ಪ್ರತಿ ಹಣ್ಣಿಗೂ ಅದರದ್ದೇ ಆದ ವಿಶೇಷ ಗುಣವಿದೆ. ಒಂದೊಂದು ಕಾಲದಲ್ಲಿ ಒಂದೊಂದು ಹಣ್ಣು ಬೆಳೆಯುತ್ತೆ. ಪ್ರತಿಯೊಂದು ಹಣ್ಣು ಸಹ ತನ್ನದೇ ಆದ ವೈಶಿಷ್ಟ್ಯತೆ ಹೊಂದಿದೆ. ಅಂತಹವುಗಳಲ್ಲಿ ಬೋರೆ ಹಣ್ಣು ಕೂಡ ಒಂದು. ನೋಡಲು ಚೆರಿ ಹಣ್ಣಿನಂತೆ ಕಾಣುವ ಈ ಹಣ್ಣನ್ನು,ಕನ್ನಡದಲ್ಲಿ ಎಲಚಿ ಹಣ್ಣು, ಬಾರೆ ಹಣ್ಣು, ಬೋರೆ ಹಣ್ಣು, ಬುಗುರಿ ಹಣ್ಣು ಎಂದು ಕರೆಯುತ್ತಾರೆ. ಬಡವರ ಸೇಬು ಎಂಬುದು ಇದರ ಅನ್ವರ್ಥ ನಾಮ.ಇಂಗ್ಲೀಷ್‌ನಲ್ಲಿ ಇದಕ್ಕೆ ಬ್ಹೇರ್ ಫ್ರೂಟ್ ಎನ್ನುತ್ತಾರೆ. ಇದನ್ನು ಭಾರತ, ಮ್ಯಾನ್ಮಾರ್, ಶ್ರೀಲಂಕಾ, ಅಫ್ಘಾನಿಸ್ತಾನ, ಚೀನಾ, ಪಾಕಿಸ್ತಾನದಲ್ಲೂ ಕಾಣಬಹುದು. ಇದನ್ನು ಕರ್ನಾಟಕದ ಬಹುತೇಕ ಎಲ್ಲಾ ಭಾಗಗಳಲ್ಲಿ ಬೆಳೆಯಲಾಗುತ್ತದೆ. ಈ ಹಣ್ಣಿಗೆ ರಾಮಾಯಣ ಕಾಲದಿಂದಲೂ ವಿಶೇಷವಾಗಿ ಸ್ಥಾನವಿದೆ. ರಾಮಭಕ್ತೆ ಶಬರಿ ತನ್ನ ಪ್ರಿಯ ರಾಮನಿಗೆ ಇದೆ ಹಣ್ಣನ್ನು ಕಚ್ಚಿ ರುಚಿ ನೋಡಿ ಕೊಟ್ಟಿದ್ದು ಒಂದು ದಂತ ಕಥೆ.
ನೋಡಲು ಹೇಗಿದೆ?
ಎಲಚಿ ಮರ 10-15ಮೀ. ಎತ್ತರಕ್ಕೆ ಬೆಳೆಯುತ್ತದೆ. ಇದು ಕುಳ್ಳಗಿರುತ್ತದೆ. ಇದರ ಕಾಂಡ ಕಪ್ಪುಬಣ್ಣದ ತೊಗಟೆಯಿಂದ ಆವೃತ ವಾಗಿದೆ. ತೊಗಟೆಯಲ್ಲಿ ಅಲ್ಲಲ್ಲಿ ಸೀಳುಗಳಿದ್ದು ಒಳಭಾಗ ಕೆಂಪಾಗಿರುತ್ತದೆ. ರೆಂಬೆಗಳು ಕೆಳಗೆ ತೂಗುತ್ತವೆ. ಇದರ ಹೂಗಳು ಸಣ್ಣವಾಗಿ ಹಸಿರು. ಹಳದಿ ಬಣ್ಣದಿಂದ ಕೂಡಿದ್ದು ಎಲೆ ಸಣ್ಣ ಬೇವಿನ ಎಲೆಯನ್ನು ಹೊಂದುತ್ತವೆ.ಹಣ್ಣಗಳು ದುಂಡಾಗಿ ಕಿತ್ತಳೆ ಅಥವಾ ಕೆಂಪು ಬಣ್ಣದಿಂದ ಕೂಡಿರುತ್ತದೆ. ಇದರ ಒಳಭಾಗ ಗಟ್ಟಿಯಾಗಿ ಸಿಹಿ ರುಚಿ ಇರುತ್ತದೆ.
