Business Tips: ಒಂದು ಹೊಟೇಲ್ ಬ್ಯುಸಿನೆಸ್, ಅಥವಾ ಚಪ್ಪಲಿ ಅಂಗಡಿ, ಅಥವಾ ಬಟ್ಟೆ ಅಂಗಡಿ ಹೀಗೆ ಯಾವುದೇ ಉದ್ಯಮ ಆರಂಭಿಸುವಾಗ, ಆ ಉದ್ಯಮಿ ಕಷ್ಟಪಟ್ಟು ಹಣ ಹೊಂದಿಸಿ ಬಂಡವಾಳ ಹಾಕಿರುತ್ತಾನೆ. ಹಾಗೆ ಹಾಕಿದ ಬಂಡವಾಳಕ್ಕೆ ತಕ್ಕ ಲಾಭ ಬರಬೇಕೆಂದರೆ, ಉದ್ಯಮ ಚೆನ್ನಾಗಿ ಸಾಗಬೇಕು. ನಿಮ್ಮ ಅಂಗಡಿಗೆ ಹೆಚ್ಚೆಚ್ಚು ಗ್ರಾಹಕರು ಬಂದು ನಿಮ್ಮ ಪ್ರಾಡಕ್ಟ್ನ್ನ ಖರೀದಿ ಮಾಡಬೇಕು. ಹಾಗೇ ಹೆಚ್ಚೆಚ್ಚು ಗ್ರಾಹಕರು ಬರಬೇಕೆಂದರೆ, ನೀವು ಮಾರುವ ವಸ್ತುವಿನ ಗುಣಮಟ್ಟ ಉತ್ತಮವಾಗಿರಬೇಕು. ಇದರ ಜೊತೆಗೆ, ನಿಮ್ಮ ಅಂಗಡಿಯಲ್ಲಿ ಕೆಲಸ ಮಾಡುವವರ ವರ್ತನೆಯೂ ಉತ್ತಮವಾಗಿರಬೇಕು. ಈ ಬಗ್ಗೆ ಇನ್ನೂ ಹೆಚ್ಚಿನ ಮಾಹಿತಿಯನ್ನ ತಿಳಿಯೋಣ.
ನಿಮ್ಮ ಅಂಗಡಿಯಲ್ಲಿ ಕೆಲಸ ಮಾಡುವವರ ವರ್ತನೆ ಯಾಕೆ ಚೆನ್ನಾಗಿರಬೇಕು ಅಂದ್ರೆ, ಜನ ನಿಮ್ಮ ಅಂಗಡಿಯಲ್ಲಿ ಸಿಗುವ ವಸ್ತುವಿನ ಗುಣಮಟ್ಟದ ಜೊತೆಗೆ, ನಿಮ್ಮಲ್ಲಿ ಕೆಲಸ ಮಾಡುವ ಕೆಲಸಗಾರರ ವರ್ತನೆಯನ್ನೂ ಗಮನಿಸುತ್ತಾರೆ. ಈ ವೇಳೆ ನಿಮ್ಮ ಕೆಲಸಗಾರರ ವರ್ತನೆ ಉತ್ತಮವಾಗಿದ್ದಲ್ಲಿ, ಆ ಗ್ರಾಹಕರು ಮತ್ತೊಮ್ಮೆ ನಿಮ್ಮ ಅಂಗಡಿಗೆ ಬರುವ, ನಿಮ್ಮ ಅಂಗಡಿಯಲ್ಲಿ ಸಿಗುವ ಪ್ರಾಡೆಕ್ಟ್ ಖರೀದಿಸುವ ಮನಸ್ಸು ಮಾಡುತ್ತಾರೆ. ನಿಮ್ಮ ಅಂಗಡಿಯ ಬಗ್ಗೆ ಇತರರಿಗೂ ಹೇಳುತ್ತಾರೆ. ಆದ್ರೆ ನಿಮ್ಮ ಕೆಲಸಗಾರರ ವರ್ತನೆ ಚೆನ್ನಾಗಿರದಿದ್ದಲ್ಲಿ, ಮತ್ತೆ ಆ ಗ್ರಾಹಕ ನಿಮ್ಮ ಅಂಗಡಿಯ ಕಡೆ ಮುಖ ಮಾಡುವುದಿಲ್ಲ. ಇಷ್ಟೇ ಅಲ್ಲದೇ, ನಿಮ್ಮ ಅಂಗಡಿಯ ಬಗ್ಗೆ ಉತ್ತಮವಲ್ಲದ ಅಭಿಪ್ರಾಯ ಮೂಡಿ, ಇತರರಿಗೂ ನಿಮ್ಮ ಅಂಗಡಿಗೆ ಬರದಂತೆ ಹೇಳುತ್ತಾರೆ.
