ಕಪ್ಪು ಬಣ್ಣಕ್ಕೆ ತಿರುಗಿದ ನದಿ, ಅರುಣಾಚಲದಲ್ಲಿ ಸಾವಿರಾರು ಮೀನುಗಳ ಮಾರಣಹೋಮ

ಇಟಾನಗರ: ಅರುಣಾಚಲ ಪ್ರದೇಶದ ಕಮೆಂಗ್​ ನದಿ ಕಲುಷಿತವಾಗಿರುವ ಕಾರಣ ಪೂರ್ವ ಕಮೆಂಗ್​ ಜಿಲ್ಲೆಯ ಸೆಪ್ಪಾ ಹಳ್ಳಿಯಲ್ಲಿ ನೀರು ಕಪ್ಪಿಟ್ಟಿದೆ. ಇದರಿಂದ ಸಾವಿರಾರು ಮೀನುಗಳು ಅಸುನೀಗಿವೆ. ನೀರು ವಿಷಕಾರಿಯಾಗಲು ನದಿಯ ಮೇಲ್ಭಾಗದಲ್ಲಿ ಚೀನಾ ನಡೆಸುತ್ತಿರುವ ನಿರ್ಮಾಣ ಕಾಮಗಾರಿ ಕಾರಣವೆಂದು ಈ ದುರ್ಘಟನೆ ಸಂಭವಿಸಿದೆ ಎಂದು ಸೆಪ್ಪಾ ಗ್ರಾಮಸ್ಥರು ದೂರಿದ್ದಾರೆ.

ನೀರಿನಲ್ಲಿ ಕರಗುವಂತಹ ವಿಷಕಾರಿ ಅಂಶ (ಟಿಡಿಎಸ್​) ಅಪಾಯಕಾರಿ ಮಟ್ಟದಲ್ಲಿ ಇರುವ ಕಾರಣ ಮೀನುಗಳ ಮಾರಣಹೋಮ ಆಗಿದೆ. ಸತ್ತ ಮೀನುಗಳನ್ನು ತಿನ್ನಬಾರದು ಎಂದು ರಾಜ್ಯ ಮೀನುಗಾರಿಕಾ ಇಲಾಖೆ ಎಚ್ಚರಿಕೆ ನೀಡಿದೆ. ಸೆಪ್ಪಾದಲ್ಲಿ ಪ್ರತಿ ಲೀಟರ್​ ನದಿ ನೀರಿನಲ್ಲಿ 6,800 ಎಂಜಿಯಷ್ಟು ಟಿಡಿಎಸ್​ ಇರುವುದು ದೃಢಪಟ್ಟಿದೆ. ಸಾಮಾನ್ಯವಾಗಿ ಇದು 300ರಿಂದ 1,200 ಎಂಜಿ ಇರಬೇಕು. ಟಿಡಿಎಸ್​ ಪ್ರಮಾಣ ಹೀಗೇ ಮುಂದುವರಿದರೆ ಮೀನುಗಳ ಸಾವಿನ ಸಂಖ್ಯೆ ಲಕ್ಷಕ್ಕೆ ಏರುತ್ತದೆ ಮತ್ತು ನದಿಯ ಕೆಳಪಾತ್ರಕ್ಕೂ ವಿಸ್ತರಿಸುತ್ತದೆ ಎಂದು ಪೂರ್ವ ಕಮೆಂಗ್​ ಜಿಲ್ಲಾ ಮೀನುಗಾರಿಕಾ ಇಲಾಖೆ ಹೇಳಿದೆ.

ಈ ಮಧ್ಯೆ, ಈ ಘಟನೆ ಬಗ್ಗೆ ತನಿಖೆ ನಡೆಸಲು ತಜ್ಞರ ಸಮಿತಿಯನ್ನು ರಚಿಸುವಂತೆ ಪೂರ್ವ ಸೆಪ್ಪಾದ ಶಾಸಕ ತಪುಕ್​ ಟಾಕು ಸರ್ಕಾರವನ್ನು ಆಗ್ರಹಿಸಿದ್ದಾರೆ.
2017ರಲ್ಲಿ ಅರುಣಾಚಲದ ಪಾಸಿಘಾಟ್​ನಲ್ಲಿ ಸಿಯಾಂಗ್​ ನದಿ ನೀರು ಕಪ್ಪು ಬಣ್ಣಕ್ಕೆ ತಿರುಗಿತ್ತು. ನದಿಯ ಮೇಲ್ಪಾತ್ರದ ಸಿಯಾಂಗ್​ನಿಂದ ಕ್ಸಿನ್ಜಿಯಾಂಗ್​ ಪ್ರಾಂತ್ಯದ ತಕ್ಲಾಮಕನ್​ ಮರುಭೂಮಿಗೆ ನೀರು ಒದಗಿಸಲು ಚೀನಾ 10,000 ಕಿ.ಮೀ. ಉದ್ದದ ಸುರಂಗ ನಿಮಿರ್ಸುತ್ತಿದ್ದ ಕಾರಣ ನದಿ ಕಲುಷಿತವಾಗಿದೆ ಎಂದು ಕಾಂಗ್ರೆಸ್​ ಶಾಸಕ ನಿನೊಂಗ್​ ಇರಿಂಗ್​ ಆಪಾದಿಸಿದ್ದರು.

ಈ ಬಗ್ಗೆ ಪ್ರಧಾನಿ ನರೇಂದ್ರ ಮೋದಿ ಮಧ್ಯಪ್ರವೇಶ ಮಾಡಬೇಕು ಎಂದೂ ಆಗ್ರಹಿಸಿದ್ದರು. ಆದರೆ, ಚೀನಾ ಈ ಆರೋಪವನ್ನು ಅಲ್ಲಗಳೆದಿತ್ತು.

Fish Dies in Arunalchal Pradesh River Due to Water Pollution

ಇದನ್ನೂ ಓದಿ: ಅರುಣಾಚಲ ಪ್ರದೇಶದ ಎಲ್​​ಎಸಿ ಸಮೀಪ ಭಾರತ-ಚೀನಾ ಸೈನಿಕರ ಸಂಘರ್ಷ
ಇದನ್ನೂ ಓದಿ: ಅರುಣಾಚಲದ ಎಲ್‌ಎಸಿಯಲ್ಲಿ ಶಸ್ತ್ರಾಸ್ತ್ರಗಳ ಸಂಖ್ಯೆ ಹೆಚ್ಚಳ