ನೀವು ನಿಯಮಿತವಾಗಿ ಟಿವಿ ನೋಡುವವರಾಗಿದ್ದರೆ ಪೆಟ್ರೋಲಿಯಂ ಜೆಲ್ಲಿ (ವ್ಯಾಸಲಿನ್), ಮಾಯಿಶ್ಚರೈಸರ್ ಕ್ರೀಮ್ ಜಾಹೀರಾತುಗಳು ಹೆಚ್ಚಾಗಿ ಕಾಣಿಸಿಕೊಂಡ ತಕ್ಷಣ ಚಳಿಗಾಲ ಹತ್ತಿರದಲ್ಲಿದೆ ಎಂದು ಸುಲಭವಾಗಿ ಅರ್ಥ ಮಾಡಿಕೊಳ್ಳುವಿರಿ. ವಾತಾವರಣದ ಬದಲಾವಣೆ ನಮಗೆ ಅರಿವಾಗುವ ಮೊದಲೇ ಟಿವಿ ತೆರೆಯ ಮೇಲೆ ಚಳಿಗಾಲದ ಜಾಹೀರಾತುಗಳು ಕಾಣಿಸಲು ಆರಂಭವಾಗುತ್ತದೆ. ಈಗೇನೋ ಗುಲಾಬ್ ಚಂಡಮಾರುತದ ಪ್ರಭಾವದಿಂದ ಕರ್ನಾಟಕದ ಬಹುತೇಕ ಜಿಲ್ಲೆಗಳಲ್ಲಿ ಮಳೆಯಾಗುತ್ತಿದೆ. ಇನ್ನೊಂದು ವಾರದಲ್ಲಿ ಚಂಡಮಾರುತದ ಪ್ರಭಾವ ಇಳಿದರೆ ಋತುಮಾನಕ್ಕೆ ತಕ್ಕ ಹವಾಮಾನ ಅನುಭವಕ್ಕೆ ಬಂದು, ಚಳಿಗಾಲದ ಮುನ್ಸೂಚನೆ ಸಿಗಬಹುದು.
ಪ್ರತಿ ವರ್ಷದಂತೆ ಈ ವರ್ಷವೂ ನಾವು ಚಳಿಗಾಲಕ್ಕೆ ತಯಾರಾಗಬೇಕಿದೆ. ಅಟ್ಟ ಅಥವಾ ವಾರ್ಡ್ರೋಬ್ ಸೇರಿರುವ ಸ್ವೆಟರ್-ಟೋಪಿಗಳನ್ನು ಸಿದ್ಧಪಡಿಸುವ ಜೊತೆಗೆ ಚರ್ಮದ ಆರೈಕೆಗೆ ಏನೆಲ್ಲಾ ಬೇಕು ಎಂಬ ಬಗ್ಗೆಯೂ ನಾವು ಗಮನ ಹರಿಸಬೇಕಿದೆ. ಚಳಿಗಾಲ ಎಂದಾಕ್ಷಣ ಮೊದಲು ನೆನಪಿಗೆ ಬರುವುದು ಒಣಗಿದ ಚರ್ಮ, ತುರಿಕೆ. ಒಣ ಚರ್ಮವು ಪುಡಿಯಾಗಿ ಉದುರುವುದು ಮುಜುಗರದ ಸಂಗತಿ ಎನ್ನುವುದು ನಿಜ. ಆದರೆ ಅದರಿಂದ ತಪ್ಪಿಸಿಕೊಳ್ಳಲು ಅಗುವುದಿಲ್ಲವಲ್ಲ. ಚಳಿಗಾಲದಲ್ಲಿ ಸಾಮಾನ್ಯವಾಗಿ ಸೂರ್ಯನ ಬಿಸಿಲಿಗೆ ತೆರೆದುಕೊಂಡಾಗ ಚರ್ಮದಲ್ಲಿ ಬಿರುಕು ಕಾಣಿಸಿಕೊಳ್ಳುತ್ತದೆ. ವಾತಾವರಣದ ಬದಲಾವಣೆಯ ಜೊತೆಗೆ ವಿಟಮಿನ್ ಸಿ ಕೊರತೆಯೂ ಚರ್ಮದ ಸಮಸ್ಯೆಗೆ ಕಾರಣ ಎನ್ನುವುದು ತಜ್ಞರ ಅಭಿಪ್ರಾಯ.
ಚರ್ಮದ ಕಾಂತಿ ಹೆಚ್ಚಿಸುವಲ್ಲಿ ವಿಟಮಿನ್ ಸಿ ಮುಖ್ಯ ಪಾತ್ರ ವಹಿಸುತ್ತದೆ. ಚರ್ಮದ ಕೋಶಗಳ ಬಲವರ್ಧನೆಯಲ್ಲೂ ಇದರ ಪಾತ್ರ ಪ್ರಮುಖವಾದುದು. ಹವಾಮಾನ ವೈಪರಿತ್ಯದಿಂದ ಬರುವ ಚರ್ಮದ ಹಲವು ಸಮಸ್ಯೆಗಳಿಗೆ ವಿಟಮಿನ್ ಸಿ ಉತ್ತಮ ಮದ್ದು.
