ಬಾಲ್ಯಾವಸ್ಥೆಯಲ್ಲಿ ಮಕ್ಕಳ ಮೆದುಳಿನಲ್ಲಿ ಅನೇಕ ಬೆಳವಣಿಗೆ ಹಾಗೂ ಬದಲಾವಣೆಗಳುಂಟಾಗುತ್ತವೆ. ಮಕ್ಕಳ ಜ್ಞಾಪಕಶಕ್ತಿ, ಏಕಾಗ್ರತೆ, ಹಾಗೂ ಮೆದುಳಿನ ಕಾರ್ಯಕ್ಷಮತೆಯು ಉತ್ತಮ ರೀತಿಯಲ್ಲಿ ಬೆಳವಣಿಗೆಯಾಗಲು ಗುಣಮಟ್ಟದ ಪೌಷ್ಠಿಕ ಆಹಾರ ಮುಖ್ಯಪಾತ್ರ ವಹಿಸುತ್ತದೆ. ಮಕ್ಕಳು ರುಚಿಕರ ಆಹಾರವನ್ನು ಹೆಚ್ಚು ಇಷ್ಟಪಟ್ಟು ತಿನ್ನುವುದರಿಂದ ಹೆಚ್ಚಿನ ವೇಳೆ ಪೌಷ್ಠಿಕ ಆಹಾರಗಳು ಇಷ್ಟವಾಗದೇ ಇವುಗಳಿಂದ ವಂಚಿತರಾಗುತ್ತಾರೆ. ಇದರಿಂದಾಗಿ, ಮಕ್ಕಳ ಮೆದುಳಿನ ಶಕ್ತಿ ವೃದ್ಧಿಯಾಗಲು ಹಿನ್ನೆಡೆಯಾಗುತ್ತದೆ. ಆದ್ದರಿಂದ, ಪೋಷಕರು ತಮ್ಮ ಮಕ್ಕಳಿಗೆ ನೀಡುವ ಆಹಾರದ ವಿಷಯದಲ್ಲಿ ವಿಶೇಷ ಗಮನ ನೀಡಿ ಪೌಷ್ಠಿಕ ಆಹಾರಗಳನ್ನು ಹೆಚ್ಚು-ಹೆಚ್ಚು ನೀಡಬೇಕಾದ ಅವಶ್ಯಕತೆಯಿದೆ.
1. ಮೊಟ್ಟೆಗಳು: ನಿಮ್ಮ ಮಕ್ಕಳ ಉಪಹಾರದಲ್ಲಿ ಕಾರ್ಬೋಹೈಡ್ರೇಟ್ಗಳು, ಪ್ರೋಟೀನ್, ಮತ್ತು ಸ್ವಲ್ಪ ಪ್ರಮಾಣದ ಆರೋಗ್ಯಕರ ಕೊಬ್ಬನ್ನು ಸೇರಿಸುವುದು ಅವರಿಗೆ ದಿನವಿಡೀ ಶಕ್ತಿಯುತವಾಗಿರಲು ಸಹಾಯ ಮಾಡುತ್ತದೆ. ಮೊಟ್ಟೆಯಲ್ಲಿ ಹೆಚ್ಚಿನ ಪ್ರೋಟೀನ್ ಇರುವುದಲ್ಲದೇ ಹೆಚ್ಚುವರಿ ಬೋನಸ್ ರೂಪದಲ್ಲಿ ಕೋಲಿನ್ ಎಂಬ ಪದಾರ್ಥವನ್ನೂ ಹೊಂದಿದ್ದು ಇದು ಮಕ್ಕಳ ಜ್ಞಾಪಕಶಕ್ತಿಯ ಬೆಳವಣಿಗೆಗೆ ಸಹಾಯ ಮಾಡುತ್ತದೆ.
