ಬಿಡುಗಡೆಯಾದ ಎರಡೇ ದಿನಗಳಲ್ಲಿ 113 ಕೋಟಿ ಬಾಚಿದ ರಜಿನೀಕಾಂತ್‌ರ “ಅಣ್ಣಾತೆ”

ಶುಭ ದೀಪಾವಳಿಯ ಸಂದರ್ಭದಲ್ಲಿ ಕಳೆದ ಗುರುವಾರವಷ್ಟೇ ಬಿಡುಗಡೆಯಾದ ತಮಿಳು ಪ್ರೇಕ್ಷಕರ ಆರಾಧ್ಯದೈವ ರಜನೀಕಾಂತ್‌ರ “ಅಣ್ಣಾತೆ” ಕೇವಲ ಎರಡೇ ದಿನಗಳ ಪ್ರದರ್ಶನದ ನಂತರ 113 ಕೋಟಿ ಬಾಚಿ ಮುನ್ನುಗ್ಗುತ್ತಿದ್ದು ಹೊಸ ಬಾಕ್ಸ್‌ ಆಫೀಸ್ ದಾಖಲೆ ಬರೆದಿದೆ.

ಪ್ರಥಮ ದಿನದ ಪ್ರದರ್ಶನದಲ್ಲೇ 70 ಕೋಟಿಗೂ ಹೆಚ್ಚು ಗಳಿಕೆ ದಾಖಲಿಸಿದ ಚಿತ್ರವು ಇದುವರೆಗಿನ ಎಲ್ಲಾ ದಾಖಲೆಗಳನ್ನೂ ಚಿಂದಿ ಉಡಾಯಿಸುವ ಎಲ್ಲ ಲಕ್ಷಣಗಳೂ ಗೋಚರಿಸುತ್ತಿವೆ.  ಚಿತ್ರೋದ್ಯಮ ವ್ಯವಹಾರಗಳ ಖ್ಯಾತ ವಿಶ್ಲೇಷಕ ಮನೋಬಲ ವಿಜಯಬಾಲನ್‌ರ ಪ್ರಕಾರ ಮೊದಲ ದಿನವೇ 70.19 ಕೋಟಿ ಸಂಪಾದಿಸಿದ ಚಿತ್ರವು ಎರಡನೇ ದಿನದ ಪ್ರದರ್ಶನದಲ್ಲಿ 42.13 ಕೋಟಿ ರೂಪಾಯಿಗಳನ್ನು ಸಂಪಾದಿಸುವ ಮೂಲಕ 2021ರ ಅತಿ ದೊಡ್ಡ ಚಿತ್ರಗಳಲ್ಲಿ ಒಂದಾಗಬಹುದಾದ ಎಲ್ಲ ಸಾಧ್ಯತೆಗಳಿವೆ.

ಚಿತ್ರ ಇಷ್ಟೆಲ್ಲಾ ಭರವಸೆ ಹುಟ್ಟಿಸಿದ್ದರೂ, ಚಿತ್ರದ ಕಥೆ ಮಾತ್ರ ವಿಮರ್ಶಕರ ಸಂಪೂರ್ಣ ಮೆಚ್ಚುಗೆಯನ್ನು ಪಡೆಯುವಲ್ಲಿ ವಿಫಲವಾಗಿದ್ದು ನಿರಾಶಾದಾಯಕ ಪ್ರತಿಕ್ರಿಯೆ ವ್ಯಕ್ತವಾಗಿದೆ.  ಇಂಡಿಯನ್ ಎಕ್ಸ್‌ಪ್ರೆಸ್‌ನ ಅಂಕಣಕಾರ ಮನೋಜ್‌ ಕುಮಾರ್ ಪ್ರಕಾರ ಕೆಲ ತಮಿಳು ಚಿತ್ರ ನಿರ್ದೇಶಕರ ಮನ:ಸ್ಥಿತಿ ಹೇಗಿದೆಯೆಂದರೆ ಚಿತ್ರದಲ್ಲಿ ರಜನಿಕಾಂತ್‌ ಇದ್ದರೆ ಸಾಕು, ನಮ್ಮ ಹೆಚ್ಚಿನ ಪ್ರಯತ್ನಗಳ ಅವಶ್ಯಕತೆಯಿಲ್ಲದೇ ಚಿತ್ರ ಗೆದ್ದುಬಿಡುತ್ತದೆ ಎಂದುಕೊಂಡಿದ್ದಾರೆ.  “ಹಾಡುಗಳು ಹಾಗೂ ಹೊಡೆದಾಟಗಳ ದೃಶ್ಯಗಳ ಮಧ್ಯೆ  ಕೆಲವೊಂದು ಪಂಚ್‌ ನೀಡುವ ಸಂಭಾಷಣೆಗಳನ್ನು ಸೇರಿಸಿ ನಾಯಕನನ್ನು ವೈಭವೀಕರಿಸಿ ಒಂದು ಭ್ರಮಾಲೋಕವನ್ನು ಸೃಷ್ಟಿಸಿಬಿಟ್ಟರೆ ಸಾಕು ಚಿತ್ರ ಭರ್ಜರಿಯಾಗಿ ಹೋಗುತ್ತದೆಂದು ಭಾವಿಸಿರುವಂತಿದೆ,” ಹೀಗೆನ್ನುವ ಮನೋಜ್ ಕುಮಾರ್ ಚಿತ್ರಕ್ಕೆ ಒಂದೇ ಒಂದು ಸ್ಟಾರ್ ಕೊಟ್ಟಿದ್ದಾರೆ.

ಅಣ್ಣಾತೆ ಬಿಡುಗಡೆಯಾದ ಮುರದಿನ ಬಿಡುಗಡೆಯಾದ ಅಕ್ಷಯ್‌ಕುಮಾರ್‌ರ “ಸೂರ್ಯವಂಶಿ” ಚಿತ್ರವೂ ಸಹ ಗಮನಾರ್ಹ ಸಾಧನೆ ಮಾಡುತ್ತಿದ್ದು ಬಿಡುಗಡೆಯಾದ ದಿನ 26 ಕೋಟಿಯ ವ್ಯವಹಾರ ಮಾಡಿದೆ.

Latest Rajini starrer Annathe collects 113 crores in just 2 days

ಇದನ್ನೂ ಓದಿ: ಮದುವೆಯ ನಂತರ ಬದುಕನ್ನು ನೋಡುವ ದೃಷ್ಟಿಯೇ ಬದಲಾಗಿದೆ: ತಮಿಳು ನಟ ಸೂರ್ಯ

ಇದನ್ನೂ ಓದಿ: ಸೂಪರ್‌ಸ್ಟಾರ್ ರಜಿನೀಕಾಂತ್‌ಗೆ ಒಲಿದ ದಾದಾಸಾಹೇಬ್‌ ಫಾಲ್ಕೆ ಪ್ರಶಸ್ತಿ