ವಾತಾವರಣದ ಪ್ರಭಾವದಿಂದ ಉಂಟಾಗುವ ಚರ್ಮ ಸಂಬಂಧಿ ಸಮಸ್ಯೆಗಳಿಗೆ ವಿಟಮಿನ್ ಸಿ ಕಾರಣವಾಗಿರಬಹುದು. ಸೂರ್ಯನ ಬಿಸಿಲು ಚರ್ಮದ ಮೇಲೆ ನೇರವಾಗಿ ಬಿದ್ದಾಗ ಸೂರ್ಯನ ಬಿಸಿಲಿನಲ್ಲಿರುವ ಅತಿನೇರಳೆ ಕಿರಣಗಳಿಂದ ನಮ್ಮ ಆರೋಗ್ಯಕ್ಕೆ ಹಾನಿಯಾಗುತ್ತದೆ. ಇಂಥ ಹಾನಿಗಳಿಂದ ವಿಟಮಿನ್ ಸಿ ನಮ್ಮ ಚರ್ಮವನ್ನು ಕಾಪಾಡುತ್ತದೆ. ಇದು ಚರ್ಮದ ಕೋಶಗಳ ಬಲವನ್ನು ಹೆಚ್ಚಿಸಿ, ಅತಿನೇರಳೆ ಕಿರಣಗಳ ಬಾಧೆ ತಡೆಯುತ್ತದೆ.
ಚಳಿಗಾಲದಲ್ಲಿ ಬಿರುಕು ಬಿಡುವ ಅಥವಾ ಒಡೆಯುವ ಚರ್ಮಕ್ಕೆ ಹಾಗೂ ಚರ್ಮದಲ್ಲಿ ಹೆಚ್ಚಿನ ಪ್ರಮಾಣದಲ್ಲಿ ಜಿಡ್ಡಿನ ಅಂಶದ ಸಮಸ್ಯೆಯನ್ನೂ ವಿಟಮಿನ್ ಸಿ ತಡೆಯುತ್ತದೆ. ಚರ್ಮದಲ್ಲಿರುವ ಹೆಚ್ಚುವರಿ ಜಿಡ್ಡಿನ ಅಂಶವನ್ನು ತೆಗೆದುಹಾಕುವುದರ ಜೊತೆಗೆ, ಚರ್ಮವನ್ನು ನುಣುಪುಗೊಳಿಸುತ್ತದೆ. ಉರಿ ಚರ್ಮದ ಬಾಧೆಯನ್ನೂ ಕಡಿಮೆ ಮಾಡುತ್ತದೆ.
ಚರ್ಮದಲ್ಲಿನ ಕಲೆಗಳನ್ನು ತಡೆಯುವುದರಲ್ಲಿ ವಿಟಮಿನ್ ಸಿ ಪ್ರಮುಖ ಪಾತ್ರ ವಹಿಸುತ್ತದೆ. ಇದರಲ್ಲಿರುವ ಟೈರೊಸಿನೇಸ್ ಎನ್ನುವ ಅಂಶವು ಈ ಕೆಲಸವನ್ನು ಮಾಡುತ್ತದೆ. ಸಿ ವಿಟಮಿನ್ನಲ್ಲಿರು ಮ್ಯಾಗ್ನೇಷಿಯಂ ಅಸ್ಕೊರೊಬೈಲ್ ಫಾಸ್ಪೇಟ್ ಚರ್ಮ ಒಣಗುವುದನ್ನು ತಡೆಗಟ್ಟುತ್ತದೆ. ಚರ್ಮವು ತೇವವನ್ನು ಹಿಡಿದಿಟ್ಟುಕೊಳ್ಳುವಂತೆ ಮಾಡುತ್ತದೆ. ಚರ್ಮದ ಆರೋಗ್ಯಕ್ಕೆ ಪೂರಕವಾಗಿರುವ ಕೊಲಿಜನ್ ಪ್ರೊಟೀನ್ ಅಂಶವನ್ನು ವಿಟಮಿನ್ ಸಿ ಹೆಚ್ಚಿಸುತ್ತದೆ.
ವಿಟಮಿನ್ ಸಿ ಅಂಶ ಹೆಚ್ಚಾಗಿರುವ ಕಿತ್ತಳೆ, ಪೇರಳೆ, ಕಿವಿ, ಪಪಾಯ, ಸ್ಟ್ರಾಬೆರಿ, ನಿಂಬೆಹಣ್ಣುಗಳನ್ನು ನಮ್ಮ ಆಹಾರ ಪದ್ಧತಿಯ ಭಾಗವಾಗಿಸಿಕೊಳ್ಳುವುದು ಲಾಭಕರ. ಚರ್ಮದ ಆರೋಗ್ಯಕ್ಕೂ ಇದು ಪೂರಕ. ವಿಟಮಿನ್ ಸಿ ಕೊರತೆ ಎದುರಿಸುತ್ತಿರುವವರು ಪೂರಕ ಪೋಷಕಾಂಶದ ಮಾತ್ರೆ ಅಥವಾ ಟಾನಿಕ್ ಸೇವಿಸುವುದು ಒಳ್ಳೆಯದು.
(ಮಾಹಿತಿ: ವಿವಿಧ ವೆಬ್ಸೈಟ್ಗಳು)
Health Beauty Vitamin C is the Remedy for Dry Skin Itching
ಇದನ್ನೂ ಓದಿ: ದಿನನಿತ್ಯದ ಕಠಿಣ ವ್ಯಾಯಾಮವೇ ಸೋಹಾ ಅಲಿಖಾನ್ ಉತ್ತಮ ಆರೋಗ್ಯದ ಗುಟ್ಟು
ಇದನ್ನೂ ಓದಿ: ಆರೋಗ್ಯವೇ ಭಾಗ್ಯ ಎನ್ನುವ ಮಾತಿನಂತೆ ಮನುಷ್ಯನಿಗೆ ಹಣಕ್ಕಿಂತ ಆರೋಗ್ಯ ಸಂಪತ್ತು ಅತಿ ಮುಖ್ಯವಾದುದು
Discussion about this post