ಕಾಶ್ಮೀರದ ಶೋಪಿಯಾನ್ ನಲ್ಲಿ ಇಬ್ಬರು ಉಗ್ರರು ಬಲಿ

ಶ್ರೀನಗರ: ಜಮ್ಮು-ಕಾಶ್ಮೀರದ ಶೋಪಿಯಾನ್​ ಜಿಲ್ಲೆಯ ದ್ರಾಗದ್​ ಪ್ರದೇಶದಲ್ಲಿ ಭಯೋತ್ಪಾದಕರು ಅಡಗಿರುವ ಖಚಿತ ಮಾಹಿತಿ ಮೇರೆಗೆ ಭದ್ರತಾ ಪಡೆಗಳು ಬುಧವಾರ ನಡೆಸಿದ ಕಾರ್ಯಾಚರಣೆ ವೇಳೆಯಲ್ಲಿ ಲಷ್ಕರ್​-ಎ-ತೊಯ್ಬಾದ (ಎಲ್​ಇಟಿ) ಭಾಗವಾಗಿರುವ ದಿ ರೆಸಿಸ್ಟೆನ್ಸ್​ ಫ್ರಂಟ್​ (ಟಿಆರ್​ಎಫ್)ನ ಇಬ್ಬರು ಉಗ್ರರು ಹತರಾಗಿದ್ದಾರೆ. ಗುಂಡಿನ ಚಕಮಕಿಯಲ್ಲಿ ಗಾಯಗೊಂಡಿದ್ದ ಒಬ್ಬ ಸೈನಿಕ ವೀರಮರಣವನ್ನಪ್ಪಿದ್ದಾರೆ. ಭದ್ರತಾಪಡೆಯ ಇಬ್ಬರು ಸಿಬ್ಬಂದಿ ಗಾಯಗೊಂಡಿದ್ದಾರೆ.

ಶೋಫಿಯಾನ್​ ಜಿಲ್ಲೆಯ ಟಿಆರ್​ಎಫ್ ಕಮಾಂಡರ್​ ಆಗಿದ್ದ ಅದಿಲ್​ ವಾನಿ ಈ ಎನ್​ಕೌಂಟರ್​ನಲ್ಲಿ ಸಾವನ್ನಪ್ಪಿದ್ದಾನೆ. ಉತ್ತರ ಪ್ರದೇಶದ ಸಹರನಪುರ ಮೂಲದಿಂದ ಕಾಶ್ಮೀರಕ್ಕೆ ಬಂದು ಮರಗೆಲಸ ಮಾಡಿಕೊಂಡು ಹೊಟ್ಟೆಹೊರೆಯುತ್ತಿದ್ದ ವಲಸಿಗನನ್ನು ವಾನಿ ಮೂರು ದಿನದ ಹಿಂದೆ ಹತ್ಯೆ ಮಾಡಿದ್ದ. 2020ರಿಂದ ವಾನಿ ವಿಧ್ವಂಸಕ ಕೃತ್ಯದಲ್ಲಿ ಸಕ್ರಿಯನಾಗಿದ್ದ ಎಂದು ಪೊಲೀಸ್​ ಮಹಾನಿರೀಕ್ಷಕ ವಿಜಯ್​ ಕುಮಾರ್​ ಹೇಳಿದ್ದಾರೆ. ಜಮ್ಮು-ಕಾಶ್ಮೀರದ ವಿವಿಧೆಡೆ ಎರಡು ವಾರಗಳಿಂದೀಚೆಗೆ 15 ಭಯೋತ್ಪಾದಕರನ್ನು ಹೊಡೆದುರುಳಿಸಲಾಗಿದೆ ಎಂದೂ ತಿಳಿಸಿದ್ದಾರೆ.

11 ವರ್ಷದ ಬಳಿಕ ದೀರ್ಕಾಲದ ಶೋಧ ಕಾರ್ಯ
‌ಜಮ್ಮು-ಕಾಶ್ಮೀರದ ಫೂಂಛ್​ ಜಿಲ್ಲೆಯ ಸುರಂಕೋಟ್​ ತಾಲ್ಲೂಕಿನ ಡೇರಾ ಕಿ ಗಲಿಯ ಅರಣ್ಯ ವ್ಯಾಪ್ತಿಯಲ್ಲಿ ಅ. 11ರಂದು ಆರಂಭವಾದ ಕಾರ್ಯಾಚರಣೆ 10ನೇ ದಿನವಾದ ಬುಧವಾರ ಕೂಡ ಮುಂದುವರಿದಿದೆ. 2009ರ ನಂತರ ದೀರ್ಘಾವಧಿಯ ಕಾರ್ಯಾಚರಣೆ ಇದಾಗಿದ್ದು, 11 ವರ್ಷದ ಹಿಂದೆ ಫೂಂಛ್​ ಜಿಲ್ಲೆಯಲ್ಲಿ 10 ದಿನ ಶೋಧ ಕಾರ್ಯನಡೆದಿತ್ತು.

ಅ. 11ರ ನಂತರ ಇಲ್ಲಿ ನಾಲ್ವರು ಉಗ್ರರನ್ನು ಹೊಡೆದುರುಳಿಸಲಾಗಿದ್ದು, ಕಾರ್ಯಾಚರಣೆ ವೇಳೆ ಸೇನೆಯ ಇಬ್ಬರು ಕಿರಿಯ ಅಧಿಕಾರಿಗಳು ಸೇರಿ 9 ಯೋಧರು ಸಾವನ್ನಪ್ಪಿದ್ದಾರೆ. ಉಗ್ರರ ಶವಗಳು ಪತ್ತೆಯಾಗದ ಕಾರಣ ಭಯೋತ್ಪಾದಕರು ದೊಡ್ಡ ಗುಂಪು ದಟ್ಟ ಅರಣ್ಯದಲ್ಲೇ ಅಡಗಿರುವ ಶಂಕೆ ಇದ್ದು, ಪಾಕ್​ ಸೇನೆಯ ಅಧಿಕಾರಿಯ ಸೂಚನೆಯಂತೆ ಈ ಗುಂಪು ಸಕ್ರಿಯವಾಗಿದೆ ಎಂದು ಹೇಳಲಾಗಿದೆ. ಈ ಉಗ್ರರ ಹಡೆಮುರಿ ಕಟ್ಟಲು ವಿಶೇಷ ಪ್ಯಾರಾ ಕಮಾಂಡೋಗಳು ಶೋಧಕಾರ್ಯ ನಡೆಸುತ್ತಿದ್ದಾರೆ. ಡ್ರೋನ್​ಗಳನ್ನೂ ಬಳಕೆ ಮಾಡುತ್ತಿದ್ದಾರೆ.

ಅಡವಿಯ ಸಮೀಪದ ಗ್ರಾಮಗಳ ಜನರಿಗೆ ಮನೆಯಿಂದ ಹೊರಬಾರದಂತೆ ಸೂಚಿಸಲಾಗಿದ್ದು, ಅರಣ್ಯಕ್ಕೆ ಜಾನುವಾರುಗಳನ್ನು ಮೇಯಿಸಲು ಕರೆತರಬಾರದು ಎಂದು ಅಪ್ಪಣೆ ಮಾಡಲಾಗಿದೆ.