ಉದಾಹರಣೆಗೆ ನಿಮ್ಮದು ಬಟ್ಟೆ ಅಂಗಡಿ ಇದ್ರೆ, ಅಲ್ಲಿ ಬಂದ ಗ್ರಾಹಕರು ಸುಮಾರು ಬಟ್ಟೆಗಳನ್ನ ನೋಡಿ, ಕೊನೆಗೆ ಒಂದೇ ಬಟ್ಟೆ ಖರೀದಿ ಮಾಡಿ ಹೊರಡುತ್ತಾರೆ. ಆಗ ಕೆಲಸಗಾರನಿಗೆ ಸಿಟ್ಟು ಬರಬಹುದು. ಇಷ್ಟೆಲ್ಲಾ ಬಟ್ಟೆ ನೋಡಿ, ಒಂದೇ ಬಟ್ಟೆ ತೆಗೆದುಕೊಂಡು ಹೋಗಿದ್ದಾರೆ. ಇಲ್ಲಿ ಹರಡಿರುವ ಬಟ್ಟೆಯನ್ನ ಮತ್ತೆ ಜೋಡಿಸಿಡಬೇಕಲ್ಲಾ ಅಂತಾ ಆತನಿಗೆ ಬೇಸರವಾಗಬಹುದು. ಆದ್ರೆ ಅಂಥ ವೇಳೆ ಸಿಟ್ಟು, ಬೇಸರವನ್ನೆಲ್ಲ ಪಕ್ಕಕ್ಕಿಟ್ಟು ಕೆಲಸ ಮುಂದುವರಿಸಬೇಕು.
ಆದ್ರೆ ಕೆಲ ಅಂಗಡಿಗಳಲ್ಲಿ ಕೆಲಸಗಾರರು, ಇಂಥ ಗ್ರಾಹಕರು ಅಂಗಡಿಗೆ ಬಂದಾಗ, ಇವರು ಹೇಗೂ ಒಂದೇ ಜೋಡಿ ಬಟ್ಟೆ ಕೊಂಡುಕೊಳ್ತಾರಲ್ಲ. ಸುಮ್ಮನೆ ಹತ್ತು ಬಟ್ಟೆ ತೋರಿಸಿ, ಟೈಮ್ ಯಾಕೆ ವೇಸ್ಟ್ ಮಾಡಬೇಕು ಅಂತಾ ಕಡಿಮೆ ಕಲೆಕ್ಷನ್ಸ್ ತೋರಿಸಿ, ಕಳಿಸಿಬಿಡ್ತಾರೆ. ಆಗ ಬಂದ ಗ್ರಾಹಕರು ನಿರಾಸೆಯಾಗಿ ಹೋಗುತ್ತಾರೆ. ಆದ್ರೆ ಇದು ಇಲ್ಲಿಗೆ ನಿಲ್ಲುವುದಿಲ್ಲ. ಅವರು ತಮ್ಮ ಅಕ್ಕ- ಪಕ್ಕದ ಮನೆಯವರಿಗೆ ಅಥವಾ ಗೆಳೆಯರಿಗೆ ಈ ಬಗ್ಗೆ ಹೇಳುತ್ತಾರೆ. ಅಯ್ಯೋ ಆ ಅಂಗಡಿಗೆ ಹೋಗಬೇಡಿ, ಅಲ್ಲಿ ಸರಿಯಾದ ಕಲೆಕ್ಷನ್ಸ್ ಇಲ್ಲಾ. ಅದರ ಪಕ್ಕದ ಅಂಗಡಿ ಇದೆ ಅಲಾ ಅಲ್ಲಿ ಸೂಪರ್ ಕಲೆಕ್ಷನ್ಸ್ ಇದೆ. ಅಲ್ಲಿ ಹೋಗಿ ಅಂತಾ ಹೇಳುತ್ತಾರೆ.
