ನವದೆಹಲಿ: ಈಗಿನ ವೇಗದ ಬದುಕಿನಲ್ಲಿ ಕೆಲಸ ಒತ್ತಡದ ಕಾರಣ ಮನುಷ್ಯ ಬಹುಮುಖಿ ಒತ್ತಡಕ್ಕೆ ಒಳಗಾಗುತ್ತಿದ್ದಾನೆ. ಇದರಿಂದ ಆತನ ಕೆಲಸ-ಕಾರ್ಯದಲ್ಲಿ ನಿಖರತೆ ಕ್ಷೀಣಿಸುತ್ತಿದೆ. ಇದನ್ನು ಹೋಗಲಾಡಿಸಲು ದೇಹಾರೋಗ್ಯದ ಜತೆಗೆ ಮಾನಸಿಕ ಆರೋಗ್ಯವನ್ನೂ ಉತ್ತಮವಾಗಿ ಇರಿಸಿಕೊಳ್ಳಬೇಕು. ಆರೋಗ್ಯಪೂರ್ಣ ಬದುಕಿಗೆ ಪ್ರಶಾಂತ ಮನಸ್ಥಿತಿ ಅತಿ ಮುಖ್ಯ. ಮಾನಸಿಕ ಆರೋಗ್ಯ ಕೆಟ್ಟರೆ ದೇಹಾರೋಗ್ಯವೂ ಹಾಳಾಗುತ್ತದೆ. ಹೀಗಾಗಿ ಮಾನಸಿಕ ಆರೋಗ್ಯವನ್ನು ಕಾಪಾಡಿಕೊಳ್ಳುವಂತಹ ನಿತ್ಯ 2 ನಿಮಿಷ ಮಾಡುವ ವ್ಯಾಯಾಮದ ಸಲಹೆ ಇಲ್ಲಿದೆ.
ಸಮರ್ಥವಾಗಿ ಕಾರ್ಯನಿರ್ವಹಿಸಬೇಕಿದ್ದರೆ, ಮನಸ್ಸು ಪ್ರಫುಲ್ಲವಾಗಿರಬೇಕು. ಇದನ್ನು ಸಾಧಿಸಬೇಕಿದ್ದರೆ ನಿತ್ಯದ ಒತ್ತಡಗಳನ್ನು ನಿಯಂತ್ರಣದಲ್ಲಿ ಇರಿಸಿಕೊಳ್ಳಬೇಕು. ಇದಕ್ಕಾಗಿ ಎರಡು ನಿಮಿಷದ ಮಾನಸಿಕ ವ್ಯಾಯಾಮವನ್ನು ಮಾಡಬೇಕು. ಇದನ್ನು ಎಲ್ಲಿಯಾದರೂ, ಯಾವ ಸಮಯದಲ್ಲಾದರೂ ಮಾಡಬಹುದು.
1) ಕಣ್ಣು ಮುಚ್ಚಿ ದೀರ್ಘವಾಗಿ ಉಸಿರಾಡಬೇಕು. ಈ ಸಮಯದಲ್ಲಿ ಮನಸ್ಸಿನಲ್ಲಿ ಉದ್ವೇಗ ಇರಬಾರದು. ಪ್ರಶಾಂತ ಸ್ಥಳದಲ್ಲಿ ಇದನ್ನು ಮಾಡಿದರೆ ಹೆಚ್ಚು ಪರಿಣಾಮಕಾರಿ ಎನ್ನುತ್ತಾರೆ ಮಾನಸಿಕ ಸಮಾಲೋಚಕಿ ಸರಳಾ ತೋತ್ಲಾ.
2) ಸಮಯದ ಬಿಡುವಿಲ್ಲದೆ ನಡೆಯುವ ಮೀಟಿಂಗ್‌ಗಳಿಂದ ಹೈರಾಣರಾಗಿದ್ದರೆ, ಎರಡು ಮೀಟಿಂಗ್‌ ಮಧ್ಯೆ ಎರಡೇ ನಿಮಿಷ ಬಿಡುವು ಮಾಡಿಕೊಂಡು ನಿಶ್ಶಬ್ದ ಸ್ಥಳದಲ್ಲಿ ಕುಳಿತು ದೀರ್ಘಶ್ವಾಸ ತೆಗೆದುಕೊಂಡು ನಿಧಾನವಾಗಿ ಬಿಡಿ.
3) ಪ್ರಾಣಾಯಾಮದ ಅಭ್ಯಾಸ ಇದ್ದರೆ ಇನ್ನು ಒಳ್ಳೆಯದು. ಈ ರೀತಿ ಮಾಡುವುದಿರಂದ ಮುಂದಿನ ಸಭೆಯಲ್ಲಿ ಉಲ್ಲಾಸವಾಗಿರುತ್ತೀರಿ ಎಂದು ಅವರು ಸಲಹೆ ನೀಡಿದ್ದಾರೆ.
4) ಒತ್ತಡದಿಂದ ಹೊರಗಿರಲು ಒಂದೇ ಸಮಯದಲ್ಲಿ ಹಲವು ಕೆಲಸವನ್ನು ಮಾಡಬೇಡಿ. ಒಂದೇ ಕಾರ್ಯವನ್ನು ನಿಗಾ ಇಟ್ಟು ಮಾಡಿ. ನಾಳಿನ ಕೆಲಸಗಳ ಪಟ್ಟಿಯನ್ನು ಹಿಂದಿನ ದಿನ ರಾತ್ರಿಯೇ ಮಾಡಿಕೊಂಡರೆ ಬೆಳಗ್ಗೆ ಧಾವಂತ, ಗೊಂದಲ ಇರುವುದಿಲ್ಲ.
5) ಆಶಾವಾದಿಯಾಗಿರಿ, ಸಾಕಷ್ಟು ನಿದ್ರೆ ಮಾಡಿ ಎಂದೂ ಸರಳಾ ಹೇಳುತ್ತಾರೆ.
Discussion about this post