ಕ್ಯಾನ್ಸರ್ ಸಂಶೋಧನೆಯಲ್ಲಿ ಪ್ರಖ್ಯಾತರಾದ ಕಮಲಾ ರಣದಿವೆಗೆ ಗೂಗಲ್ ಡೂಡಲ್ ಗೌರವ

ನವದೆಹಲಿ: ಕೋಶ ಜೀವವಿಜ್ಞಾನದಲ್ಲಿ ಆಗಾಧ ಸಾಧನೆ ಮಾಡಿ ಕ್ಯಾನ್ಸರ್‌ಗೆ ಕಾರಣ ಸಂಶೋಧನೆಗೈದು ಮನುಕುಲಕ್ಕೆ ಉಪಕಾರ ಮಾಡಿದ ಡಾ. ಕಮಲಾ ರಣದಿವೆ ಅವರ 104ನೇ ಜನ್ಮದಿನ ಇಂದು. ಈ ಹಿನ್ನೆಲೆಯಲ್ಲಿ ಜಾಗತಿಕ ಇಂಟರ್‌ನೆಟ್ ಸರ್ಚ್ ಇಂಜಿನ್ ಗೂಗಲ್, ಡೂಡಲ್ ಹಾಕುವ ಮೂಲಕ ಅವರಿಗೆ ಗೌರವ ಅರ್ಪಿಸಿದೆ. ಮೈಕ್ರೋಸ್ಕೋಪ್ ಹಿಡಿದಿರುವ ಕಮಲಾ ಅವರ ಚಿತ್ರವನ್ನು ಕಲಾವಿದ ರಯಿಂತಿಕತ್ ರಚಿಸಿದ್ದಾರೆ.

ಕ್ಯಾನ್ಸರ್ ಕ್ಷೇತ್ರದಲ್ಲಿ ಮಾತ್ರವಲ್ಲದೆ, ವಿಜ್ಞಾನ ಮತ್ತು ಶಿಕ್ಷಣ ವಲಯದಲ್ಲೂ ಅಪಾರ ಸೇವೆ ಸಲ್ಲಿಸಿರುವ ಕಮಲಾ ಸರಮತ್ (ರಣದಿವೆ) 1917ರ ನವೆಂಬರ್ 8ರಂದು ಪುಣೆಯಲ್ಲಿ ಜನಿಸಿದರು. ತಂದೆಯ ಪ್ರೋತ್ಸಾಹದಿಂದ ಕಮಲಾ ವೈದ್ಯಕೀಯ ಶಿಕ್ಷಣ ಪಡೆಯಲು ಸಾಧ್ಯವಾಯಿತು. ಜೀವಶಾಸ್ತ್ರದಲ್ಲಿ ವಿಷಯದಲ್ಲಿ ವಿಶೇಷ ಆಸಕ್ತಿ ವಹಿಸಿ ಉನ್ನತ ಶಿಕ್ಷಣ ಪಡೆದರು. ನಂತರ ಅವರು ಭಾರತೀಯ ಕ್ಯಾನ್ಸರ್ ಸಂಶೋಧನಾ ಸಂಸ್ಥೆ (ಐಸಿಆರ್ಸಿ)ಗೆ ಸೇರಿದರು. 1949ರಲ್ಲಿ ಜೀವಕೋಶಗಳ ಸೈಟೋಲಜಿಯಲ್ಲಿ ಹೆಚ್ಚಿನ ಅಧ್ಯಯನ ನಡೆಸಿ ಡಾಕ್ಟೋರೇಟ್ ಪದವಿ ಗಳಿಸಿದರು. ಐಸಿಆರ್ಸಿಯ ನಿರ್ದೇಶಕಿಯಾಗಿದ್ದರು. ಬಾಂಬೆ (ಈಗಿನ ಮುಂಬೈ) ಹಿಂದಿರುಗಿ ಅಲ್ಲಿ ದೇಶದ ಮೊದಲ ಅಂಗಾಂಗ (ಟಿಶ್ಯೂ) ಸಂಶೋಧನಾ ಪ್ರಯೋಗಾಲಯವನ್ನು ಸ್ಥಾಪಿಸಿದರು.

