ಪಾಟ್ನಾ: ಮಗ, ತಂದೆಯನ್ನು ಮೀರಿ ಬೆಳೆಯಬೇಕು ಎಂಬುದು ಲೋಕೋತ್ತರದ ಆಶಯ. ಈ ವಿಷಯದಲ್ಲಿ ಬಿಹಾರದ ಮುಖ್ಯಮಂತ್ರಿ ನಿತೀಶ್ ಕುಮಾರ್ ಅವರಿಗಿಂತ ಅವರ ಪುತ್ರ ನಿಶಾಂತ್ ಕುಮಾರ್ ಮುಂದಿದ್ದಾರೆ. ನಿತೀಶ್ ಬಳಿ ಇರುವುದಕ್ಕಿಂತ ಐದು ಪಟ್ಟು ಹೆಚ್ಚು ಆಸ್ತಿ ನಿಶಾಂತ್ ಹೊಂದಿದ್ದಾರೆ.
ನಿತೀಶ್ ಬಳಿ ಸ್ಥಿರಾಸ್ತಿ 58.85 ಲಕ್ಷ ರೂ. ಮತ್ತು ಚರಾಸ್ತಿ 16.51 ಲಕ್ಷ ರೂ. (ಒಟ್ಟು 75.36 ಲಕ್ಷ ರೂಪಾಯಿ) ಮೌಲ್ಯದಾಗಿದ್ದರೆ, 42,763 ರೂಪಾಯಿಗಳನ್ನು ಅವರು ಬ್ಯಾಂಕ್ನಲ್ಲಿ ಠೇವಣಿ ಇರಿಸಿದ್ದಾರೆ. 29,385 ರೂಪಾಯಿ ನಗದು ಮತ್ತು 1.45 ಲಕ್ಷ ರೂ. ಮೌಲ್ಯದ 9 ಕರು ಮತ್ತು 13 ಹಸುಗಳಿವೆ ಎಂದು ನಿತೀಶ್ ಘೋಷಿಸಿದ್ದಾರೆ.
ಅವರ ಮಗ ನಿಶಾಂತ್ ಸುಮಾರು 3.61 ಕೋಟಿ ರೂಪಾಯಿಗೂ ಹೆಚ್ಚಿನ ಮೌಲ್ಯದ ಆಸ್ತಿ ಹೊಂದಿದ್ದಾರೆ. ಸ್ಥಿರಾಸ್ತಿ 1.98 ಕೋಟಿ ರೂ. ಮತ್ತು ಚರಾಸ್ತಿ 1.63 ಕೋಟಿ ರೂ. ಜತೆಗೆ 1.28 ಕೋಟಿ ರೂ. ಬ್ಯಾಂಕ್ ಠೇವಣಿ ಇರಿಸಿರುವ ನಿಶಾಂತ್, 16,549 ರೂಪಾಯಿ ನಗದನ್ನು ಹೊಂದಿದ್ದಾರೆ. ಇಷ್ಟೇ ಅಲ್ಲದೆ ದೆಹಲಿಯ ದ್ವಾರಕಾದಲ್ಲಿ ಫ್ಲ್ಯಾಟ್, ಬಿಹಾರದ ನಳಂದಾ ಜಿಲ್ಲೆಯಲ್ಲಿ ಕೃಷಿ ಮತ್ತು ಕೃಷಿಯೇತರ ಭೂಮಿ ಮತ್ತು ಮನೆ. ಪಾಟ್ನಾದಲ್ಲೊಂದು ಮನೆ ಅವರಿಗಿದೆ.
ನತೀಶ್ ಸಂಪುಟದಲ್ಲಿರುವ ಬಹುತೇಕ ಸಚಿವರು ಅವರಿಗಿಂತ ಹೆಚ್ಚು ಶ್ರೀಮಂತರಾಗಿದ್ದಾರೆ. ಪಶುಸಂಗೋಪನಾ ಸಚಿವ ಹಾಗೂ ವಿಕಾಸಶೀಲ ಇನ್ಸಾನ್ ಪಕ್ಷದ (ವಿಐಪಿ) ಸಂಸ್ಥಪಾಕರಾದ ಸಚಿವ ಮುಕೇಶ್ ಸಹಾನಿ 23 ಲಕ್ಷ ರೂಪಾಯಿ ಬ್ಯಾಂಕ್ ಠೇವಣಿ ಹೊಂದಿದ್ದು, ಮುಂಬೈನಲ್ಲಿ ಏಳು ಕೋಟಿ ರೂಪಾಯಿಗೂ ಹೆಚ್ಚು ಮೌಲ್ಯದ ಮೂರು ಆಸ್ತಿಗಳ ಒಡೆಯರಾಗಿದ್ದಾರೆ. ಪತ್ನಿ ಮತ್ತು ತಮ್ಮ ಹೆಸರಿನಲ್ಲಿ ತಲಾ ಒಂದು ಫ್ಲ್ಯಾಟ್ ಕೂಡ ಇದೆ ಎಂದು ಘೋಷಿಸಿಕೊಂಡಿದ್ದಾರೆ.
ಪ್ರತಿ ವರ್ಷದ ಕೊನೆಯಲ್ಲಿ ಸಚಿವರು ಆಸ್ತಿ ಘೋಷಣೆ ಮಾಡುವುದನ್ನು ಸಿಎಂ ನಿತೀಶ್ ಕಡ್ಡಾಯ ಮಾಡಿರುವ ಹಿನ್ನೆಲೆಯಲ್ಲಿ ನಿತೀಶ್ ಸಂಪುಟದ ಸದಸ್ಯರು ಈ ವಿವರವನ್ನು ಪ್ರಕಟಿಸಿದ್ದಾರೆ. ಇದನ್ನು ಸರ್ಕಾರದ ಅಧಿಕೃತ ವೆಬ್ಸೈಟ್ನಲ್ಲೂ ಹಾಕಲಾಗಿದೆ.
ಇದನ್ನೂ ಓದಿ: ಹೈಕೋರ್ಟ್ ಮಹತ್ವದ ತೀರ್ಪುಗಳು: 2021ರ ಒಂದು ಹಿನ್ನೋಟ
(Bihar CM Nitish Kumar Son Nishant Kumar five times richer than his father)
Discussion about this post