Bomb Explosion: ಲೂಧಿಯಾನ ಕೋರ್ಟ್​ ಸಂಕೀರ್ಣದಲ್ಲಿ ಸ್ಫೋಟ: ಒಬ್ಬನ ಸಾವು

ಚಂಡೀಗಡ:  ಲೂಧಿಯಾನದ ಜಿಲ್ಲಾ ಕೋರ್ಟ್​ ಸಂಕೀರ್ಣದಲ್ಲಿ ಗುರುವಾರ ಸಂಭವಿಸಿದ ಸ್ಫೋಟದಲ್ಲಿ ಓರ್ವ ಮೃತಪಟ್ಟಿದ್ದಾನೆ. ಮೂವರು ಗಾಯಗೊಂಡಿದ್ದಾರೆ. ಈ ಮೊದಲು ಇಬ್ಬರು ಸಾವನ್ನಪ್ಪಿದ್ದಾರೆಂದು ಹೇಳಲಾಗಿತ್ತು. ನಂತರ ಪೊಲೀಸರು ಓರ್ವ ಸತ್ತಿದ್ದಾನೆಂದು ಖಚಿತ ಪಡಿಸಿದ್ದಾರೆ.  ಕಲಾಪ ನಡೆಯುತ್ತಿದ್ದ ವೇಳೆಯಲ್ಲೇ ಈ ಸ್ಫೋಟ ಸಂಭವಿಸಿದ್ದರಿಂದ ಜಿಲ್ಲಾ ನ್ಯಾಯಾಲಯದಲ್ಲಿ ಹೆಚ್ಚಿನ ಜನರು ಇದ್ದರು ಎಂದು ಪೊಲೀಸರು ತಿಳಿಸಿದ್ದಾರೆ. 

ಮಧ್ಯಾಹ್ನ 12.20ರ ವೇಳಗೆ ಕೋರ್ಟ್​ ಸಂಕೀರ್ಣದ ಎರಡನೇ ಮಹಡಿಯ ಶೌಚಾಲಯದಲ್ಲಿ ಬಾಂಬ್​ ಸ್ಫೋಟಿಸಿದ್ದರಿಂದ ಅಲ್ಲಿನ ಗೋಡೆಗಳಿಗೆ ಹಾನಿ ಆಗಿದೆ. ಅಕ್ಕಪಕ್ಕದ ರೂಂಗಳ ಕಿಟಕಿ ಗಾಜುಗಳು ಮತ್ತು  ಕೆಳಗೆ ನಿಲ್ಲಿಸಿದ್ದ ವಾಹನಗಳ ಗಾಜುಗಳೂ ಒಡೆದಿವೆ.

ಜಿಲ್ಲಾ ನ್ಯಾಯಾಲಯ ಸಂಕೀರ್ಣವು ಲೂಧಿಯಾನದ ಹೃದಯಭಾಗದಲ್ಲಿದ್ದು, ಉಪಪೊಲೀಸ್​ ಆಯುಕ್ತರ ಕಚೇರಿಯ ಪಕ್ಕದಲ್ಲೇ  ಇದೆ. ಆದರೂ ಇಲ್ಲಿ ಭದ್ರತೆ ಇಲ್ಲ ಎನ್ನಲಾಗಿದೆ. ಬಾಂಬ್​ ಅನ್ನು ಕೋರ್ಟ್​ ಸಂಕೀರ್ಣಕ್ಕೆ ತಂದಿದ್ದಾದರೂ ಹೇಗೆ ಎಂಬ ಕುರಿತೂ ತನಿಖೆ ನಡೆಯುತ್ತಿದೆ.

ಶೌಚಾಲಯದಲ್ಲಿ ಒಂದು ಶವ ಪತ್ತೆಯಾಗಿದೆ, ಈತನೇ ಸ್ಫೋಟಕವನ್ನು ಇರಿಸಿರಬಹುದು ಅಥವಾ ಸ್ಫೋಟದ ವೇಳೆ ಅದರ ಸಮೀಪದಲ್ಲಿ ಇದ್ದಿರಬಹುದು. ಶವದ ಗುರುತು ಪತ್ತೆಯಾದ ನಂತರವಷ್ಟೆ ಈ ಅನುಮಾನಗಳು ದೂರವಾಗುತ್ತವೆ ಎಂದು ಲೂಧಿಯಾನ ಪೊಲೀಸ್​ ಕಮಿಷನರ್​  ಗುಪ್ರೀ೯ತ್ ಸಿಂಗ್​ ಭುಲ್ಲಾರ್​ ಹೇಳಿದ್ದಾರೆ.

