ವೈರಲ್ ಆಯ್ತು ವಿಭಿನ್ನ ಶೈಲಿಯ ಕ್ರಿಕೆಟ್ ಅಂಪೈರಿಂಗ್! ವಿಡಿಯೊ ನೋಡಿ

ವಿಭಿನ್ನ ಶೈಲಿಯ ಬ್ಯಾಟಿಂಗ್, ಬೌಲಿಂಗ್‌ ಮೂಲಕ ಅನೇಕ ಆಟಗಾರರು ವಿಶ್ವದ ಗಮನ ಸೆಳೆದಿರುವುದು ಹೊಸತಲ್ಲ. ಅದೇ ರೀತಿ ಕೆಲವು ಅಂಪೈರ್‌ಗಳೂ ಹೊಸ ರೀತಿಯಲ್ಲಿ ತೀರ್ಪುಗಳನ್ನು ನೀಡಿದ್ದೂ ಇದೆ.

ವಿನೂತನವಾಗಿ ಬೌಂಡರಿ, ಸಿಕ್ಸರ್, ಔಟ್ ಹಾಗೂ ಇತರ ನಿರ್ಣಯಗಳನ್ನು ನೀಡಿ ಗಮನ ಸೆಳೆದವರ ಪೈಕಿ ಅಗ್ರ ಪಂಕ್ತಿಯಲ್ಲಿ ಕಾಣಿಸುವವರು ನ್ಯೂಜಿಲೆಂಡ್‌ನ ಬಿಲ್ಲಿ ಬೌಡನ್. ಕೆಲವೊಮ್ಮೆ ಬ್ಯಾಟರ್‌ಗಳು ಬೌಂಡರಿ, ಸಿಕ್ಸರ್ ಹೊಡೆದ್ದಕ್ಕಿಂತಲೂ ಬೌಲರ್‌ಗಳು ವಿಕೆಟ್‌ ಪಡೆದಿದ್ದಕ್ಕಿಂತಲೂ ಹೆಚ್ಚು ಇವರ ಅಂಪೈರಿಂಗ್‌ ಅನ್ನೇ ಕ್ರಿಕೆಟ್ ಅಭಿಮಾನಿಗಳು ಸಂಭ್ರಮಿಸುತ್ತಿದ್ದುದೂ ಇದೆ.

ಇದನ್ನೂ ಓದಿ: ICC Test Rankings: ಐಸಿಸಿ ಟೆಸ್ಟ್ ರ್‍ಯಾಂಕಿಂಗ್‌ನಲ್ಲಿ ಮತ್ತೆ ಅಗ್ರ ಸ್ಥಾನಕ್ಕೇರಿದ ಭಾರತ

ಇದೀಗ ವಿಶಿಷ್ಟ ಮಾದರಿಯ ಅಂಪೈರಿಂಗ್ ವಿಡಿಯೊ ತುಣುಕೊಂದು ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದೆ. ‘ಪುರಂದರ್ ಪ್ರೀಮಿಯರ್ ಲೀಗ್’ ಎಂಬ ಹೆಸರಿನ ಕ್ರಿಕೆಟ್ ಟೂರ್ನಿಯಲ್ಲಿ ಅಂಪೈರೊಬ್ಬರು ತಲೆ ಕಳೆಗೆ ಮಾಡಿ ಕಾಲು ಮೇಲೆ ಮಾಡಿ ಅಗಲ ಎಸೆತ (ವೈಡ್) ಎಂದು ನಿರ್ಣಯ ನೀಡುತ್ತಿರುವ ವಿಭಿನ್ನ ಶೈಲಿ ಈ ವಿಡಿಯೊದಲ್ಲಿದೆ. ‘ಪಾಕ್‌ ಪ್ಯಾಷನ್ ಡಾಟ್ ನೆಟ್’ ಜಾಲತಾಣದ ಸಂಪಾದಕ ಸಾಜ್ ಸಾದಿಕ್ ಎಂಬವರು ವಿಡಿಯೊ ಟ್ವೀಟ್ ಮಾಡಿದ್ದು, ಅನೇಕರು ಇದನ್ನು ರಿಟ್ವೀಟ್ ಮಾಡಿದ್ದಾರೆ. ಹಿನ್ನೆಲೆಯಲ್ಲಿ ಹಿಂದಿ ವೀಕ್ಷಕ ವಿವರಣೆಯೂ ಕೇಳಿಸುತ್ತಿದೆ.

ವಿಡಿಯೊ ಇಲ್ಲಿದೆ ನೋಡಿ…

A different style of umpiring #Cricket pic.twitter.com/PZdbB2SUIY

— Saj Sadiq (@SajSadiqCricket) December 5, 2021

ಈ ಕ್ರಿಕೆಟ್ ಟೂರ್ನಿ ಮಹಾರಾಷ್ಟ್ರದಲ್ಲಿ ನಡೆದಿರಬಹುದೆಂದು ಅಂದಾಜಿಸಲಾಗಿದೆ.