2. ಮೀನು: ಇವು ಒಮೆಗಾ-3 ಫ್ಯಾಟ್ಟಿ ಆಸಿಡ್ಸ್ಅನ್ನು (ಕೊಬ್ಬಿನಾಮ್ಲ) ಹೆಚ್ಚಿನ ಪ್ರಮಾಣದಲ್ಲಿ ಹೊಂದಿದ್ದು ಇದು ಮಕ್ಕಳ ಸಾಮಾನ್ಯ ಆರೋಗ್ಯ ಹಾಗೂ ಮೆದುಳಿನ ಆರೋಗ್ಯಕ್ಕೆ ಬಹಳ ಉಪಯುಕ್ತವಾಗಿದೆ. ಸಾಲ್ಮನ್, ಬಂಗಡೆ, ಫ್ರೆಷ್ ಟುನ (ಗೆದರೆ), ಬೂತಾಯಿ, ಮತ್ತು ಸೋಧಿ ಮೀನುಗಳಲ್ಲಿ ಇದು ಜಾಸ್ತಿ ಪ್ರಮಾಣದಲ್ಲಿದ್ದು ಕನಿಷ್ಠ ವಾರಕ್ಕೊಮ್ಮೆಯಾದರೂ ಇದನ್ನು ಮಕ್ಕಳ ಆಹಾರದಲ್ಲಿರುವಂತೆ ನೋಡಿಕೊಳ್ಳಬೇಕು.
3. ಓಟ್ಸ್ಮೀಲ್ (ತೋಕೆಗೋಧಿ): ಇದು ಮೆದುಳಿನ ಶಕ್ತಿಯನ್ನು ಹೆಚ್ಚಿಸಲು ಬಹಳ ಉಪಯುಕ್ತವಾಗಿದ್ದು ಹೆಚ್ಚಿನ ಫೈಬರ್ ಅಂಶವನ್ನು ಹೊಂದಿರುತ್ತದೆ. ಇದನ್ನು ತಿಂದಾಗ ಮಕ್ಕಳಿಗೆ ಹೊಟ್ಟೆತುಂಬಿದಂತಿದ್ದು ಇನ್ನಿತರ ಕುರುಕು ತಿಂಡಿಗಳನ್ನು ತಿನ್ನಬೇಕೆನಿಸುವುದಿಲ್ಲ. ಇದರಲ್ಲಿ ವಿಟಮಿನ್ ಬಿ-ಕಾಂಪ್ಲೆಕ್ಸ್, ವಿಟಮಿನ್ ಇ, ಮತ್ತು ಸತುವಿನ ಅಂಶ ಅತಿ ಹೆಚ್ಚಿನ ಪ್ರಮಾಣದಲ್ಲಿದ್ದು ಮಕ್ಕಳ ಮೆದುಳು ಉತ್ತಮವಾಗಿ ಬೆಳವಣಿಗೆಯಾಗಲು ಹಾಗೂ ಕೆಲಸಮಾಡಲು ಸಹಾಯ ಮಾಡುತ್ತದೆ. ಇದರೊಂದಿಗೆ ಅಲಂಕಾರಿಕವಾಗಿ ಸೇಬಿನ ಹಣ್ಣಿನ ಚೂರುಗಳು, ಬಾಳೆಹಣ್ಣು, ಕಪ್ಪುದ್ರಾಕ್ಷಿ, ಮತ್ತು ಬಾದಾಮಿಗಳನ್ನು ಬಳಸುವುದು ಇನ್ನೂ ಉಪಯುಕ್ತ.
4. ವಿವಿಧ ಬಣ್ಣದ ತರಕಾರಿಗಳು: ಬಣ್ಣದ ತರಕಾರಿಗಳಲ್ಲಿ ಆಂಟಿಆಕ್ಸಿಡೆಂಟ್ಗಳು ಹೆಚ್ಚಿನ ಪ್ರಮಾಣದಲ್ಲಿದ್ದು ಮಕ್ಕಳ ಮೆದುಳನ್ನು ಉತ್ತಮ ಆರೋಗ್ಯದಿಂದಿರಸಲು ಅತ್ಯವಶ್ಯಕವಾಗಿರುತ್ತವೆ. ಟೊಮ್ಯಾಟೋ, ಆಲೂಗಡ್ಡೆ, ಕುಂಬಳಕಾಯಿ, ಕ್ಯಾರೆಟ್, ಮತ್ತು ಹಸಿರು ತೊಪ್ಪು ಮತ್ತು ಹಸಿರು ತರಕಾರಿಗಳಲ್ಲಿ ಇವು ಹೆಚ್ಚಿನ ಪ್ರಮಾಣದಲ್ಲಿರುತ್ತವೆ. ಸ್ಫಾಗೆಟ್ಟಿ, ಸಾಸ್ಗಳು, ಮತ್ತು ಸೂಪ್ಗಳಲ್ಲಿ ಇವುಗಳನ್ನು ಉಪಯೋಗಿಸಿದಾಗ ಹೆಚ್ಚು ಉಪಯುಕ್ತವಾಗುತ್ತದೆ.
