By-election: ಹಾನಗಲ್ ವಿಧಾನಸಭಾ ಕ್ಷೇತ್ರದ ಉಪ ಚುನಾವಣೆ-ಶಾಂತಿಯುತ ಮತದಾನ

ಹಾವೇರಿ:  ಹಾನಗಲ್ ವಿಧಾನಸಭಾ ಕ್ಷೇತ್ರದ ಉಪ ಚುನಾವಣೆ ಮತದಾನ ಪ್ರಕ್ರಿಯೆ ಶನಿವಾರ ಕ್ಷೇತ್ರ ವ್ಯಾಪ್ತಿಯಲ್ಲಿ ಶಾಂತಿಯುತವಾಗಿ ನಡೆದಿದೆ ಎಂದು ಜಿಲ್ಲಾಧಿಕಾರಿ ಸಂಜಯ ಶೆಟ್ಟೆಣ್ಣವರ ತಿಳಿಸಿದ್ದಾರೆ.

ಮೋಡಕವಿದ ವಾತಾವರಣದಲ್ಲಿ ಕೆಲವೆಡೆ ಉತ್ಸಾಹದಿಂದ ಮತದಾನದಲ್ಲಿ ಪಾಲ್ಗೊಂಡಿದ್ದು ಕಂಡುಬಂದಿತು. ಯುವ ಸಮೂಹ ಒಳಗೊಂಡಂತೆ ವಯೋವೃದ್ಧವರೆಗೆ ಎಲ್ಲ ಮತದಾರರು ಉತ್ಸಾಹದಿಂದ ತಮ್ಮ ಹಕ್ಕನ್ನು ಚಲಾಯಿಸಲು ಮತಗಟ್ಟೆಗಳಿಗೆ ಆಗಮಿಸುವ ದೃಶ್ಯ ಸಾಮಾನ್ಯವಾಗಿತ್ತು. ಬೆಳಿಗ್ಗೆ 9ರ ವೇಳೆಗೆ ಶೇ.8.77 ರಷ್ಟು, ಬೆಳಿಗ್ಗೆ 11 ಗಂಟೆ ವೇಳೆಗೆ ಶೇ.24.31 ರಷ್ಟು, ಮಧ್ಯಾಹ್ನ 3ರ ವೇಳೆಗೆ ಶೇ.62.72 ರಷ್ಟು, ಸಂಜೆ 5 ಗಂಟೆ ಶೇ.77.90 ರಷ್ಟು ಮತದಾನ ನಡೆದಿದ್ದು, ದಾಖಲೆ ಪ್ರಮಾಣ ಮತದಾನವಾಗಿದೆ.

ಬೆಳಿಗ್ಗೆ ಆಡೂರ, ಅಕ್ಕಿಆಲೂರ, ಹನುಮನಕೊಪ್ಪ, ಸಮ್ಮಸಗಿ, ಹಾನಗಲ್, ಮಾಸಣಕಟ್ಟೆ ಮತಗಟ್ಟೆಗಳಿಗೆ ಭೇಟಿ ನೀಡಿದ ಸಂದರ್ಭದಲ್ಲಿ ಬೆಳಿಗ್ಗೆ 10-30ರ ವೇಳೆಗೆ ಆಡೂರ ಮತಗಟ್ಟೆ ಸಂಖ್ಯೆ 63ರಲ್ಲಿ 931 ಮತದಾರರ ಪೈಕಿ 131 ಜನ, ಅಕ್ಕಿಆಲೂರಿನ ಬೂತ್ 24ರಲ್ಲಿ 1181ರ ಪೈಕಿ 210 ಜನ, ಹನುಮನಕೊಪ್ಪ ಮತಗಟ್ಟೆ ಸಂಖ್ಯೆ 156ರಲ್ಲಿ 1053 ಮತದಾರರ ಪೈಕಿ 283 ಮತದಾರರು, ಸಮ್ಮಸಗಿ 149ರ ಮತಗಟ್ಟೆಯ 1071 ಮತದಾರರ ಪೈಕಿ 248 ಜನ, ಹಾನಗಲ್ ಮತಗಟ್ಟೆ ಸಂಖ್ಯೆ-97 (ಸಖಿ) 1038 ಮತದಾರರ ಪೈಕಿ 374 ಮತದಾರರು, ಮತಗಟ್ಟೆ ಸಂಖ್ಯೆ 96ರ 780 ಮತದಾರರ ಪೈಕಿ 397 ಜನ ಮತ ಚಲಾಯಿಸಿದ್ದರು.

