ಡ್ರಗ್ಸ್ ಪ್ರಕರಣದಲ್ಲಿ ಆರ್ಯನ್ ಖಾನ್ ಬಂಧನದ ನಂತರ ಪ್ರಥಮ ಬಾರಿಗೆ ಬಹಿರಂಗವಾಗಿ ಕಾಣಿಸಿಕೊಂಡ ಶಾರುಖ್

ಮುಂಬೈ: ಡ್ರಗ್ಸ್ ಸೇವನೆ ಆರೋಪದ ಮೇಲೆ ಇತ್ತೀಚೆಗೆ ಪೋಲೀಸರಿಂದ ಬಂಧಿಸಲ್ಪಟ್ಟ ಆರ್ಯನ್ ಖಾನ್‌ರನ್ನು ಭೇಟಿಯಾಗಲು ಶಾರುಖ್‌ ಖಾನ್ ಬುಧವಾರ (ಅ.20) ಮುಂಬೈನ ಆರ್ಥರ್‌ರಸ್ತೆ ಕಾರಾಗೃಹಕ್ಕೆ ಬಂದಿದ್ದರು. ಮಗನನ್ನು ಭೇಟಿಯಾಗಿ ಹೊರಡುವಾಗ ಅಲ್ಲಿದ್ದ ಮಹಿಳೆಯೊಬ್ಬರಿಗೆ ಹಾಗೂ ಜೈಲಿನ ಹೊರಗೆ ಕುಳಿತಿದ್ದ ಸಾರ್ವಜನಿಕರಿಗೆ ಶಾರುಖ್ ಕೈಮುಗಿದು ಅಭಿವಂದಿಸಿದರು.

ದೇಶದ ಮಾದಕವಸ್ತು ನಿಯಂತ್ರಣ ವಿಭಾಗವು ಮುಂಬೈನಿಂದ ಗೋವಾಕ್ಕೆ ತೆರಳುತ್ತಿದ್ದ ಹಡಗೊಂದರಲ್ಲಿ ನಡೆಯುತ್ತಿದ್ದ ಐಶಾರಾಮಿ ಪಾರ್ಟಿಯಲ್ಲಿ ಭಾಗವಹಿಸಿದ್ದ ಆರ್ಯನ್‌ ಖಾನ್‌ರನ್ನು ಬಂಧಿಸಿದ ನಂತರ ಮಾಧ್ಯಮಗಳಿಂದ ದೂರವಿದ್ದ ಶಾರುಖ್ ಇದೇ ಮೊದಲ ಬಾರಿಗೆ ಮಗನನ್ನು ಭೇಟಿಯಾಗಲು ಬಂದಾಗ ಸಾರ್ವಜನಿಕವಾಗಿ ಕಾಣಿಸಿಕೊಂಡರು. ಇದೇ ಸಮಯದಲ್ಲಿ ಮಾಧ್ಯಮ ವರದಿಗಾರರು ಶಾರುಖ್‌ರನ್ನು ಮಗನೊಂದಿಗಿನ ಭೇಟಿಯ ವಿವರಗಳ ಬಗ್ಗೆ ಪ್ರಶ್ನಿಸಲು ಪ್ರಯತ್ನಿಸಿದರೂ ಶಾರುಖ್ ಯಾವುದೇ ಉತ್ತರ ನೀಡದೇ ಅಲ್ಲಿಂದ ನಿರ್ಗಮಿಸಿದರು.

ಮುಂಬೈನ ವಿಶೇಷ ನ್ಯಾಯಾಲಯ ಕಳೆದ ಬುಧವಾರ ಆರ್ಯನ್ ಖಾನ್ ಮತ್ತವರ ಸಹಚರರಿಗೆ ಜಾಮೀನು ನೀಡಲು ನಿರಾಕರಿಸಿದ್ದನ್ನು ಇಲ್ಲಿ ಸ್ಮರಿಸಬಹುದಾಗಿದೆ.

ಚಿತ್ರ ನಿರ್ಮಾಪಕರುಗಳಾದ ರಾಹುಲ್ ಧೊಲಾಕಿಯ ಮತ್ತು ಹರ್ಷಲ್ ಮೆಹ್ತಾ ಆರ್ಯನ್ ಖಾನ್‌ರಿಗೆ ಜಾಮೀನು ನಿರಾಕರಿಸಿರುವುದನ್ನು ನಿರಾಶಾದಾಯಕ ಹಾಗೂ ನಿರ್ದಯತೆಯಿಂದ ಕೂಡಿರುವಂತಹದ್ದೆಂದು ಅಭಿಪ್ರಾಯ ಪಟ್ಟಿದ್ದಾರೆ. ಬಂಧನದ ಸಮಯದಲ್ಲಿ ಆರ್ಯನ್ ಖಾನ್‌ರ ಬಳಿ ಮಾದಕವಸ್ತುಗಳು ಸಿಗದೇ ಇದ್ದರೂ ಕೇವಲ ವಾಟ್ಸಾಪ್ ಸಂಭಾಷಣೆಗಳಿಂದ ಇದಕ್ಕೆ ಅಂತರರಾಷ್ಟ್ರೀಯ ಸಂಬಂಧವಿದೆಯೆಂದು ಹೇಳಿರುವ ಪರಿಶೋಧನಾ ಸಂಸ್ಥೆಯು ಇಲ್ಲಿಯವರೆಗೂ ಯಾವದೇ ಪ್ರಬಲ ಸಾಕ್ಷಿಯನ್ನು ನೀಡಲಾಗಿಲ್ಲವೇಕೆ ಎಂದು ರಾಹುಲ್ ಧೊಲಾಕಿಯಾ ತಮ್ಮ ಟ್ವೀಟ್‌ನಲ್ಲಿ ಪ್ರಶ್ನಿಸಿದ್ದಾರೆ.

ಆರ್ಯನ್ ಖಾನ್ ಬಂಧನದ ನಂತರ ಬಾಲಿವುಡ್‌ನ ಪ್ರಮುಖರಾದ ಸಲ್ಮಾನ್ ಖಾನ್, ಹೃತಿಕ್ ರೋಶನ್, ಝೋಯಾ ಆಖ್ತರ್, ಫರಾ ಖಾನ್, ಜಾನಿ ಲಿವರ್, ರವೀನಾ ಟಂಡನ್, ಹಾಗೂ ಪೂಜಾ ಭಟ್ ಮುಂತಾದವರು ಶಾರುಖ್ ಬೆಂಬಲಕ್ಕೆ ನಿಂತಿರುವುದನ್ನು ಇಲ್ಲಿ ಸ್ಮರಿಸಬಹುದಾಗಿದೆ.

Sharukh Khan visits son Aryan Khan in Mumbai’s Arthur Road Jail in his first appearance in public after Aryan Khan’s arrest

ಇದನ್ನೂ ಓದಿ: Viral Video: ಮುರಿದ ಮನಗಳನ್ನು ಬೆಸೆದ ಕೌನ್ ಬನೇಗಾ ಕರೋಡ್‌ಪತಿ

ಇದನ್ನೂ ಓದಿ: ಎನ್ ಸಿಬಿ ಮುಂದೆ ಆರ್ಯನ್ ಹೇಳಿಕೆ: ೪ ವರ್ಷದಿಂದ ಸತತ ಡ್ರಗ್ಸ್ ಸೇವನೆ