ಗಾಯಗೊಂಡಿರುವ ಮೂವರ ಜೀವಕ್ಕೆ ಅಪಾಯವೇನೂ ಇಲ್ಲ. ಕೋರ್ಟ್​ ಆವರಣಕ್ಕೆ ಸಾರ್ವಜನಿಕರ ಪ್ರವೇಶ ನಿರ್ಬಂಧಿಸಿದ್ದು, ವಿಧಿವಿಜ್ಞಾನ ತಜ್ಞರು ಸಾಕ್ಷ್ಯ ಸಂಗ್ರಹ ಮಾಡುತ್ತಿದ್ದಾರೆ.  ದೆಹಲಿಯಿಂದ ರಾಷ್ಟ್ರೀಯ ತನಿಖಾ ಸಂಸ್ಥೆಯ (ಎನ್​ಐಎ) ತಂಡ ಲೂಧಿಯಾನಕ್ಕೆ ಹೊರಟಿದೆ ಎಂದು ಭುಲ್ಲಾರ್​ ಸುದ್ದಿಗಾರರಿಗೆ ತಿಳಿಸಿದ್ದಾರೆ.

ಸಮಾಜಘಾತುಕರ ಕೈವಾಡವೆಂದ ಸಿಎಂ ಚನ್ನಿ:

ಲೂಧಿಯಾನ ಕೋರ್ಟ್​ನಲ್ಲಿ ಸ್ಫೋಟ ಸಂಭವಿಸಿರುವುದನ್ನು ಖಂಡಿಸಿರುವ ಮುಖ್ಯಮಂತ್ರಿ ಚರಣಜಿತ್​ ಸಿಂಗ್​ ಚನ್ನಿ, ರಾಜ್ಯದಲ್ಲಿ  ಶಾಂತಿ ಮತ್ತು ಸೌಹಾರ್ದ ಹಾಳು ಮಾಡುವವರ ವಿರುದ್ಧ ಕಠಿಣ ಕ್ರಮ ಜರುಗಿಸಲಾಗುವುದು ಎಂದಿದ್ದಾರೆ. ವಿಧಾನಸಭಾ ಚುನಾವಣೆ ಸಮೀಪಿಸಿರುತ್ತಿರುವ ಹಿನ್ನೆಲೆಯಲ್ಲಿ ರಾಜ್ಯದಲ್ಲಿ ಕಾನೂನು ಸುವ್ಯವಸ್ಥೆಯನ್ನು ಹಾಳುಮಾಡಲು ಸಮಾಜಘಾತುಕ  ಶಕ್ತಿಗಳು ವಿಧ್ವಂಸಕ ಕೃತ್ಯ ನಡೆಸುತ್ತಿವೆ ಎಂದು ಹೇಳಿದ್ದಾರೆ.

ಬಾಂಬ್​ ಸ್ಫೋಟವನ್ನು ಖಂಡಿಸಿರುವ ಮಾಜಿ ಸಿಎಂ ಕ್ಯಾಪ್ಟನ್​ ಅಮರಿಂದರ್​ ಸಿಂಗ್​ ಪಂಜಾಬ್​ ಪೊಲೀಸರು ತನಿಖೆ ನಡೆಸಲು ಸಮರ್ಥರಿದ್ದಾರೆ ಎಂದಿದ್ದಾರೆ. ಶಿರೋಮಣಿ ಅಕಾಲಿ ದಳದ ಮುಖ್ಯಸ್ಥ ಸುಖಬೀರ್​ ಸಿಂಗ್​ ಬಾದಲ್​ ಟ್ವೀಟ್​ ಮಾಡಿ ಆಘಾತ ವ್ಯಕ್ತಪಡಿಸಿದ್ದು ಕಾನೂನು ಸುವ್ಯವಸ್ಥೆಯನ್ನು ಸರ್ಕಾರ ಬಿಗಿಗೊಳಿಸಬೇಕು ಎಂದು ಒತ್ತಾಯಿಸಿದ್ದಾರೆ.

Bomb explosion in Ludhiana court complex one person reported dead

ಇದನ್ನೂ ಓದಿ: Political retirement: ಭ್ರಷ್ಟಾಚಾರ ಆರೋಪ ಸಾಬೀತುಪಡಿಸಿದ್ದಲ್ಲಿ ರಾಜಕೀಯ ನಿವೃತ್ತಿ

ಇದನ್ನೂ ಓದಿ: ಪಂಜಾಬ್​ನಲ್ಲಿ ಗುಂಪು ಹಲ್ಲೆಯಲ್ಲಿ ಮತ್ತೊಬ್ಬ ವ್ಯಕ್ತಿ ಮರಣ