ತಿನ್ನಲು ಮಾತ್ರವಲ್ಲ ಇದರ ತೊಗಟೆ, ಎಲೆ, ಬೇರು, ಹಣ್ಣು, ಬೀಜ ಎಲ್ಲವೂ ಔಷಧೀಯ ಗುಣಗಳನ್ನು ಹೊಂದಿದೆ. ಇದರಲ್ಲಿ ವಿಟಮಿನ್ ಎ, ಸಿ ಹಾಗೂ ಕಬ್ಬಿಣದ ಅಂಶ ಇದೆ.
ಮನೆ ಮದ್ದು
* ಎಲಚಿ ಎಲೆಗಳನ್ನು ನೀರಿನಲ್ಲಿ ರಾತ್ರಿ ನೆನೆಸಿ ಬೆಳಗ್ಗೆ ಖಾಲಿ ಹೊಟ್ಟೆಯಲ್ಲಿ ಕುಡಿದರೆ, ದೇಹದ ತೂಕ ಕಡಿಮೆ ಮಾಡಲು ಸಾಧ್ಯವಿದೆ.
*ಹಣ್ಣಿನ ರಸಕ್ಕೆ ಶುಂಠಿ , ಜೇಷ್ಠಮಧು ಮತ್ತು ಪುದಿನಗಳನ್ನು ಸೇರಿಸಿ ಸೇವಿಸಿದರೆ ಗಂಟಲ ಸೋಂಕು ಗುಣವಾಗುತ್ತದೆ.
* ಕೈ ಕಾಲುಗಳಿಗೆ ಉರಿ ಇದ್ದರೆ, ಎಲೆಗಳನ್ನು ರುಬ್ಬಿ ಹಚ್ಚಬೇಕು.
* ಎಲಚಿ ಹಣ್ಣನ್ನು ಸಮ ಪ್ರಮಾಣದ ಬೆಲ್ಲದ ಜೊತೆ ಸೇವಿಸಿದರೆ ವಾಕರಿಕೆ , ಮೈಕೈ ನೋವು ಕಡಿಮೆಯಾಗುತ್ತದೆ.
* ಅಜೀರ್ಣವಾಗಿದ್ದರೆ ಎಲಚಿ ಮರದ ಬೇರಿನ ಕಲ್ಕವನ್ನು 1 ಚಮಚ ಬಿಸಿ ನೀರಿನಲ್ಲಿ ಸೇವಿಸಿದರೆ ಅಜೀರ್ಣ ಕಡಿಮೆಯಾಗುತ್ತದೆ .
*ಎಲಚಿ ಹಣ್ಣು ರಕ್ತ ಶುದ್ಧಿಗೆ ಅತಿ ಉತ್ತಮ.
* ಎಲೆಗಳನ್ನು ರುಬ್ಬಿ ಹಚ್ಚಿದರೆ ಕೂದಲು ಉದುರುವುದು ನಿಲ್ಲುತ್ತದೆ.
* ಬೇರಿನ ಹುಡಿಯನ್ನು ಜೇನಿನ ಜೊತೆ ಸೇವಿಸಿದರೆ ಜ್ವರ ಕಡಿಮೆ ಆಗುತ್ತದೆ.
* ಎಲಚಿ ಹಣ್ಣಿನ ಸೇವನೆ ಜೀರ್ಣ ಶಕ್ತಿ ಹೆಚ್ಚಿಸುತ್ತದೆ.
* ಈ ಹಣ್ಣು ಹೃದ್ರೋಗಕ್ಕೂ ರಾಮಬಾಣ.
ಇದನ್ನೂ ಓದಿ: Android 13 Update: ಆ್ಯಂಡ್ರಾಯ್ಡ್ 13 ಅಪ್‌ಡೇಟ್ ಕುರಿತು ಮಾಹಿತಿ ಬಹಿರಂಗ
(Bare fruit history and health benefits in Kannada)
Discussion about this post