ಮಗಳು ವಮಿಕಾ, ಮುಂದಿನ ವೃತ್ತಿಜೀವನದ ಬಗ್ಗೆ ಏನಂತಾರೆ ಬಾಲಿವುಡ್ ನಟಿ ಅನುಷ್ಕಾ ಶರ್ಮಾ?

ಮುಂಬೈ: ಬಾಲಿವುಡ್‌ನ ಖ್ಯಾತ ನಟಿ, ಕ್ರಿಕೆಟಿಗ ವಿರಾಟ್ ಕೊಹ್ಲಿ ಪತ್ನಿ ಅನುಷ್ಕಾ ಶರ್ಮಾ ಕಳೆದ ಕೆಲವು ವರ್ಷಗಳಿಂದ ಸಿನಿಮಾ ಕ್ಷೇತ್ರದಲ್ಲಿ ಸಕ್ರಿಯರಾಗಿಲ್ಲ. ಸದ್ಯ ತಾಯ್ತನವನ್ನು ಆನಂದಿಸುತ್ತಿರುವ ಅವರು, ತಮ್ಮ ಮುಂದಿನ ವೃತ್ತಿ ಜೀವನ ಹಾಗೂ ಮಗಳ ಬಗ್ಗೆ ಮನಬಿಚ್ಚಿ ಮಾತನಾಡಿದ್ದಾರೆ.

ನಟಿ, ನಿರ್ಮಾಪಕಿಯೂ ಆಗಿರುವ ಅನುಷ್ಕಾ 2018ರಿಂದ ಯಾವುದೇ ಸಿನಿಮಾದಲ್ಲಿ ಪಾತ್ರ ನಿರ್ವಹಿಸಿಲ್ಲ. ಇತ್ತೀಚೆಗೆ ನೀಡಿದ ಸಂದರ್ಶನವೊಂದರಲ್ಲಿ ಮಗಳು ವಮಿಕಾ, ಪತಿ ವಿರಾಟ್ ಹಾಗೂ ವೃತ್ತಿ ಜೀವನದ ಮುಂದಿನ ಯೋಚನೆಗಳ ಬಗ್ಗೆ ಮಾತನಾಡಿದ್ದಾರೆ.

‘ನಾನು ಇನ್ನೂ ಸ್ವಲ್ಪ ಬಿಡುವು ಮಾಡಿಕೊಳ್ಳಬೇಕೆಂದು ಬಯಸುತ್ತೇನೆ. ಮುಂದೆ ಯಾವ ರೀತಿ ಕೆಲಸ ಮಾಡಬೇಕು ಮತ್ತು ಯಾವ ರೀತಿಯ ಚಲನಚಿತ್ರಗಳ ಭಾಗವಾಗಿರಬೇಕು ಎಂಬುದನ್ನು ಅರ್ಥಮಾಡಿಕೊಳ್ಳಲು ಬಯಸುತ್ತೇನೆ’ ಎಂದು ಅನುಷ್ಕಾ ಹೇಳಿದ್ದಾರೆ.

ನಿಗದಿತ ವೇಳಾಪಟ್ಟಿಯಷ್ಟು ಮಾತ್ರವೇ ಕೆಲಸ ಮಾಡುವುದು ನಿಮ್ಮನ್ನು ಉತ್ತಮ ಕೆಲಸಗಾರರನ್ನಾಗಿ ಮಾಡುವುದಿಲ್ಲ ಎಂಬುದನ್ನು ನಾವು ಒಪ್ಪಿಕೊಳ್ಳಬೇಕು. ಸೃಜನಾತ್ಮಕ ವ್ಯಕ್ತಿಯಾಗಿ ನೀವು ಯೋಚಿಸಬೇಕು. ನಿಮಗೆ ನೀವೇ ಅನ್ವೇಷಣೆ, ಮರು ಅನ್ವೇಷಣೆ ಹಾಗೂ ಬೆಳವಣಿಗೆಗೆ ಅವಕಾಶ ಮಾಡಿಕೊಡಬೇಕು ಎಂದು ಅವರು ಅಭಿಪ್ರಾಯಪಟ್ಟಿದ್ದಾರೆ.

