ಡಿಸೆಂಬರ್ 10 ರಿಂದ 17 ರವರೆಗೆ ಕೇರಳ ಅಂತಾರಾಷ್ಟ್ರೀಯ ಸಿನಿಮೋತ್ಸವ

ತಿರುವನಂತಪುರ: ಕೇರಳವು 26 ನೇ ಅಂತಾರಾಷ್ಟ್ರೀಯ ಚಲನಚಿತ್ರೋತ್ಸವ (international film festival) (ಐಎಫ್ಎಫ್ ಕೆ) (IFFK)ಕ್ಕೆ ಸಜ್ಜಾಗುತ್ತಿದೆ.

ಡಿಸೆಂಬರ್ 10 ರಿಂದ 17 ರವರೆಗೆ ಕೇರಳ ಚಲನಚಿತ್ರ ಅಕಾಡೆಮಿ ಮತ್ತು ರಾಜ್ಯ ಸಾಂಸ್ಕೃತಿಕ ಇಲಾಖೆ ಸಹಯೋಗದಲ್ಲಿ ಆಯೋಜಿಸಲಾಗುವ ಈ ಚಲನಚಿತ್ರೋತ್ಸವವು ತಿರುವನಂತಪುರದಲ್ಲಿ ನಡೆಯಲಿದೆ. ಬೇರೆ ಭಾರತೀಯ ಭಾಷೆಗಳು, ಅಂತಾರಾಷ್ಟ್ರೀಯ ಸ್ಪರ್ಧೆ, ಮಲಯಾಳಂ ಸಿನಿಮಾಗಳ ಸ್ಪರ್ಧೆಗೆ ಸಿನಿಮಾ ನಿರ್ದೇಶಕರು ಮತ್ತು ನಿರ್ಮಾಪಕರಿಂದ ಸಿನಿಮಾಗಳನ್ನು ಆಹ್ವಾನಿಸಲಾಗಿದೆ.

ಬೇರೆ ಭಾಷೆಯ ಚಲನಚಿತ್ರಗಳ ಸಲ್ಲಿಕೆಗೆ ಶುಕ್ರವಾರ (ಸೆ. 10, 2021) ಕಡೆ ದಿನಾಂಕ. ಮಲಯಾಳಂ ಚಿತ್ರಗಳನ್ನು ಸಲ್ಲಿಸಲು ಸೆಪ್ಟೆಂಬರ್ 30 ರವರೆಗೆ ಅವಕಾಶವಿದೆ. ಅಕ್ಟೋಬರ್ 20 ರಂದು ಆಯ್ಕೆಗೊಂಡ ಸಿನಿಮಾಗಳ ಪಟ್ಟಿ ಬಿಡುಗಡೆಯಾಗಲಿದೆ. ವರ್ಷದಿಂದ ವರ್ಷಕ್ಕೆ ಈ ಚಿತ್ರೋತ್ಸವ ಗುಣಮಟ್ಟದ ದೃಷ್ಟಿಯಿಂದ ಮೆಚ್ಚುಗೆ ಗಳಿಸುತ್ತಿದೆ. ಈ ಚಿತ್ರೋತ್ಸವದ ಮತ್ತೊಂದು ವಿಶೇಷವೆಂದರೆ, ಏಷ್ಯಾ, ಆಫ್ರಿಕಾ ಹಾಗೂ ಲ್ಯಾಟಿಕನ್ ಅಮೆರಿಕನ್ ದೇಶಗಳ ಸಿನಿಮಾಗಳಿಗೆ ಪ್ರತ್ಯೇಕ ಸ್ಪರ್ಧಾ ವಿಭಾಗವಿದೆ.

ಏಷ್ಯಾ, ಆಫ್ರಿಕಾ, ಲ್ಯಾಟಿಕನ್ ಅಮೆರಿಕ ದೇಶಗಳ ಸಿನಿಮಾ, ಮಲಯಾಳಂ ಸಿನಿಮಾ ಇಂದು ವಿಭಾಗದಲ್ಲಿ 14 ಸಿನಿಮಾಗಳನ್ನು ಆಯ್ಕೆ ಮಾಡಲಾಗುವುದು. ಈ ಪೈಕಿ ಉದಯೋನ್ಮುಖ ಚಿತ್ರ ನಿರ್ದೇಶಕರಿಗೆ ಅವಕಾಶ ಕಲ್ಪಿಸಲೆಂದೇ, ಆರು ಸಿನಿಮಾಗಳನ್ನು ಚೊಚ್ಚಲ ಅಥವಾ ಎರಡನೆ ಚಿತ್ರವನ್ನು ರೂಪಿಸುತ್ತಿರುವ ನಿರ್ದೇಶಕರಿಗೆ ಮೀಸಲಿಡಲಾಗಿದೆ. ಭಾರತೀಯ ಸಿನಿಮಾ ಇಂದು ವಿಭಾಗದಲ್ಲೂ ವಿವಿಧ ಭಾರತೀಯ ಭಾಷೆಗಳ 9 ಸಿನಿಮಾಗಳನ್ನು ಪರಿಗಣಿಸಲಾಗುವುದು.

