ಆರ್ಯನ್​ ಖಾನ್​ ಅಪಹರಣಕ್ಕೆ ಪಿತೂರಿ ಸಚಿವ ನವಾಬ್​ ಮಲಿಕ್​ ಹೊಸ ಆರೋಪ

ಮುಂಬೈ: ದಿನ ದಿನಕ್ಕೆ ಹೊಸ ತಿರುವು ಪಡೆಯುತ್ತಿರುವ ವಿಹಾರ ನೌಕೆಯಲ್ಲಿ ಡ್ರಗ್ಸ್​ ಸೇವಿಸಿದ ಪ್ರಕರಣದ ಸಂಬಂಧ ಮಹಾರಾಷ್ಟ್ರದ ಸಚಿವ ಮತ್ತು ಎನ್​ಸಿಪಿ ಮುಖಂಡ ನವಾಬ್​ ಮಲಿಕ್​ ಹೊಸ ಆರೋಪ ಮಾಡಿದ್ದಾರೆ. ಬಾಲಿವುಡ್​ ನಟ ಶಾರುಕ್​ ಖಾನ್​ ಪುತ್ರ ಆರ್ಯನ್​ ಖಾನ್​ನನ್ನು ಡ್ರಗ್ಸ್​ ಕೇಸ್​ನಲ್ಲಿ ಸಿಲುಕಿಸುವ ದೊಡ್ಡ ಸಂಚನ್ನು ಬಿಜೆಪಿ ನಾಯಕ ಮೋಹಿತ್​ ಕಾಂಬೋಜ್​ ನಡೆಸಿದ್ದಾರೆ. ಇದಕ್ಕೆ ಮಾದಕವಸ್ತು ನಿಯಂತ್ರಣ ದಳದ (ಎನ್​ಸಿಬಿ) ವಲಯ ನಿರ್ದೇಶಕ ಸಮೀರ್​ ವಾಂಖೆಡೆ ಸಾಥ್​ ನೀಡಿದ್ದಾರೆ ಎಂದು ಮಲಿಕ್​ ಭಾನುವಾರ ಸುದ್ದಿಗೋಷ್ಠಿಯಲ್ಲಿ ಆಪಾದಿಸಿದ್ದಾರೆ.

ಮೂಲತಃ ಇದು ಹಣಕ್ಕಾಗಿ ಆರ್ಯನ್​ ಖಾನ್​ರನ್ನು ಅಪಹರಿಸುವ ಪಿತೂರಿಯ ಪ್ರಕರಣ. ಇದರ ಸೂತ್ರಧಾರ ಬಿಜೆಪಿ ನಾಯಕ ಮೋಹಿತ್​ ಕಾಂಬೋಜ್​. ಆದರೆ, ಇದನ್ನು ಒಂದು ಸೆಲ್ಫಿ ಹಾಳು ಮಾಡಿತು ಎಂದಿದ್ದಾರೆ.
ಮುಂಬೈನಿಂದ ಗೋವಾಕ್ಕೆ ಅ.2ರಂದು ಹೋಗುತ್ತಿದ್ದ ಐಷಾರಾಮಿ ನೌಕೆಯಲ್ಲಿ ಪಯಣಿಸಲು ಆರ್ಯನ್​ ಖಾನ್​ ಟಿಕೆಟ್​ ಖರೀದಿಸಿರಲಿಲ್ಲ. ಆದರೆ, ಪ್ರತೀಕ್​ ಗಾಬಾ ಮತ್ತು ಅಮಿರ್​ ಫರ್ನೀಚರ್​ವಾಲಾ ಅವರ ಬಲವಂತದಿಂದಾಗಿ ಹೋಗಿದ್ದರು. ಮೋಹಿತ್​ ಕಾಂಬೋಜ್​ ಸೂಚನೆಯಂತೆ ಅವರು ಆರ್ಯನ್​ನನ್ನು ಕರೆತಂದಿದ್ದರು.

ಆರ್ಯನ್​ ನೌಕೆ ಬಂದ ಮೇಲೆ 25 ಕೋಟಿ ರೂ. ಬೇಡಿಕೆ ಇರಿಸಲಾಯಿತು. ಚೌಕಾಸಿ ನಡೆದು 18 ಕೋಟಿ ರೂ.ಗೆ ಕುದುರಿತು. 50 ಲಕ್ಷ ರೂ. ಮುಂಗಡವಾಗಿ ಪಡೆಯಲಾಯಿತು. ಈ ಮಧ್ಯೆ, ಖಾಸಗಿ ಪತ್ತೇದಾರ ಕೆ.ಪಿ.ಗೋಸಾವಿ, ಆರ್ಯನ್​ ಖಾನ್​ ಜತೆಗೆ ತೆಗೆದುಕೊಂಡ ಸೆಲ್ಫಿ ಚಿತ್ರ ಸಾಮಾಜಿಕ ಜಾಲತಾಣದಲ್ಲಿ ವೈರಲ್​ ಆಗಿ ಕಾಂಬೋಜ್​ ನಡೆಸಿದ ಪಿತೂರಿ ವಿಲವಾಯಿತು. ನಂತರ ಆರ್ಯನ್​ ಮತ್ತು ಇತರರನ್ನು ಡ್ರಗ್ಸ್​ ಸೇವನೆ ಪ್ರಕರಣದಲ್ಲಿ ಬಂಧಿಸುವ ನಾಟಕ ಆರಂಭವಾಯಿತು ಎಂದು ಮಲಿಕ್​ ಹೇಳಿದ್ದಾರೆ.

