ಕೋವಿಡ್–19: ನಟ ಜಾನ್‌ ಅಬ್ರಹಾಂ, ಪತ್ನಿ ಪ್ರಿಯಾ ರುಂಚಾಲ್‌ಗೆ ಸೋಂಕು ದೃಢ

ನವದೆಹಲಿ: ಬಾಲಿವುಡ್ ನಟ ಜಾನ್ ಅಬ್ರಹಾಂ ಮತ್ತು ಅವರ ಪತ್ನಿ ಪ್ರಿಯಾ ರುಂಚಾಲ್‌ಗೆ ಕೋವಿಡ್–19 ಸೋಂಕು ತಗುಲಿರುವುದು ದೃಢಪಟ್ಟಿದೆ.

ಈ ಕುರಿತು ಸಾಮಾಜಿಕ ಮಾಧ್ಯಮ ಇನ್‌ಸ್ಟಾಗ್ರಾಂನಲ್ಲಿ ಸಂದೇಶ ಪ್ರಕಟಿಸಿರುವ ಜಾನ್ ಅಬ್ರಹಾಂ, ಇಬ್ಬರಲ್ಲೂ ರೋಗ ಲಕ್ಷಣಗಳು ಸೌಮ್ಯವಾಗಿದ್ದು, ಮನೆಯಲ್ಲೇ ಕ್ವಾರಂಟೈನ್‌ನಲ್ಲಿ ಇರುವುದಾಗಿ ಉಲ್ಲೇಖಿಸಿದ್ದಾರೆ.

‘ಮೂರು ದಿನಗಳ ಹಿಂದೆ ಕೋವಿಡ್ ತಗುಲಿದ್ದ ವ್ಯಕ್ತಿಯೊಬ್ಬರ ಸಂಪರ್ಕಕ್ಕೆ ಬಂದಿದ್ದೆ. ಪ್ರಿಯಾ ಹಾಗೂ ನನ್ನಲ್ಲಿ ಇಬ್ಬರಲ್ಲೂ ಕೋವಿಡ್ ದೃಢಪಟ್ಟಿದೆ. ಮನೆಯಲ್ಲೇ ಪ್ರತ್ಯೇಕ ವಾಸ ಮಾಡುತ್ತಿದ್ದೇವೆ. ನಾವು ಸದ್ಯ ಯಾರ ಸಂಪರ್ಕಕ್ಕೂ ಬಂದಿಲ್ಲ. ನಮ್ಮಿಬ್ಬರಲ್ಲೂ ಸೋಂಕಿನ ಸೌಮ್ಯ ಲಕ್ಷಣಗಳಿವೆ. ನಾವಿಬ್ಬರೂ ಲಸಿಕೆ ಪಡೆದಿದ್ದೇವೆ. ಎಲ್ಲರೂ ಸುರಕ್ಷಿತವಾಗಿರಿ, ಆರೋಗ್ಯವಾಗಿರಿ. ಮಾಸ್ಕ್ ಧರಿಸಿ’ ಎಂದು ಅಬ್ರಹಾಂ ಇನ್‌ಸ್ಟಾಗ್ರಾಂ ಸಂದೇಶದಲ್ಲಿ ಉಲ್ಲೇಖಿಸಿದ್ದಾರೆ.

ಇದನ್ನೂ ಓದಿ: ದುನಿಯಾ ವಿಜಯ್ ನಂದಮೂರಿ ಬಾಲಕೃಷ್ಣರ ಚಿತ್ರದ ವಿಲನ್

ಅಬ್ರಹಾಂ ಅವರು ರುಂಚಾಲ್ ಅವರನ್ನು 2014ರ ಜನವರಿಯಲ್ಲಿ ಮದುವೆಯಾಗಿದ್ದಾರೆ.

ಅಬ್ರಹಾಂ ದಂಪತಿಗೆ ಕೋವಿಡ್ ತಗುಲುವುದರೊಂದಿಗೆ ಬಾಲಿವುಡ್‌ನಲ್ಲಿ ಸೋಂಕಿತರ ಸಂಖ್ಯೆಯಲ್ಲಿ ಹೆಚ್ಚಳವಾಗಿದೆ. ಕಳೆದ ತಿಂಗಳು ಕರೀನಾ ಕಪೂರ್, ಅಮೃತಾ ಅರೋರಾ, ಅರ್ಜುನ್ ಕಪೂರ್, ಅನ್ಶುಲ್ಲಾ, ಅನಿಲ್ ಕಪೂರ್ ಪುತ್ರಿ ರೇಹಾ ಕಪೂರ್ ಹಾಗೂ ಅವರ ಪತಿ ಕರಣ್ ಬೂಲಾನಿಯಲ್ಲಿ ಕೋವಿಡ್‌ ದೃಢಪಟ್ಟಿತ್ತು.

ಇದನ್ನೂ ಓದಿ: ಕಾಜಲ್ ಅಗರ್ವಾಲ್‌ಗೆ ತಾಯಿಯಾಗುವ ಸಂಭ್ರಮ: ಹೊಸ ವರ್ಷದ ಸಂದೇಶದಲ್ಲಿ ಗೌತಮ್ ಕಿಚ್ಲು ಮಾಹಿತಿ