ಇದನ್ನೂ ಓದಿ: ಇನ್‌ಸ್ಟಾಗ್ರಾಂನಲ್ಲಿ ಬಿಸಿ ಏರಿಸಿದ ‘ಪೂಲ್ ಬೇಬಿ’ ಜಾಕ್ವೆಲಿನ್ ಫರ್ನಾಂಡೀಸ್

ಕೋವಿಡ್ ಸಾಂಕ್ರಾಮಿಕ ಮಧ್ಯೆ 2021ರ ಜನವರಿಯಲ್ಲಿ ಅನುಷ್ಕಾ ಮಗಳು ವಮಿಕಾಗೆ ಜನ್ಮ ನೀಡಿದ್ದರು. ಈ ಕುರಿತು ಮಾತನಾಡಿದ ಅವರು, ‘ಗರ್ಭವತಿಯಾಗಿದ್ದಾಗ ನಾನು ಮತ್ತು ವಿರಾಟ್ ಇಬ್ಬರೂ ಮನೆಯಲ್ಲಿ ಜೆತಯಾಗಿದ್ದೆವು. ಒಂದು ವೇಳೆ ಆಗ ಅವರು ಕ್ರಿಕೆಟ್‌ಗಾಗಿ ಪ್ರಯಾಣದಲ್ಲಿರುತ್ತಿದ್ದರೆ, ಆ ಸ್ಥಿತಿಯಲ್ಲಿ ನಾನು ಅವರೊಂದಿಗೆ ಹೋಗಲು ಸಾಧ್ಯವಾಗುತ್ತಿರಲಿಲ್ಲ. ಗರ್ಭವತಿಯಾಗಿದ್ದಾಗಿನ ಮೊದಲ ಮೂರು ತಿಂಗಳ ಅನುಭವ ಅದ್ಭುತವಾಗಿತ್ತು. ಪತಿಯು ಜತೆಯಲ್ಲೇ ಇದ್ದುದು ಸಂತೋಷಕ್ಕೂ ಕಾರಣವಾಯಿತು ಎಂದು ಅನುಷ್ಕಾ ಹೇಳಿದ್ದಾರೆ.

ಇನ್ನು, ಮಗಳ ಬಗ್ಗೆ ಮಾತನಾಡಿರುವ ಅವರು, ‘ನಾನು ಅವಳನ್ನು ಅತ್ಯಂತ ದೃಢವಾಗಿ ಕಾಣುತ್ತೇನೆ. ಅವಳು ಏನನ್ನಾದರೂ ಮಾಡಲು ಬಯಸಿದರೆ ಅವಳನ್ನು ಹಾಗೆಯೇ ಬಿಡುತ್ತೇನೆ. ಯಾಕೆಂದರೆ ಅವಳು ಅದನ್ನು ಮಾಡಲಿದ್ದಾಳೆ ಎಂದು ನಾನು ಭಾವಿಸುತ್ತೇನೆ. ಇದರಿಂದ ಮುಂದೆ ಅವಳಿಗೆ ಜೀವನದಲ್ಲಿ ಅವಳ ಕೆಲವು ಉದ್ದೇಶಗಳನ್ನು ಪೂರೈಸಲು ನೆರವಾಗಬಹುದು ಎಂದು ನಾನು ಹೇಳಬಲ್ಲೆ. ಅವಳ ತುಂಟಾಟಗಳನ್ನು ನೋಡಲು ಸಂತೋಷವಾಗಿದೆ. ನಾನು ಕೂಡ ಹಾಗೆ ಇದ್ದಿರಬಹುದು ಎಂದು ನಾನು ಭಾವಿಸುತ್ತೇನೆ’ ಎಂದು ಅನುಷ್ಕಾ ಹೇಳಿದ್ದಾರೆ.

ಇದನ್ನೂ ಓದಿ: ಪ್ರಿಯಾಂಕಾ ಉಪೇಂದ್ರ ಹ್ಯಾಪಿ ಬರ್ತಡೇಗೆ ಉಗ್ರಾವತಾರ ತಳೆದಿದ್ದರು!