ವಾಷಿಂಗ್ಟನ್: ಕೋವಿಡ್-19 ಸಾಂಕ್ರಾಮಿಕಕ್ಕೆ ಕಾರಣವಾದ ಸಾರ್ಸ-ಕೋವಿ-2 ವೈರಸ್ಗೆ ಕಡಿವಾಣ ಹಾಕಲು ಅನೇಕ ರೀತಿಯ ಮದ್ದುಗಳ ಆವಿಷ್ಕಾರ ನಡೆಯುತ್ತಿದೆ. ಈ ಔಷಧಗಳು ವೈರಸ್ನ ಹೊಸ ತಳಿಗಳಾದ ಡೆಲ್ಟಾ ಪ್ಲಸ್, ಓಮಿಕ್ರಾನ್ ಅನ್ನು ತಡೆಯಬೇಕಿದೆ. ಈ ನಿಟ್ಟಿನಲ್ಲಿ ಅಮೆರಿಕದ ಯೇಲ್ನ ಸಂಶೋಧಕರು ನಾಸಿಕದ ಮೂಲಕ ಬಳಸುವ ಲಸಿಕೆಯ ಪ್ರಯೋಗದಲ್ಲಿ ಹೆಚ್ಚಿನ ಪರಿಣಾಮಕತ್ವವನ್ನು ಕಂಡುಕೊಂಡಿದ್ದಾರೆ.
ಈ ಲಸಿಕೆಯು ಭಿನ್ನರೂಪದ ಉಸಿರಾಟದ ಸಮಸ್ಯೆಯನ್ನು ನಿವಾರಣೆ ಮಾಡುತ್ತದೆ ಎಂಬ ಅಂಶವನ್ನು ಇಲಿಗಳ ಮೇಲಿನ ಪ್ರಯೋಗದಿಂದ ತಿಳಿದುಬಂದಿದೆ. ವೇಗವಾಗಿ ಹರಡುತ್ತಿರುವ ವೈರಸ್ಗೆ ಈ ಲಸಿಕೆ ಪರಿಣಾಮಕಾರಿ ಮದ್ದಾಗಲಿದೆ ಎಂದು ಸಂಶೋಧಕಿ ಅಕಿಕೊ ಇವಾಸಾಕಿ ಹೇಳಿದ್ದಾರೆ. ಇವಾಸಾಕಿ ತಂಡವು ನ್ಯೂಯಾರ್ಕ್ನ ಮೌಂಟ್ ಸಿನಾಯ್ನಲ್ಲಿರುವ ಇಕಾನ್ ಸ್ಕೂಲ್ ಆಫ್ ಮೆಡಿಸಿನ್ನ ಸಂಶೋಧಕರೊಂದಿಗೆ ಸೇರಿ ಅಧ್ಯಯನ ನಡೆಸುತ್ತಿದೆ. ಇದು ಪ್ರೋಟೀನ್ ಆಧಾರಿತ ಲಸಿಕೆಯನ್ನು ಉತ್ಪಾದಿಸಿ ಇಲಿಗಳಿಗೆ ಚುಚ್ಚುಮದ್ದಿನ ಮೂಲಕ ನೀಡಿ ಪರೀಕ್ಷಿಸಿದೆ. ಜೊತೆಗೆ ನಾಸಿಕದ ಮೂಲಕವೂ ನೀಡಿ ಅಧ್ಯಯನ ನಡೆಸಿದೆ. ಇದರಲ್ಲಿ ನಾಸಿಕದ ಮೂಲಕ ಲಸಿಕೆ ಪಡೆದ ಇಲಿಗಳಲ್ಲಿ ಪ್ರತಿಕಾಯ ಹೆಚ್ಚು ಇರುವುದು ಕಂಡುಬಂದಿದೆ.
ಲೋಳೆ ಮತ್ತು ಪೊರೆಗಳು ತಮ್ಮದೆ ಆದ ಪ್ರತಿರಕ್ಷಣಾ ವ್ಯವಸ್ಥೆಯನ್ನು ಹೊಂದಿರುತ್ತವೆ. ಇವು ಗಾಳಿ ಮತ್ತು ಆಹಾರದ ಮೂಲಕ ಹರಡುವ ಸೋಂಕನ್ನು ನಿಯಂತ್ರಿಸುತ್ತವೆ. ಪ್ರತಿರೋಧಕ್ಕೆ ಸೋಂಕು ಸವಾಲು ಎಸೆದರೆ ಅದನ್ನು ತಡೆಯಲು ಬಿ ಜೀವಕೋಶಗಳನ್ನು ಉತ್ಪಾದಿಸುತ್ತವೆ. ಇವು ಇಮ್ಯುನೊಗ್ಲೋಬಿನ್-ಎ (ಐಜಿಎ) ಪ್ರತಿಕಾಯಗಳನ್ನು ಸ್ರವಿಸುತ್ತವೆ. ಇವು ಮೂಗು, ಶ್ವಾಸಕೋಶ, ಹೊಟ್ಟೆಗಳಲ್ಲಿನ ಲೋಳೆಪದರಗಳಲ್ಲಿ ಸ್ಥಳೀಯವಾಗಿ ಪ್ರಬಲ ರಕ್ಷಣಾತ್ಮಕ ಹೋರಾಟವನ್ನು ನಡೆಸುತ್ತವೆ.
ಐಜಿಎ ಉತ್ಪಾದಿಸುವ ಪ್ರತಿಕಾಯಗಳು ಕರುಳಿನ ರೋಗಕಾರಕಗಳನ್ನು ಎದುರಿಸುವಲ್ಲಿಯೂ ಮಹತ್ವದ ಪಾತ್ರವಹಿಸುತ್ತವೆ ಎಂದು ಇವಾಸಾಕಿಯ ತಂಡ ಹೇಳಿದೆ.
Nasal Vaccine Provides Broad-Based Protection
ಇದನ್ನೂ ಓದಿ: ಬೂಸ್ಟರ್ ಡೋಸ್ ಪಡೆದರೂ ಅದು ಮೊದಲು ಪಡೆದಿದ್ದಕ್ಕಿಂತ ಬೇರೆಯಾಗಿದ್ದರೆ ಉತ್ತಮವೆಂದ ತಜ್ಞರು
Discussion about this post