ಕ್ಯಾನ್ಸರ್ ಬೆಳವಣಿಗೆಯಲ್ಲಿ ಪ್ರಾಣಿಗಳ ಮಾದರಿ, ಸ್ತನ ಕ್ಯಾನ್ಸರ್‌ಗೆ ಆನುವಂಶೀಯ ಕಾರಣ, ಕ್ಯಾನ್ಸರ್‌ಗೆ ಕಾರಣವಾಗುವ ಕೆಲವು ವೈರಸ್‌ಗಳ ಬಗ್ಗೆ ಅವರು ತಳಸ್ಪರ್ಶಿ ಅಧ್ಯಯನ ನಡೆಸಿದರು. ಈ ರೀತಿಯ ಅಂಶಗಳ ಕುರಿತು ಭಾರತದಲ್ಲಿ ಮೊದಲು ಸಂಶೋಧನೆ ನಡೆಸಿದವರಲ್ಲಿ ಕಮಲಾ ಕೂಡ ಒಬ್ಬರು ಮತ್ತು ಪ್ರಥಮ ಮಹಿಳೆ.

1973ರಲ್ಲಿ ಅವರು ಕುಷ್ಠರೋಗಕ್ಕೆ ಕಾರಣವಾಗುವ ಮೈಕ್ರೋಬ್ಯಾಕ್ಟೀರಿಯಾದ ಪಾತ್ರದ ಬಗ್ಗೆ ಸಂಶೋಧನೆ ನಡೆಸಿ ಲಸಿಕೆಯನ್ನು ಕಂಡುಹಿಡಿದರು. 1973ರಲ್ಲಿ 11 ಸಹ ಸಂಶೋಧಕರ ಜತೆಗೂಡಿ ಮಹಿಳಾ ಸಂಶೋಧಕರ ಅಸೋಸಿಯೇಷನ್ (ಐಡಬ್ಲ್ಯೂಎಸ್ಎ) ಸ್ಥಾಪಿಸಿದರು.1989ರಲ್ಲಿ ನಿವೃತ್ತರಾದ ಅವರು, ಮಹಾರಾಷ್ಟ್ರದ ಗ್ರಾಮೀಣ ಭಾಗದಲ್ಲಿ ಆರೋಗ್ಯ ವೃದ್ಧಿಗಾಗಿ ಶ್ರಮಿಸಿದರು. ಮಹಿಳೆಯರಿಗೆ ಆರೋಗ್ಯ ವಿಷಯದಲ್ಲಿ ತರಬೇತಿ, ಪೌಷ್ಟಿಕಾಂಶದ ಬಗ್ಗೆ ಶಿಕ್ಷಣವನ್ನು ಒದಗಿಸುತ್ತಿದ್ದರು. ಐಡಬ್ಲ್ಯೂಎಸ್ಎ ಮೂಲಕ ಈ ವಲಯದಲ್ಲಿ ಅಧ್ಯಯನ ಮಾಡುವರಿಗೆ ಶಿಷ್ಯವೇತನ ಕೊಡಿಸಿದರು. ಮಕ್ಕಳ ಆರೈಕೆ, ಸ್ತ್ರೀ ವಿಜ್ಞಾನ, ಆರೋಗ್ಯ ವಿಷಯದಲ್ಲಿ ನ್ಯಾಯ ಮುಂತಾದ ಜನಪರ ಕಳಕಳಿಯ ಪರವಾಗಿಯೂ ಅವರು ಹೋರಾಡಿದರು.

ಇದನ್ನೂ ಓದಿ: Explainer: ಏನಿದು ಜನಸೇವಕ-ಜನಸ್ಪಂದನ? ನಮಗೇನು ಅನುಕೂಲ? ಇಲ್ಲಿದೆ ವಿವರ