ಮಾಸನಕಟ್ಟಿ ಮತಗಟ್ಟೆ ಸಂಖ್ಯೆ 18ರಲ್ಲಿ 832 ಮತದಾರ ಪೈಕಿ 635 ಜನ, ಹಾಗೂ ಮತಗಟ್ಟೆ 16ರಲ್ಲಿ 987 ಮತದಾರರ ಪೈಕಿ 705 ಜನ, ಮತಗಟ್ಟೆ 17ರಲ್ಲಿ 838 ಮತದಾರರ ಪೈಕಿ 540 ಮತದಾರರು ತಮ್ಮ ಹಕ್ಕನ್ನು ಚಲಾಯಿಸಿದ್ದರು.

ಆಡೂರಿನ ಮತಗಟ್ಟೆ ಸಂಖ್ಯೆ 63ರಲ್ಲಿ ಮಾದರಿ ಮತಗಟ್ಟೆಯಾಗಿ ರೂಪಿಸಲಾಗಿತ್ತು. ವೃದ್ಧರಿಗೆ, ಹಿರಿಯರಿಗೆ, ಮಹಿಳೆಯರಿಗೆ ಆಸನ ವ್ಯವಸ್ಥೆ, ಶ್ಯಾಮಿಯಾನ ವ್ಯವಸ್ಥೆ ಕೈಗೊಳ್ಳಲಾಗಿತ್ತು. ಅಕ್ಕಿಆಲೂರಿನ 122ರ ಮತಗಟ್ಟೆಯನ್ನು ಸಖಿಮತಗಟ್ಟೆಯಲ್ಲಿ ಚಿಣ್ಣರಿಗಾಗಿ ಆಟಿಕೆ ವ್ಯವಸ್ಥೆ ಹಾಗೂ ಸೆಲ್ಫಿ ಕಾರ್ನರ್ ವ್ಯವಸ್ಥೆ ಮಾಡಲಾಗಿತ್ತು. ಪಿಂಕ್ ಬಣ್ಣದಿಂದ ಅಲಂಕಾರಗೊಳಿಸಿದ್ದು ವಿಶೇಷ ಗಮನ ಸೆಳೆಯಿತು.

ವಿವಿಧ ಮತಗಟ್ಟೆಗಳಲ್ಲಿ ವಿಕಲಚೇತನರ ಮತಗಟ್ಟೆಗಳಲ್ಲಿ ಹಿರಿಯ ನಾಗರಿಕರಿಗೆ ಹಾಗೂ ವಿಕಲಚೇತನರಿಗೆ ರ್ಯಾಂಪ್ ವ್ಯವಸ್ಥೆ ಹಾಗೂ ತ್ರಿಚಕ್ರ ಸೈಕಲ್ ವಾಹನ ವ್ಯವಸ್ಥೆ ಮಾಡಲಾಗಿತ್ತು. ಹಾನಗಲ್ ಪಟ್ಟಣದ ಮತಗಟ್ಟೆ 79ರಲ್ಲಿ ಸಖಿ ಮತಗಟ್ಟೆಯಾಗಿ ರೂಪಿಸಲಾಗಿತ್ತು. ಸೆಲ್ಫಿ ಕಾರ್ನರ್ ಸೇರಿದಂತೆ ಮಹಿಳಾ ಸಿಬ್ಬಂದಿಗಳನ್ನು ಪೂರ್ಣ ಪ್ರಮಾಣದಲ್ಲಿ ಕರ್ತವ್ಯಕ್ಕೆ ನಿಯೋಜಿಸಲಾಗಿತ್ತು.

ಪ್ರತಿ ಮತಗಟ್ಟೆಗಳಲ್ಲೂ ಕೋವಿಡ್ ಮಾರ್ಗಸೂಚಿಯಂತೆ ಮತಗಟ್ಟೆ ಪ್ರವೇಶ ದ್ವಾರಗಳಲ್ಲಿ ಹೆಲ್ಪ್ ಡೆಸ್ಕ್ ಸ್ಥಾಪಿಸಿ ಆಶಾ, ಆರೋಗ್ಯ, ಕಂದಾಯ ಸಿಬ್ಬಂದಿಗಳು ಮತದಾರರಿಗೆ ಸ್ಯಾನಿಟೈಸರ್ ಸಿಂಪರಣೆ, ಥರ್ಮಸ್ಕ್ಯಾನ್ ಬಳಸಿ ಜ್ವರ ತಪಾಸಣೆ, ಮಾಸ್ಕ್ ಧರಿಸಲು ಜಾಗೃತಿ, ಸಾಮಾಜಿಕ ಅಂತರ ಕಾಯ್ದುಕೊಳ್ಳಲು ಮತಗಟ್ಟೆ ಆವರಣದಲ್ಲಿ ನಿರ್ಮಾಣ ಮಾಡಲಾದ ಬಾಕ್ಸ್‍ಗಳಲ್ಲಿ ನಿಲ್ಲುವಂತೆ ಸೂಚನೆ ನೀಡುತ್ತಿರುವುದು ದೃಶ್ಯ ಸಾಮಾನ್ಯವಾಗಿತ್ತು.

