ಓಮಿಕ್ರಾನ್‌ ಸೋಂಕು ಹೆಚ್ಚಳದ ನಡುವೆಯೂ ಭುವನ ಸುಂದರಿ ಸ್ಪರ್ಧೆಗೆ ಇಸ್ರೇಲ್‌ ಆತಿಥ್ಯ

ಜೆರುಸಲೇಂ: ಕೋವಿಡ್‌-19 ಸೋಂಕಿನ ಹೊಸ ರೂಪಾಂತರ ಓಮಿಕ್ರಾನ್‌ ತಡೆಯಲು ಅನೇಕ ದೇಶಗಳ ನಿರ್ಬಂಧ ಕ್ರಮಗಳನ್ನು ಕೈಗೊಳ್ಳುತ್ತಿವೆ. ಇಸ್ರೇಲ್‌ ಕೂಡ ವಿದೇಶಿಗರ ಆಗಮನವನ್ನು ನಿರ್ಬಂಧಿಸಿದೆ. ಆದರೂ ಡಿಸೆಂಬರ್ 12ಕ್ಕೆ ಭುವನ ಸುಂದರಿ ಸ್ಪರ್ಧೆ ಅಭಾದಿತ ಎಂದು ಇಸ್ರೇಲ್‌ ಸರ್ಕಾರ ಹೇಳಿದೆ. Israel hosts the World Beauty Contest amid an increase in Omicron infection

ಐಲಾಟ್‌ನ ರೆಸ್‌ ಸೀ ರೆಸಾರ್ಟ್‌ನಲ್ಲಿ ಈ ಕಾರ್ಯಕ್ರಮ ಸಂಘಟನೆಯಾಗಿದ್ದು, ಪ್ರಯಾಣ ನಿರ್ಬಂಧ ಇದ್ದರೂ ಈಗಾಗಲೇ ನಿಗದಿಯಾದಂತೆ ಸೀಮಿತ ಸಂಖ್ಯೆ ಜನರ ಭಾಗಿಯಾಗುವಿಕೆ ಮೂಲಕ ಕಾರ್ಯಕ್ರಮ ನಡೆಯಲಿದೆ. ಅಗತ್ಯ ಮುನ್ನೆಚ್ಚರಿಕಾ ಕ್ರಮಗಳನ್ನು ಪಾಲಿಸಿಯೇ ಸ್ಪರ್ಧೆ ನಡೆಸಲಾಗುತ್ತಿದೆ ಎಂದು ಪ್ರವಾಸೋದ್ಯಮ ಸಚಿವ ಯೊಯೆಲ್‌ ರಾಜ್ವೊಜೊವ್‌ ಹೇಳಿದ್ದಾರೆ. ಈ ಕಾರ್ಯಕ್ರಮಕ್ಕಾಗಿಯೇ ಬರುವ ಸ್ಪರ್ಧಿಗಳು ಮತ್ತು ಇನ್ನಿತರ ಕಡಿಮೆ ಸಂಖ್ಯೆ ಜನರನ್ನು ಕೋವಿಡ್‌ ಟೆಸ್ಟ್‌ಗೆ ಒಳಪಡಿಸಲಾಗುವುದು. ಅವರ ಟ್ರಾವಲ್‌ ಹಿಸ್ಟರಿಯನ್ನು ಕೂಲಂಕುಷವಾಗಿ ಪರೀಕ್ಷಿಸಲಾಗುವುದು. ಅವರು ಕಾರ್ಯಕ್ರಮ ನಡೆಯುವ ಸ್ಥಳ ಬಿಟ್ಟು ಬೇರೆಡೆಗೆ ತೆರಳದಂತೆ ಸೆಲ್‌ಫೋನ್‌ ಕಣ್ಗಾವಲನ್ನು ಏರ್ಪಡಿಸಲಾಗುವುದು

ಪ್ರತಿ 48 ಗಂಟೆಗೊಮ್ಮೆ ಪಿಸಿಆರ್‌ ಪರೀಕ್ಷೆಗೆ ಒಳಪಡಿಸಲಾಗುವುದು ಎಂದು ಹೇಳಿದ್ದಾರೆ. ಭುವನ ಸುಂದರಿ ಸ್ಪರ್ಧೆಯನ್ನು 174 ದೇಶಗಳಲ್ಲಿ ನೇರವಾಗಿ ಪ್ರಸಾರ ಮಾಡಲಾಗುವುದು. ಪೂರ್ವ ನಿಗದಿಯಂತೆ ಕೋವಿಡ್‌ನ ಎಲ್ಲ ಮುನ್ನೆಚ್ಚರಿಕಾ ಕ್ರಮಗಳನ್ನು ಕೈಗೊಂಡು ಕಾರ್ಯಕ್ರಮವನ್ನು ಯಶಸ್ವಿಯಾಗಿ ನಡೆಸಲಾಗುವುದು ಎಂದು ತಿಳಿಸಿದ್ದಾರೆ.

“ಮಿಸ್‌ ಯೂನಿವರ್ಸ್‌ ಸ್ಪರ್ಧೆಗಾಗಿಯೇ ವಿಶೇಷ ಸುರಕ್ಷತಾ ಕ್ರಮಗಳನ್ನು ಕೈಗೊಳ್ಳಲಾಗಿದೆ. ಕಾರ್ಯಕ್ರಮದಲ್ಲಿ ಭಾಗವಹಿಸುವವರ ಸಂಖ್ಯೆಯನ್ನು ಗಣನೀಯವಾಗಿ ಮಿತಗೊಳಿಸಲಾಗಿದೆ” ಎಂದು ಆರೋಗ್ಯ ಸಚಿವಾಲಯದ ಉನ್ನತಾಧಿಕಾರಿಯೊಬ್ಬರು ಸಂಸದೀಯ ಸಮಿತಿಗೆ ತಿಳಿಸಿದ್ದಾರೆ. ಇಸ್ರೇಲ್‌ನಲ್ಲಿ ಒಂದು ಓಮಿಕ್ರಾನ್‌ ಪ್ರಕರಣ ಪತ್ತೆಯಾದ ನಂತರ ಈ ಸಮಿತಿ ಸ್ಪರ್ಧೆ ಬಗ್ಗೆ ಆತಂಕ ವ್ಯಕ್ತಪಡಿಸಿತ್ತು.

ಇದನ್ನೂ ಓದಿ: ಇನ್‌ಸ್ಟಾಗ್ರಾಂನಲ್ಲಿ ಹವಾ ಸೃಷ್ಟಿಸಿದ ದಿಶಾ ಪಟಾನಿ ‘ಮಿಸ್ಸಿಂಗ್’ ಫೋಟೊ!