2 ಭಾಗಗಳಲ್ಲಿ ಪರದೆಯ ಮೇಲೆ ಪ್ರತ್ಯಕ್ಷನಾಗಲು ಅವತಾರ ಪುರುಷ ಸಿದ್ಧತೆ

ನಟ ಶರಣ್ ಅಭಿನಯದ, ನಿರ್ಮಾಪಕ ಪುಷ್ಕರ್ ಮಲ್ಲಿಕಾರ್ಜುನಯ್ಯ ನಿರ್ಮಾಣದ, ಸಿಂಪಲ್ ಸುನಿ ನಿರ್ದೇಶನ ಅವತಾರ ಪುರುಷ ಡಿಸೆಂಬರ್ 10ಕ್ಕೆ ತೆರೆಗೆ ಬರುತ್ತಿದೆ. ಈ ಚಿತ್ರದ ವಿಶೇಷ ಎಂದರೆ, ಅವತಾರ ಪುರುಷ ಭಾಗ 2 ಕೂಡ ತೆರೆಗೆ ತರಲು ಚಿತ್ರತಂಡ ಸಿದ್ಧತೆ ಮಾಡಿಕೊಂಡಿದೆ. ಆದರೆ, ಅವತಾರ ಪುರುಷ ಭಾಗ1 ರ ಜೊತೆಗೆ ಬರುವುದಿಲ್ಲ. ನಿರ್ಮಾಪಕ ಪುಷ್ಕರ್ ಅವರ ಪ್ರಕಾರ ಚಿತ್ರ ಬಿಡುಗಡೆಯಾಗಿ 101ನೇ ದಿನಕ್ಕೆ ಅವತಾರ ಪುರುಷ ಭಾಗ-2 ಬಿಡುಗಡೆಯಾಗಲಿದೆ. ಅಂದರೆ ಮಾರ್ಚ್ 2022ಕ್ಕೆ ಅವತಾರ ಪುರುಷನ ಎರಡನೇ ಭಾಗದ ದರ್ಶನವಾಗಲಿದೆ.

ಅವತಾರ ಪುರುಷ ಶರಣ್ ಅವರ ಸಿಂಪಲ್ ಸುನಿ, ಪುಷ್ಕರ್ ಜೊತೆಗಿನ ಮೊದಲ ಸಿನಿಮಾ. ಪೋಸ್ಟರ್, ಟೀಸರ್ ಈಗಾಗಲೇ ಜನರ ಗಮನ ಸೆಳೆದು ಚಿತ್ರದ ಬಗ್ಗೆ ಒಂದಷ್ಟು ಕುತೂಹಲ ಮೂಡಿಸಿದೆ. ನನಗೆ ಇದು ಮೊದಲ ಸಿನಿಮಾ ಎನ್ನುವ ಫೀಲ್ ಬರುತ್ತಿದೆ. ಎರಡು ವರ್ಷಗಳ ಕೊರೊನಾದಿಂದ ಚಿತ್ರ ಚಟುವಟಿಕೆಗಳು ನಿಂತು ಹೋಗಿದ್ದವು. ಹೀಗಾಗಿ, ಹೊಸಬರ ಥರ ಬರುತ್ತಿರುವ ಭಾವ ನನಗೆ ಮೂಡುತ್ತಿದೆ ಎನ್ನುತ್ತಾರೆ ನಟ ಶರಣ್.

ಶರಣ್ ವೃತ್ತಿ ಜೀವನದ ಬಿಗ್ ಬಜೆಟ್ ಸಿನಿಮಾ ಈ ಅವತಾರ ಪುರುಷ. ಆದರೆ ಬಜೆಟ್ ಎಷ್ಟು ಎಂದರೆ ಯಾರೂ ಕೂಡ ಬಾಯಿ ಬಿಡುತ್ತಿಲ್ಲ. ಅವತಾರ ಪುರುಷದ ಪಾತ್ರ ಬಹಳ ಭಿನ್ನ. ಈ ರೀತಿ ಪಾತ್ರ ಮಾಡಿಯೇ ಇಲ್ಲ. ನನ್ನೊಳಗಿನ ನಟನನ್ನು ಈ ಚಿತ್ರ ಮತ್ತಷ್ಟು ಸಾಣೆ ಹಿಡಿಸಿದೆ. ಹೀಗಾಗಿ, ಭಿನ್ನ ಗೆಟಪ್ ನಲ್ಲಿ ನಿಮ್ಮ ಶರಣ್ ಕಾಣಿಸಿಕೊಳ್ಳಲಿದ್ದಾನೆ ಎಂದು ಹೆಮ್ಮೆಯಿಂದ ಹೇಳಿಕೊಳ್ಳುತ್ತಾರೆ ಶರಣ್. ಅವತಾರ ಪುರುಷ ಚಿತ್ರಕ್ಕೆ ಅರ್ಜುನ್ ಜನ್ಯ ಸಂಗೀತ, ವಿಲಿಯಮ್ ಡೇವಿಡ್ ಛಾಯಾಗ್ರಾಹಣವಿದೆ.

ಇದನ್ನೂ ಓದಿ: Naxal History: ರಕ್ತಸಿಕ್ತ ಇತಿಹಾಸ, ಭವಿಷ್ಯ ಅಸ್ಪಷ್ಟ: ಇಳಿಗಾಲದಲ್ಲಿ ನಕ್ಸಲ್‌ ಚಳುವಳಿ