್ ಹತ್ಯೆಯಾಗಿ ಹಲವು ವರ್ಷಗಳೇ ಕಳೆದಿವೆ. ಗೌರಿ ಲಂಕೇಶ್ ಹತ್ಯೆ ಕರ್ನಾಟಕದಲ್ಲೊಂದೇ ಅಲ್ಲದೇ ಇಡೀ ದೇಶದಲ್ಲಿ, ವಿದೇಶಗಳಲ್ಲೂ ಸಂಚಲನ ಸೃಷ್ಟಿಸಿತ್ತು. ಪತ್ರಕರ್ತೆಯೊಬ್ಬರ ಕೊಲೆ ನಡೆದದ್ದು ರಾಜ್ಯ ಗೃಹ ಇಲಾಖೆಯಲ್ಲಿ ಬಿಗಿ ವಾತಾವರಣ ಸೃಷ್ಟಿಸಿತ್ತು. ಸದ್ಯ ಗೌರಿ ಲಂಕೇಶ್ ಅವರ ತಂಗಿ, ಪ್ರಸಿದ್ಧ ಚಲನಚಿತ್ರ ನಿರ್ದೇಶಕಿ ಕವಿತಾ ಲಂಕೇಶ್ ಗೌರಿ ಲಂಕೇಶ್ ಕುರಿತು ಸಾಕ್ಷ್ಯಚಿತ್ರವೊಂದು ನಿರ್ಮಿಸುತ್ತಿದ್ದಾರೆ ಈ ಡಾಕ್ಯುಮೆಂಟರಿ ಆರ್ಮಸ್ಟಡಾಂನ ಫ್ರೀ ಪ್ರೆಸ್ ಅನ್‌ಲಿಮಿಟೆಡ್ ಸಂಸ್ಥೆಯಿಂದ ಪತ್ರಕರ್ತರ ವಿರುದ್ಧ ನಡೆದ ಕ್ರೌರ್ಯದ ಕುರಿತು ನಿರ್ಮಿಸಿದ ಡಾಕ್ಯುಮೆಂಟರಿ ವಿಭಾಗದಲ್ಲಿ ಗುರುತಿಸಲ್ಪಟ್ಟ ಜಗತ್ತಿನ ನಾಲ್ಕೇ ನಾಲ್ಕು ಡಾಕ್ಯುಮೆಂಟರಿಗಳಲ್ಲಿ ಒಂದೆನಿಸಿದೆ.

ಕಳೆದ ವರ್ಷ ಫ್ರೀ ಪ್ರೆಸ್ ಅನ್‌ಲಿಮಿಟೆಡ್ ಸಂಸ್ಥೆ ಕರ್ತವ್ಯದಲ್ಲಿರುವಾಗ ಕ್ರೌರ್ಯದಿಂದ ಹತ್ಯೆಗೀಡಾದ ಅಥವಾ ಮೃತಪಟ್ಟ ಪತ್ರಕರ್ತರ ಕುರಿತು ಸಾಕ್ಷ್ಯಚಿತ್ರಗಳನ್ನು ಆಹ್ವಾನಿಸಿತ್ತು. ಜಗತ್ತಿನ ವಿವಿಧ ದೇಶಗಳಿಂದ ಒಟ್ಟು ಮುನ್ನೂರು ಸಾಕ್ಷ್ಯಚಿತ್ರಗಳು ಸಲ್ಲಿಕೆಯಾಗಿದ್ದವು. ಅವುಗಳ ಪೈಕಿ ಕೇವಲ ನಾಲ್ಕು ಡಾಕ್ಯುಮೆಂಟರಿಗಳನ್ನು ಆಯ್ಕೆಮಾಡಲಾಗಿದೆ. ಅವುಗಳಲ್ಲ ಕವಿತಾ ಲಂಕೇಶ್ ನಿರ್ಮಿಸುತ್ತಿರುವ ಗೌರಿ ಲಂಕೇಶ್ ಕುರಿತಾದ ಸಾಕ್ಷ್ಯಚಿತ್ರವೂ ಒಂದಾಗಿದೆ.