ಸುಗಮ ಮತದಾನಕ್ಕಾಗಿ ಕ್ಷೇತ್ರದಾದ್ಯಂತ 263 ಮತಗಟ್ಟೆಗಳನ್ನು ಸ್ಥಾಪಿಸಲಾಗಿತ್ತು. ಈ ಪೈಕಿ 121 ಮತಟ್ಟೆಗಳಲ್ಲಿ ವೆಬ್‍ಕಾಸ್ಟಿಂಗ್ ವ್ಯವಸ್ಥೆಮಾಡಿ ಜಿಲ್ಲಾಧಿಕಾರಿಗಳು ಹಾಗೂ ಜಿಲ್ಲಾ ಚುನಾವಣಾಧಿಕಾರಿಗಳು ಮತಗಟ್ಟೆಯ ಚುಟವಟಿಕೆಗಳ ನೇರ ವೀಕ್ಷಣೆಗೆ ವ್ಯವಸ್ಥೆ ಮಾಡಲಾಗಿತ್ತು. ಸುಗಮ ಮತದಾನ ಪ್ರಕ್ರಿಯೆಗಾಗಿ 1155 ಸಿಬ್ಬಂದಿಗಳನ್ನು ನಿಯೋಜಿಸಲಾಗಿತ್ತು. ಬಿಗಿ ಪೊಲೀಸ್ ಪಹರೆಗಳನ್ನು ನಿಯೋಜಿಸಲಾಗಿತ್ತು. ಕ್ಷೇತ್ರದಾದ್ಯಂತ 1,05,525 ಪುರುಷ, 98,953 ಮಹಿಳೆಯರು ಹಾಗೂ ಇತರೆ 3 ಸೇರಿ 2,04,481 ಮತದಾರರ ಪೈಕಿ ಸಂಜೆ 5ರವೇಳೆಗೆ ಶೇ.77.90 ರಷ್ಟು ಮತದಾರರು ತಮ್ಮ ಹಕ್ಕನ್ನು ಚಲಾಯಿಸಿದ್ದರು.

ಕೇಂದ್ರ ಚುನಾವಣಾ ಆಯೋಗ ನಿಯೋಜಿತ ಸಾಮಾನ್ಯ ವೀಕ್ಷಕರಾದ ಡಾ.ಮಾಧವಿ ಖೋಡೆ ಚವಾರೆ ಅವರು ಸಮ್ಮಸಗಿ ಮತಗಟ್ಟೆ ಸೇರಿದಂತೆ ವಿವಿಧ ಮತಗಟ್ಟೆಗಳಿಗೆ ಭೇಟಿ ನೀಡಿ ಕೋವಿಡ್ ಮಾರ್ಗಸೂಚಿಗಳು ಹಾಗೂ ಮತದಾನ ಪ್ರಕ್ರಿಯೆ ಕುರಿತಂತೆ ವೀಕ್ಷಣೆ ನಡೆಸಿದರು. ಕೇಂದ್ರ ಪೊಲೀಸ್ ವೀಕ್ಷಕರಾದ ಐ.ಪಿ.ಎಸ್. ಅಧಿಕಾರಿ ಮಹೇಶ ಘುರೆ ಅವರು ಸೂಕ್ಷ್ಮ ಮತಗಟ್ಟೆ ಹಾಗೂ ದುರ್ಬಲ ಮತಗಟ್ಟೆಗಳಿಗೆ ಭೇಟಿ ನೀಡಿ ಕಾನೂನು ಸುವ್ಯವಸ್ಥೆ ಕುರಿತಂತೆ ಪರಿಶೀಲನೆ ನಡೆಸಿದರು. ಜಿಲ್ಲಾಧಿಕಾರಿ ಸಂಜಯ ಶೆಟ್ಟೆಣವರ ಹಾಗೂ ಜಿಲ್ಲಾ ಪಂಚಾಯತ್ ಮುಖ್ಯ ಕಾರ್ಯನಿರ್ವಹಣಾಧಿಕಾರಿ ಮಹಮ್ಮದ ರೋಷನ್ ಅವರು ಅಕ್ಕಿಆಲೂರ, ಕಲಕೇರಿ ಸೇರಿದಂತೆ ವಿವಿಧ ಮತಗಟ್ಟೆಗಳಿಗೆ ಭೇಟಿ ನೀಡಿ ಮತದಾನ ಪ್ರಕ್ರಿಯೆ ವೀಕ್ಷಿಸಿದರು.