ಲಂಡನ್: ಜಾಗತಿಕವಾಗಿ ಮಾರಣಹೋಮಕ್ಕೆ ಕಾರಣವಾಗಿರುವ ಚೀನಾ ಮೂಲದಿಂದ ವಿಶ್ವ ವ್ಯಾಪಿಯಾದ ಕೊರೊನಾ ಸೋಂಕಿನ ಹೊಸ ಪ್ರಭೇದ ಓಮಿಕ್ರಾನ್ ಈಗ ತಲ್ಲಣ ಉಂಟುಮಾಡಿದೆ.ಈ ಹೊತ್ತಿನಲ್ಲೇ ಲಂಡನ್ನ ಯುಸಿಎಲ್ ಅಧ್ಯಯನಕಾರರು ಗರ್ಭಸ್ತ ಶಿಶು ಅಥವಾ ಭ್ರೂಣಕ್ಕೆ ಕೋವಿಡ್ ಸೋಂಕು ತಗುಲುವ ಸಂಭವ ಅಪರೂಪ ಎಂದು ಧೈರ್ಯ ಹೇಳಿದ್ದಾರೆ.
ಗ್ರೇಟ್ ಓರ್ಮಂಡ್ ಸ್ಟ್ರೀಟ್ ಮಕ್ಕಳ ಆಸ್ಪತ್ರೆ ಮತ್ತು ಎನ್ಐಎಚ್ಆರ್ ಬಯೋಮೇಡಿಕಲ್ ಕೇಂದ್ರವು ಸಾರ್ಸ್-ಕೋವಿ-2 ವೈರಸ್ ಭ್ರೂಣದ ಮೇಲೆ ಮಾಡುವ ಪರಿಣಾಮ ಕುರಿತು ಅಧ್ಯಯನ ನಡೆಸಿ ಈ ಅಂಶವನ್ನು ಕಂಡುಕೊಂಡಿದೆ. ಈ ಅಧ್ಯಯನ ವರದಿಯು “ಬಿಜೋಗ್'(ಅಂತಾರಾಷ್ಟ್ರೀಯ ಪ್ರಸೂತಿ ಮತ್ತು ಸ್ತ್ರೀರೋಗ ಶಾಸ್ತ್ರದ ಪತ್ರಿಕೆ)ಯಲ್ಲಿ ಪ್ರಕಟವಾಗಿದೆ. ತಾಯಿಯಿಂದ ಭ್ರೂಣವನ್ನು ಸಂಪರ್ಕಿಸುವ ಕರುಳುಬಳ್ಳಿಯು ಕೊರೊನಾ ಸೋಂಕನ್ನು ಹೊತ್ತೊಯ್ಯುವುದು ತೀರಾ ಅಪರೂಪ. ಏಕೆಂದರೆ ಗರ್ಭಚೀಲದಲ್ಲಿರುವ ಭ್ರೂಣವನ್ನು ರಕ್ಷಿಸಲು ರಕ್ಷಣಾತ್ಮಕ ಗುರಾಣಿಯಂತೆ ಹೆಚ್ಚು ಸಕ್ರಿಯವಾಗಿರುತ್ತದೆ ಎಂದು ಅಧ್ಯಯನಕಾರರು ಹೇಳಿದ್ದಾರೆ.
ಈ ಅಧ್ಯಯನದಲ್ಲಿ ಕೋವಿಡ್ ಪೀಡಿತ ಗರ್ಭಿಣಿಯಿಂದ ಕೊರೊನಾ ವೈರಸ್ ಭ್ರೂಣಕ್ಕೆ ಪಸರಿಸುವ ವಿಧಾನ ಹೇಗೆ ಎಂಬುದನ್ನು ತಿಳಿಯಲು ಒತ್ತು ನೀಡಲಾಗಿದೆ. ಅಂದರೆ, ಕರುಳುಬಳ್ಳಿಯು ಸೋಂಕು ಪಸರಿಸುವ ಸಾಧ್ಯತೆಯನ್ನು ಕೇಂದ್ರೀಕರಿಸಿ ಈ ಅಧ್ಯಯನ ನಡೆಸಲಾಗಿದೆ.
ಇದಕ್ಕಾಗಿ ಅನೇಕ ಭ್ರೂಣದ ಅಂಗಗಳು ಮತ್ತು ಮಾಸನ್ನು ಪರೀಕ್ಷಿಸಲಾಗಿದೆ. ಪ್ರೋಟಿನ್ ಗ್ರಾಹಕಗಳಾದ ಎಸಿಇ2 ಮತ್ತು ಟಿಎಂಪಿಆರ್ಎಸ್ಎಸ್2ಗಳು ಜೀವಕೋಶಗಳ ಮೇಲೆ ಕುಳಿತುಕೊಳ್ಳುತ್ತವೆ. ಇವು ಸಾರ್ಸ್-ಕೋವಿ-2 ವೈರಸ್ಗೆ ಬೇಕಾದ ಅಂಶಗಳೂ ಆಗಿವೆ. ಆದರೆ, ಇದನ್ನು ತಡೆಯುವ ಶಕ್ತಿ ಗರ್ಭಚೀಲದಲ್ಲಿರುವ ಮಾಸಿಗೆ ಇದೆ. ಆದಗ್ಯೂ ವಿರಳ ಪ್ರಕರಣಗಳಲ್ಲಿ ಮಾಸಿನ ರಕ್ಷಣಾ ಗೋಡೆಯನ್ನು ಭೇದಿಸಿಕೊಂಡು ಸೋಂಕು ಭ್ರೂಣಕ್ಕೆ ತಟ್ಟುವ ಸಂಭವ ಇದೆ ಎಂದು ಅಧ್ಯಯನಕಾರರು ವಿಶ್ಲೇಷಿಸಿದ್ದಾರೆ.
ನವಜಾತ ಶಿಶುಗಳಲ್ಲಿ ಅತ್ಯಧಿಕ ಪ್ರಮಾಣದಲ್ಲಿ ಪ್ರತಿಕಾಯ ಶಕ್ತಿ ಇರುವ ಕಾರಣ ಕೋವಿಡ್ ಸೋಂಕು ತಗುಲುವ ಅಪಾಯ ಕಡಿಮೆ. ಆದರೆ, ತಾಯಿಯು ಸೇರಿದಂತೆ ಅದರ ಆರೈಕೆಯಲ್ಲಿರುವವರು ಅಜಾಗರೂಕತೆ ವಹಿಸಿದರೆ ಈ ಸಂಭವ ಇರುತ್ತದೆ ಎಂದಿದ್ದಾರೆ.
ಇದನ್ನೂ ಓದಿ: Guideline: ಓಮಿಕ್ರೋನ್ ಭೀತಿ – ಸರ್ಕಾರದಿಂದ ಶಿಕ್ಷಣ ಸಂಸ್ಥೆಗಳ ಕಾರ್ಯಕ್ರಮಗಳಿಗೆ ಮಾರ್ಗಸೂಚಿ ಪ್ರಕಟ
Discussion about this post