ಹೀಗೆ ಬಾಯಿಂದ ಬಾಯಿಗೆ ಇಂಥ ಮಾತುಗಳು ಹರಡಿ ನಿಮ್ಮ ಅಂಗಡಿಗೆ ಬರಬೇಕಾದ ಲಾಭ ಬೇರೆ ಅಂಗಡಿಗೆ ಹೋಗುತ್ತದೆ. ಯಾಕಂದ್ರೆ ಅಲ್ಲಿ ಕೆಲಸ ಮಾಡುವ ಕೆಲಸಗಾರ ತಾಳ್ಮೆಯಿಂದ ಎಲ್ಲ ರೀತಿಯ ಬಟ್ಟೆಯನ್ನ ಗ್ರಾಹಕರಿಗೆ ತೋರಿಸುತ್ತಾನೆ. ಉತ್ತಮ ಕೆಲಸ ಮಾಡಿ, ಅಂಗಡಿಗೆ ಲಾಭ ತರುತ್ತಾನೆ. ಇದು ಬರೀ ಬಟ್ಟೆ ಅಂಗಡಿಯಲ್ಲಿ ಆಗುವ ತಪ್ಪಲ್ಲ, ಬದಲಾಗಿ ಹೊಟೇಲ್, ಪಾತ್ರೆ ಅಂಗಡಿ, ಹೀಗೆ ಮುಂತಾದ ಅಂಗಡಿಯಲ್ಲಿ ಇಂಥ ತಪ್ಪಾಗುತ್ತದೆ.
ನಾವು ನೀವು ಯಾವುದಾದರೂ ಹೊಟೇಲ್ಗೆ ಹೋದಾಗ, ಅಲ್ಲಿನ ಸಪ್ಲೈಯರ್ ಬೇಕಂತಲೇ ನಮ್ಮನ್ನು ನಿರ್ಲಕ್ಷಿಸಿದರೆ, ನೀವು ಮತ್ತೆ ಆ ಹೊಟೇಲ್ಗೆ ಹೋಗ್ತೀರಾ..? ಚಪ್ಪಲಿ ಅಂಗಡಿಗೆ ಹೋದಾಗ ಬಾರ್ಗೇನ್ ಮಾಡೋದು ಕಾಮನ್. ಹಂಗಂತಾ ಅಂಗಡಿಯವರು ರಫ್ ಆಗಿ ಮಾತನಾಡಿದರೆ ನೀವು ಮತ್ತೆ ಆ ಚಪ್ಪಲಿ ಅಂಗಡಿಗೆ ಹೋಗ್ತೀರಾ..? ಇಲ್ಲಾ ಖಂಡಿತ ನೀವಲ್ಲಿ ಹೋಗುವುದಿಲ್ಲ. ಆಗ ನೀವು ಯಾರಾದರೂ ಆ ಅಂಗಡಿಗೆ ಹೋಗುತ್ತೇನೆ ಅಂದಾಗ, ನಿಮಗಾದ ಅನುಭವವನ್ನು ಹೇಳುತ್ತೀರಾ. ಆಗ ಅವರು ಕೂಡ ಆ ಅಂಗಡಿಗೆ ಹೋಗದೇ, ಬೇರೆ ಅಂಗಡಿಗೆ ಹೋಗುತ್ತಾರೆ.
ಹೀಗೆ ಅಂಗಡಿ ಮಾಲೀಕನಿಗೆ ಬರಬೇಕಾದ ಲಾಭ, ಬರೀ ಬಾಯಿ ಮಾತಿನಿಂದಲೇ ಕೈ ತಪ್ಪಿ ಹೋಗುತ್ತದೆ. ಆದ್ದರಿಂದ ಬರೀ ಅಂಗಡಿಯ ಮಾಲೀಕನ ಮಾತು ಸಿಹಿಯಾಗಿದ್ದರೆ, ಸಾಲದು, ಅಲ್ಲಿನ ಕೆಲಸಗಾರರ ವರ್ತನೆಯೂ ಉತ್ತಮವಾಗಿರಬೇಕು. ಅಂಗಡಿಗೆ ಬಂದವರನ್ನ ನಗು ನಗುತ್ತ ಮಾತನಾಡಿಸಿದರೆ, ಅವರು ಮತ್ತೆ ನಿಮ್ಮ ಅಂಗಡಿಗೆ ಬರಲು ಇಚ್ಛಿಸುತ್ತಾರೆ. ನೀವು ಮಾರುವ ವಸ್ತುವಿನ ಗುಣಮಟ್ಟದ ಜೊತೆ, ಹೀಗೆ ನಗು ತುಂಬಿದ ಮುಖದ ಸ್ವಾಗತವೂ ನಿಮ್ಮ ಯಶಸ್ಸಿಗೆ ಕಾರಣವಾಗುತ್ತದೆ.
Discussion about this post