ಸ್ಪರ್ಧಾ ವಿಭಾಗಗಳಲ್ಲದೇ, ಫೆಸ್ಟಿವಲ್ ಕಲೈಡೋಸ್ಕೋಪ್ (ಭಾರತೀಯ) ವಿಭಾಗದಲ್ಲೂ ಚಲನಚಿತ್ರಗಳು ಪ್ರದರ್ಶನಗೊಳ್ಳಲಿವೆ. ಇದರಲ್ಲಿ ಎಫ್ಐಎಪಿಎಫ್ (Affiliated competitive Feature Film Festivals), ಎಫ್ಐಎಪಿಎಫ್ (Affiliated competitive specialised Feature Film Festivals), ಎಫ್ಐಎಪಿಎಫ್ (Affiliated Non-competitive Feature Film Festivals), ಭಾರತೀಯ ಸಿನಿಮಾ ದಿಗ್ಗಜರ ಶಿಫಾರಸು ಸಿನಿಮಾಗಳು, ರಾಷ್ಟ್ರೀಯ ಪ್ರಶಸ್ತಿ ಪಡೆದ ಮಲಯಾಳಂ ಸಿನಿಮಾಗಳು, ರಾಜ್ಯ ಪ್ರಶಸ್ತಿ ಪಡೆದ ಸಿನಿಮಾಗಳನ್ನೂ ಪ್ರದರ್ಶಿಸಲಾಗುವುದು. ಆದರೆ ಒಟ್ಟೂ ಸಂಖ್ಯೆ ಎಂಟಕ್ಕೆ ನಿಗದಿಪಡಿಸಲಾಗಿದೆ. ಇದಲ್ಲದೇ, ವಿಶ್ವ ಸಿನಿಮಾ (ವರ್ಲ್ಡ್ ಸಿನಿಮಾ), ರೆಟ್ರಾಸ್ಪೆಕ್ಟಿವ್, ಹೋಮೇಜಸ್ ಇತ್ಯಾದಿ ವಿಭಾಗಗಳಲ್ಲೂ ಸಿನಿಮಾಗಳು ಪ್ರದರ್ಶಿತವಾಗಲಿವೆ.

ಪ್ರಶಸ್ತಿಗಳು (AWARDS)
ಸುವರ್ಣ ಚಕೋರಂ (Goldern Crow Pheasant)-20 ಲಕ್ಷ ರೂ. ನಗದನ್ನು ನಿರ್ದೇಶಕ-ನಿರ್ಮಾಕರಿಗೆ ನೀಡಲಾಗುವುದು.
ರಜತ ಚಕೋರಂ ಪ್ರಶಸ್ತಿಯನ್ನು (4 ಲಕ್ಷ ರೂ. ನಗದು)
ಅತ್ಯುತ್ತಮ ನಿರ್ದೇಶಕರಿಗೆ, ಚೊಚ್ಚಲ ಚಿತ್ರ ನಿರ್ದೇಶಕರಿಗೆ (3 ಲಕ್ಷ ರೂ. ನಗದು)
ತಾಂತ್ರಿಕ ಕ್ಷೇತ್ರದ ಪರಿಣಿತರು, ಅತ್ಯುತ್ತಮ ಅಭಿನಯಕ್ಕೂ, ತೀರ್ಪುಗಾರರ ಪ್ರಶಸ್ತಿಗೆ ಪ್ರಮಾಣ ಪತ್ರ ನೀಡಲಾಗುವುದು.
ಆಡಿಯನ್ಸ್ ಪೋಲ್ ನಿಂದ ಆಯ್ಕೆಯಾದ ಚಿತ್ರಕ್ಕೆ ರಜತ ಚಕೋರಂ (2 ಲಕ್ಷ ರೂ. ನಗದು) ಪ್ರಶಸ್ತಿ ಇರಲಿದೆ.

ಜೀವಿತಾವಧಿ ಸಾಧನೆ ಪ್ರಶಸ್ತಿ (10 ಲಕ್ಷ ರೂ. ನಗದು) ಅಂತಾರಾಷ್ಟ್ರೀಯ ಸಿನಿಮಾ ಸಾಧಕರಿಗೆ ನೀಡಲಾಗುತ್ತದೆ.ಇವುಗಳಲ್ಲದೇ ಪಿಫ್ರೆಸ್ಕಿ ಪ್ರಶಸ್ತಿ, ನೆಟ್ ಪ್ಯಾಕ್ ಪ್ರಶಸ್ತಿ, ಎಫ್ ಎಫ್ ಎಸ್ಐ ಮೋಹನಂ ಪ್ರಶಸ್ತಿ ಇತ್ಯಾದಿ ಪ್ರಶಸ್ತಿಗಳನ್ನು ಪ್ರದಾನ ಮಾಡಲಾಗುವುದು ಎಂದು ಪ್ರಕರಣೆ ತಿಳಿಸಿದೆ