ಸಚಿವ ಅಸ್ಲಾಂ ಶೇಖ್​ ಅವರ ಪುತ್ರ ಖಾಶಿಸ್ ಖಾನ್​ರನ್ನೂ ಅಪಹರಣ ಮಾಡಲು ಹಡಗಿಗೆ ಕರೆತರಬೇಕೆಂಬ ಸಂಚನ್ನು ಮಾಡಲಾಗಿತ್ತು. ಈ ಮೂಲಕ ಮಹಾರಾಷ್ಟ್ರ ಸರ್ಕಾರಕ್ಕೆ ಅಪಮಾನ ಮಾಡುವ ಹುನ್ನಾರವನ್ನು ಕಾಂಬೋಜ್​ ಮಾಡಿದ್ದರು ಎಂದು ಮಲಿಕ್​ ತಿಳಿಸಿದ್ದಾರೆ.

ಕಾಗಕ್ಕ, ಗುಬ್ಬಕ್ಕನ ಕಥೆ
ಸಚಿವ ನವಾಬ್​ ಮಲಿಕ್​ ಆರೋಪವನ್ನು ಬಾಲಿಶ ಎಂದು ಹೇಳಿರುವ ಬಿಜೆಪಿ ಮುಖಂಡ ಮೋಹಿತ್​ ಕಾಂಬೋಜ್​, ಈ ಕಾಗಕ್ಕ, ಗುಬ್ಬಕ್ಕನ ಕಥೆ ನಂಬಲಾರ್ಹವೆ? ಇದರಲ್ಲಿ ಏನಾದರೂ ತರ್ಕ, ಕಾರ್ಯಾಕಾರಣ ಸಂಬಂಧ ಇದೆಯೇ? ಈ ಪ್ರಕರಣ ನಡೆದಾಗಿನಿಂದ ಮಲಿಕ್​, ಅಧಿಕಾರಿ ಸಮೀರ್​ ವಾಖೆಂಡೆ ಮತ್ತು ತಮ್ಮನ್ನು ಗುರಿಯಾಗಿಟ್ಟುಕೊಂಡು ಪುಂಖಾನುಪುಂಖ ಆರೋಪಗಳನ್ನು ಮಾಡುತ್ತಿದ್ದಾರೆ. ಇದು ನಟ ಶಾರುಕ್​ ಖಾನ್​ರಿಂದ ಹಣ ವಸೂಲಿ ಮಾಡಲು ಮಹಾರಾಷ್ಟ್ರದ ಸಚಿವರು ಹೂಡುತ್ತಿರುವ ಆಟ ಎಂದು ಮೋಹಿತ್​ ಪ್ರತ್ಯಾರೋಪ ಮಾಡಿದ್ದಾರೆ.

ಮಲಿಕ್​ ವಿರುದ್ಧ ಮಾನನಷ್ಟ ಮೊಕದ್ದಮೆ
ಮಹಾರಾಷ್ಟ್ರದ ಸಚಿವ ನವಾಬ್​ ಮಲಿಕ್​ ವಿರುದ್ಧ ಎನ್​ಸಿಪಿ ಅಧಿಕಾರಿ ಸಮೀರ್​ ವಾಂಖೆಡೆ ಅವರ ತಂದೆ ಧ್ಯಾನದೇವ್​ ಕಚ್ರುಜಿ ವಾಂಖೆಡೆ ಮಾನನಷ್ಟ ದಾವೆ ಹೂಡಿದ್ದಾರೆ. ಇಲ್ಲಸಲ್ಲದ ಆರೋಪ ಮಾಡಿ ತಮ್ಮ ಮಗ ಮತ್ತು ತಮ್ಮ ಕುಟುಂಬಕ್ಕೆ ಕೆಟ್ಟ ಹೆಸರು ಬರುವಂತೆ ಮಾಡುತ್ತಿರುವ ಅವರಿಂದ 1.25 ಕೋಟಿ ರೂಪಾಯಿ ಪರಿಹಾರ ಕೊಡಿಸಿಸುಂತೆ ಕೋರ್ಟ್​ಗೆ ಅರ್ಜಿ ಸಲ್ಲಿಸಿದ್ದಾರೆ. ಜತೆಗೆ ಪುತ್ರ ಸಮೀರ್​ ಮತ್ತು ತಮ್ಮ ಕುಟುಂಬದ ವಿರುದ್ಧ ಯಾವುದೇ ಹೇಳಿಕೆ, ಬರಹಗಳನ್ನು ಪ್ರಟಿಸದಂತೆ ತಡೆ ನೀಡಬೇಕು ಎಂದೂ ಮನವಿ ಮಾಡಿಕೊಂಡಿದ್ದಾರೆ.

Plan to kidnap Aran khan ruined by selfie Alleges Navab Malik

ಇದನ್ನೂ ಓದಿ: ಕಡೆಗೂ ಬಿಡುಗಡೆ: 28 ದಿನಗಳ ಬಳಿಕ ಮನೆಗೆ ಬಂದ ಆರ್ಯನ್ ಖಾನ್