ಪ್ರಭಾಸ್ ಬಂದರು ದಾರಿ ಬಿಡಿ…

ಬಾಹುಬಲಿ ಚಿತ್ರದ ಯಶಸ್ಸಿನ ನಂತರ ನಟ ಪ್ರಭಾಸ್ ಮಾರ್ಕೆಟ್ ಬದಲಾಗಿದೆ. ಇಡೀ ಭಾರತ ಚಿತ್ರರಂಗದಲ್ಲೇ ಅತಿ ಹೆಚ್ಚು ಸಂಭಾವನೆ ಪಡೆಯುವ ನಟ ಅನ್ನೋ ಹಿರಿಮೆ ಅವರಿಗಿದೆ. ಒಂದು ಚಿತ್ರಕ್ಕೆ 150 ಕೋಟಿ ಪಡೆಯುತ್ತಾರೆ ಅನ್ನೋ ಮಾತೂ ಇದೆ. ಇದು ರಜನೀಕಾಂತ್ ಪಡೆಯುವ ಸಂಭಾವನೆ ಎರಡು ಪಟ್ಟು ಎನ್ನುತ್ತಿವೆ ಸಿನಿಮಾ ಮಾರ್ಕೆಟ್. ಅದೇನೆ ಇರಲಿ, ಕನ್ನಡದ ನಟ ಯಶ್ ರಂತೆ ಯಶಸ್ಸನ್ನು ಗಳಿಸಿರುವ ಪ್ರಭಾಸ್ ಮುಂದೆ ಎಂಥ ಚಿತ್ರ ನಿರ್ಮಾಣ ಮಾಡುತ್ತಾರೆ ಅನ್ನೋ ಕುತೂಹಲಕ್ಕೆ ಮೊನ್ನೆ ತೆರೆ ಎಳೆದರು.

ಹೈದರಾಬಾದ್ ನ ರಾಮೋಜಿರಾವ್ ಫಿಲ್ಮ್ ಸಿಟಿಯಲ್ಲಿ ಅವರ ಹೊಸ ಚಿತ್ರ ರಾಧೆ ಶ್ಯಾಮ್ ಟ್ರೇಲರ್ ಬಿಡುಗಡೆಯಾಯಿತು. ವಿಶೇಷ ಅಂದರೆ, ಈ ಚಿತ್ರದ ಟ್ರೇಲರ್ ಬಿಡುಗಡೆ ಮಾಡಿದ್ದು ಮತ್ಯಾರು ಅಲ್ಲ, ಪ್ರಭಾಸ್ ಅಭಿಮಾನಿಗಳು. ಅದು ಹೇಗೆ ಅಂದರೆ, ಎಲ್ಲ ಅಭಿಮಾನಿಗಳು ತಮ್ಮ ಮೊಬೈಲ್ ಟಾರ್ಚ್ ಮೂಲಕ ದೊಡ್ಡ ಪರದೆಯ ಮೇಲೆ ಟ್ರೇಲರ್ ಬಿಡುಗಡೆಯಾಗುವಂತೆ ಮಾಡಿದರು.

ಟ್ರೇಲರ್ ನೋಡಿದವರ ಮನಸ್ಸಲ್ಲಿ ಬಾಲಿವುಡ್ ನ ಟೈಟಾನಿಕ್ ಸಿನಿಮಾದ ನೆನಪು ಮುಡುಗಟ್ಟಿತು. ಹಾಗಿತ್ತು, ಛಾಯಾಗ್ರಹಣದ ಕೈ ಚಳಕ. ಹಾಗಂತ ಆ ಸಿನಿಮಾಕ್ಕೂ ಈ ಸಿನಿಮಾಕ್ಕೂ ಸಂಬಂಧ ಇಲ್ಲ ಎಂದು ಆಮೇಲೆ ಚಿತ್ರ ತಂಡ ಘೋಷಿಸಿತು ಅನ್ನಿ.

ಇದು ಯುವಿ ಕ್ರಿಯೇಷನ್ ಎಂಬ ಸಿನಿಮಾ ಸಂಸ್ಥೆಯಿಂದ ನಿರ್ಮಾಣವಾಗುತ್ತಿರುವ ಚಿತ್ರ. ಯುವಿ ಕ್ರಿಯೇಷನ್ಸ್ ನ ರುವಾರಿ ನಟ ಪ್ರಭಾಸ್. ನಿರ್ಮಾಪಕ ವಂಶಿಕೃಷ್ಣ ರೆಡ್ಡಿ, ಪ್ರಮೋದ್ ಜೊತೆ ಸೇರಿ ಹುಟ್ಟಿಹಾಕಿರುವ ಸಂಸ್ಥೆ. ಈಗಾಗಲೇ 11 ಚಿತ್ರಗಳನ್ನು ನಿರ್ಮಾಣ ಮಾಡಿದೆ. ರಾಧೆ ಶ್ಯಾಮ್ 12ನೇ ಚಿತ್ರವಂತೆ.

ನಿರ್ದೇಶಕ ರಾಧ ಕೃಷ್ಣಕುಮಾರ್ ಹೇಳುವಂತೆ, ರಾಧೆ ಶ್ಯಾಮ ಚಿತ್ರದ ಕಥೆ ಬರೆಯಲು 18 ವರ್ಷ ತೆಗೆದುಕೊಂಡರಂತೆ. ಮೂರು ವರ್ಷ ಕೂತು ಚಿತ್ರಕಥೆ ಮಾಡಿದ್ದೇನೆ. ಇಡೀ ಚಿತ್ರದಲ್ಲಿ ಯುದ್ಧವಿದೆ. ಫೈಟ್ ಗಳು ಇಲ್ಲ. ಚಿತ್ರದಲ್ಲಿ ಪ್ರಭಾಸ್ ರನ್ನು ಭಿನ್ನವಾಗಿ ತೋರಿಸಿದ್ದೇನೆ ಎನ್ನುತ್ತಾರೆ ಕೃಷ್ಣಕುಮಾರ್.

ಹಾಗಂತ ಕಥೆ ಏನಿರಬಹುದು ಅಂದರೆ, ಹಸ್ತಮುದ್ರಿಕ ಪಂಡಿತನ ಸುತ್ತ ನಡೆಯುವ ಪ್ರೇಮಕಥೆಯಂತೆ. ಟ್ರೇಲರ್ ನಲ್ಲಿ ಇದಕ್ಕೆ ಸಾಕಷ್ಟು ಸಾಕ್ಷಿಗಳು ದೊರಕುತ್ತವೆ.

‘ಭಾರತದ ಎಲ್ಲ ಭಾಷೆಗಳಲ್ಲೂ ಈ ಸಿನಿಮಾ ಬಿಡುಗಡೆಯಾಗುತ್ತಿದೆ. ನೀವು ಕೇಳಿರದ, ನೋಡಿರದ ಪ್ರೇಮ ಕಥೆಯೊಂದು ಈ ಚಿತ್ರದಲ್ಲಿದೆ. ಹೊಸ ಕಥೆ, ಹೊಸ ಪ್ರತಿಭೆಗಳೊಂದಿಗೆ ಸಿನಿಮಾ ಮಾಡಿದ್ದೇವೆ’ ಎನ್ನುತ್ತಾರೆ ನಟ ಪ್ರಭಾಸ್.

Prabhas Upcoming film Radhe Shyam

ಇದನ್ನೂ ಓದಿ: 2022ರಲ್ಲೇ ಬೆಂಗಳೂರು ಸೇರಿ ಪ್ರಮುಖ ನಗರಗಳಲ್ಲಿ ಸಿಗಲಿದೆ 5G ಸೇವೆ