ಕಾಂಗ್ರೆಸ್​ ಸಂಸ್ಥಾಪನಾ ದಿನಾಚರಣೆಯಲ್ಲಿ ಬಾವುಟದ ಭಾನಗಡಿ!

ನವದೆಹಲಿ: ಸ್ವಾತಂತ್ರೋತ್ಸವ, ಗಣತಂತ್ರದ ದಿನ ಇನ್ನಿತರ ದಿನಾಚರಣೆಗಳಂದು ಹಾರಿಸುವ ಧ್ವಜಾರೋಹಣ ಶಿಸ್ತುಬದ್ಧವಾಗಿರಬೇಕು ಎಂದು ಅಪೇಕ್ಷಿಸಿ, ಇದಕ್ಕಾಗಿ ಹಿಂದಿನ ದಿನಗಳಲ್ಲಿ ತಾಲೀಮನ್ನೂ ನಡೆಸುತ್ತಾರೆ. ಆದರೂ ಒಮ್ಮೊಮ್ಮೆ ಭಾನಗಡಿಗಳು ಸಂಭವಿಸುತ್ತವೆ. ಇಂಥದ್ದೇ ಒಂದು ಅಚಾತುರ್ಯ ಕಾಂಗ್ರೆಸ್​ನ 137ನೇ ಸಂಸ್ಥಾಪನಾ ದಿನಾಚರಣೆಯಲ್ಲೂ ಆಗಿದೆ.

ದೆಹಲಿಯಲ್ಲಿರುವ ಕಾಂಗ್ರೆಸ್​ ಪ್ರಧಾನ ಕಚೇರಿಯಲ್ಲಿ ಮಂಗಳವಾರ ಆಯೋಜಿಸಿದ್ದ ಕಾರ್ಯಕ್ರಮದಲ್ಲಿ ಮೊದಲಿಗೆ ಪಕ್ಷದ ಅಧ್ಯಕ್ಷೆ ಸೋನಿಯಾ ಗಾಂಧಿ, ಕಾಂಗ್ರೆಸ್​ ಬಾವುಟವನ್ನು ಹಾರಿಸಲು ಹಗ್ಗ ಎಳೆದರು. ಆದರೆ, ಧ್ವಜ ತೆರೆದುಕೊಳ್ಳಲಿಲ್ಲ. ಆಗ, ಅವರ ಬಳಿ ನಿಂತಿದ್ದ ಸೇವಾದಳದ ಕಾರ್ಯಕರ್ತರೊಬ್ಬರು ಹಗ್ಗವನ್ನು ಜೋರಾಗಿ ಜಗ್ಗಿದರು. ಈ ರಭಸಕ್ಕೆ ಕಂಭಕ್ಕೆ ಕಟ್ಟಿದ್ದ ಬಾವುಟ ಹಗ್ಗದ ಸಮೇತ ಸೋನಿಯಾ ಗಾಂಧಿ ಮತ್ತು ಕಾರ್ಯಕರ್ತನ ಕೈ ಮೇಲೆ ಬಿದ್ದು ಆಭಾಸ ಉಂಟಾಯಿತು. ಇದಕ್ಕಿಂತ ಹೆಚ್ಚು ಮುಜುಗರ ಈ ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ಹರಿದಾಡಿ ಕಾಂಗ್ರೆಸ್​ ಮುಖಂಡರನ್ನು ಮತ್ತಷ್ಟು ಪೇಚಿಗೆ ಸಿಲುಕಿಸಿದೆ.

ಈ ಎಡವಟ್ಟನ್ನು ಸರಿಪಡಿಸಲು ತಕ್ಷಣ ಮುಂದಾದ ಮುಖಂಡರಾದ ಪವನ್​ ಬನ್ಸಾಲ್​, ಕೆ.ಸಿ.ವೇಣುಗೋಪಾಲ್​ ಬಾವುಟನ್ನು ಕೈಯಲ್ಲಿ ಹಿಡಿದು ಪ್ರದಶಿರ್ಸಿದರು. ನಂತರ ಕಾರ್ಯಕರ್ತನೊಬ್ಬ ಏಣಿ ಹತ್ತಿ ಕಂಭಕ್ಕೆ ಧ್ವಜವನ್ನು ಗಟ್ಟಿಯಾಗಿ ಬಿಗಿದ.

ಈ ಸಮಾರಂಭದಲ್ಲಿ ಪಕ್ಷದ ಪ್ರಧಾನ ಕಾರ್ಯದರ್ಶಿಗಳಾದ ರಾಹುಲ್​ ಗಾಂಧಿ, ಪ್ರಿಯಾಂಕಾ ಗಾಂಧಿ ವಾದ್ರಾ, ರಾಜ್ಯಸಭೆಯ ಪ್ರತಿಪಕ್ಷದ ನಾಯಕ ಎಂ.ಮಲ್ಲಿಕಾರ್ಜುನ ಖರ್ಗೆ ಇನ್ನಿತರ ಹಿರಿಯ ನಾಯಕರು ಪಾಲ್ಗೊಂಡಿದ್ದರು.

ಈ ಕಾರ್ಯಕ್ರಮಕ್ಕೂ ಮೊದಲು ಟ್ವೀಟ್​ ಮಾಡಿದ್ದ ರಾಹುಲ್​ ಗಾಂಧಿ, ಭಾರತದಲ್ಲಿ ಪ್ರಜಾತಂತ್ರಕ್ಕೆ ಬುನಾದಿ ಹಾಕಿದ್ದು ಕಾಂಗ್ರೆಸ್​. ಪಕ್ಷದ ಭವ್ಯ ಪರಂಪರೆ ಬಗ್ಗೆ ಹೆಮ್ಮೆ ಇದೆ. ಸಂಸ್ಥಾಪನಾ ದಿನದ ಶುಭಾಶಯ ಎಂದಿದ್ದರು.

ಭಾರತದ ಗ್ರ್ಯಾಂಡ್​ ಓಲ್ಡ್​ ಪಾರ್ಟಿ ಎಂಬ ಹಿರಿಮೆ ಹೊಂದಿರುವ ಕಾಂಗ್ರೆಸ್​ ಪಕ್ಷ 1885ರ ಡಿ.28ರಂದು ರಚನೆ ಆಯಿತು.

Flag falls off on Congress Foundation Day

ಇದನ್ನೂ ಓದಿ: Congress contribution: ಚಿಕ್ಕಮಗಳೂರು ಜಿಲ್ಲೆಗೆ ಕಾಂಗ್ರೆಸ್ ಕೊಡುಗೆ ಏನು?