ಸೆಪ್ಟೆಂಬರ್ 5, 2017ರಂದ ಗೌರಿ ಲಂಕೇಶ್ ಅವರು ಬೆಂಗಳೂರಿನ ರಾಜರಾಜೇಶ್ವರಿ ನಗರದಲ್ಲಿರುವ ತಮ್ಮ ಮನೆಯಲ್ಲಿಯೇ ಅಪರಿಚಿತ ದಾಳಿಕೋರರಿಂದ ಹತ್ಯೆಗೀಡಾಗಿದ್ದರು. ಆಗ ರಾಜ್ಯದಲ್ಲಿ ಅಸ್ತಿತ್ವದಲ್ಲಿದ್ದ ಸಿದ್ದರಾಮಯ್ಯ ಸರ್ಕಾರ ಪ್ರಕರಣದ ತನಿಖೆಯನ್ನು ಎಸ್‌ಐಟಿ ತನಿಖೆಗೆ ವಹಿಸಿತ್ತು. ತನಿಖೆ ನಡೆಸಿದ ಎಸ್‌ಐಟಿ ಒಟ್ಟು 18 ಆರೋಪಿಗಳನ್ನು ಬಂಧಿಸಿತ್ತು. ಸದ್ಯ ಇನ್ನೂ ನಿರ್ಮಾಣ ಹಂತದಲ್ಲಿರುವ ಈ ಸಾಕ್ಷ್ಯಚಿತ್ರ 2022ರ ಹೊತ್ತಿಗೆ ಅಂತಿಮಗೊಳ್ಳಲಿದೆ ಎಂದು ಕವಿತಾ ಲಂಕೇಶ್ ದಿ ನ್ಯೂ ಇಂಡಿಯನ್ ಎಕ್ಸ್‌ಪ್ರೆಸ್‌ಗೆ ತಿಳಿಸಿದ್ದಾರೆ. ಜೊತೆಗೆ ನೆದರ್‌ಲ್ಯಾಂಡ್‌ನಲ್ಲಿ ನಡೆಯಲಿರುವ ಫಿಲ್ಮ್ ಫೆಸ್ಟಿವಲ್‌ ಒಂದರಲ್ಲಿ ಪ್ರೀಮಿಯರ್ ಶೋ ನಡೆಯಲಿದೆ.

ಈ ಸಾಕ್ಷ್ಯಚಿತ್ರದ ತಯಾರಿ ಪ್ರಕ್ರಿಯೆಯನ್ನು ಕೈಗೆತ್ತಿಕೊಂಡರೆ ಗೌರಿ ಲಂಕೇಶ್ ಕೊಲೆಯ ನೆನಪುಗಳು ಮರುಕಳಿಸಿ ಮತ್ತೆ ಖಿನ್ನತೆಯ ಮನಸ್ಥಿತಿಗೆ ಹೋಗುವ ಅಪಾಯವು ಇತ್ತು. ಆದರೆ ಗೌರಿ ಲಂಕೇಶ್ ಅವರ ಕುರಿತು ನಾನು ಸಾಕ್ಷ್ಯಚಿತ್ರ ನಿರ್ಮಿಸುವುದು ಈಕಾಲದ ಅನಿವಾರ್ಯತೆಯೂ ಆಗಿತ್ತು. ಅದನ್ನು ಮನಗಂಡು ಸತ್ಯದ ಪರ ನಿಲ್ಲಲು ಈ ಡಾಕ್ಯುಮೆಂಟರಿ ನಿರ್ಮಿಸುತ್ತಿದ್ದೇನೆ ಎಂದು ಸಹ ಕವಿತಾ ಲಂಕೇಶ್ ತಿಳಿಸಿದ್ದಾರೆ.

ಇದನ್ನೂ ಓದಿ: ಸೆಪ್ಟೆಂಬರ್ 5,  8220;ಗೌರಿ ಲಂಕೇಶ್ ದಿನ \;  ಕೆನಡಾದ ಬರ್ನಾಬಿಯಲ್ಲಿ ಘೋಷಣೆ

(Kavitha Lankesh makes Documentary on Gauri Lankesh will track her activism)