5. ಹಾಲು, ಮೊಸರು ಮತ್ತು ಗಿಣ್ಣು: ಇವುಗಳಲ್ಲಿ ಪ್ರೋಟೀನ್ ಮತ್ತು ವಿಟಾಮಿನ್ ಬಿ ಗಳು ಹೆಚ್ಚಿನ ಪ್ರಮಾಣದಲ್ಲಿದ್ದು ಮೆದುಳಿನ ಕೋಶಗಳು, ನರಪ್ರೇಕ್ಷಕಗಳು (neruotransmitters), ಮತ್ತು ಕಿಣ್ವಗಳ ಬೆಳವಣಿಗೆಯಲ್ಲಿ ಅತ್ಯಂತ ಸಹಾಯಕವಾಗಿವೆ. ಇವುಗಳಲ್ಲಿ ಕ್ಯಾಲ್ಷಿಯಂ ಹೆಚ್ಚಿನ ಪ್ರಮಾಣದಲ್ಲಿದ್ದು ಇದು ಮಕ್ಕಳ ಹಲ್ಲು ಮತ್ತು ಮೂಳೆಗಳ ಉತ್ತಮ ಬೆಳವಣಿಗೆಗೆ ಕಾರಣವಾಗುತ್ತವೆ.
6. ಹುರುಳಿಕಾಯಿ: ಇದರಲ್ಲಿ ಪ್ರೋಟೀನ್, ವಿಟಮಿನ್ಗಳು, ಮತ್ತು ಖನಿಜಾಂಶ ಹೆಚ್ಚಿನ ಪ್ರಮಾಣದಲ್ಲಿದ್ದು ಒಮೆಗಾ-3 ಅಂಶವೂ ಸೇರಿ ಮೆದುಳಿನ ಬೆಳವಣಿಗೆ ಮತ್ತು ಕಾರ್ಯಕ್ಷಮತೆಗೆ ಉಪಯುಕ್ತವಾಗಿದೆ.
ಮೇಲ್ಕಂಡ ಪದಾರ್ಥಗಳನ್ನು ನಿಮ್ಮ ಮಕ್ಕಳ ಆಹಾರಪದ್ಧತಿಯಲ್ಲಿ ಸೇರಿಸಿ ಅವರ ಮೆದುಳಿನ ಆರೋಗ್ಯ ಹಾಗೂ ಕಾರ್ಯಕ್ಷಮತೆಗಳನ್ನು ಉತ್ತಮ ಸ್ಥಿತಿಯಲ್ಲಿರುಸುವತ್ತ ಗಮನ ಹರಿಸಿ. ಯಾವುದೇ ನಿರ್ಧಾರವನ್ನು ತೆಗೆದುಕೊಳ್ಳುವ ಮೊದಲು ನಿಮ್ಮ ವೈದ್ಯರ ಸಲಹೆಯನ್ನು ಪಡೆದುಕೊಳ್ಳಿ.
Five foods which can boost your childrens’ brain health and functioning
ಇದನ್ನೂ ಓದಿ: ಪರಿಸರ ಸ್ವಚ್ಚವಾಗಿದ್ದಾಗ ಉತ್ತಮ ಆರೋಗ್ಯ
ಇದನ್ನೂ ಓದಿ: ಮಾಜಿ ಪ್ರಧಾನಿ ಮನಮೋಹನ್ ಸಿಂಗ್ ಆರೋಗ್ಯದಲ್ಲಿ ಏರುಪೇರು
Discussion about this post