ಜಕಾರ್ತ: ಡೆಂಘಿ ಸೋಂಕು ಹರಡಲು ಈಡಿಸ್‌ ಎಂಬ ಈಜಿಪ್ಟ್‌ ತಳಿಯ ಸೊಳ್ಳೆ ಕಾರಣ ಎಂಬುದು ಗೊತ್ತಿರುವ ವಿಷಯ. ಈ ಸೊಳ್ಳೆಗಳಿಂದ ಹರಡುವ ಸೋಂಕಿನ ಪ್ರಕೋಪವನ್ನು ಹೋಗಲಾಡಿಸಲು ಇಂಡೋನೇಷ್ಯಾ ಮತ್ತು ಆಸ್ಟ್ರೇಲಿಯಾ ವಿಶ್ವವಿದ್ಯಾಲಯಗಳ ತಜ್ಞರು ‘ಒಳ್ಳೆಯ’ ಸೊಳ್ಳೆಗಳನ್ನು ಬೆಳೆಸುತ್ತಿದ್ದಾರೆ. ಇದೊಂದು ರೀತಿ ಮುಳ್ಳನ್ನು ಮುಳ್ಳಿನಿಂದಲೇ ತೆಗೆಯುವ ತರ್ಕದಂತೆ.
ನಿರ್ದಿಷ್ಟ ಬ್ಯಾಕ್ಟೀರಿಯಾಗಳನ್ನು ಪಸರಿಸುವ ಈ ಸೊಳ್ಳೆಗಳು ಡೆಂಘಿ ಸೋಂಕು ದೇಹಕ್ಕೆ ಅಂಟದಂತೆ ನೋಡಿಕೊಳ್ಳುತ್ತವೆ ಎಂದು ಸಂಶೋಧನೆ ನಡೆಸಿದ ಇಂಡೋನೇಷ್ಯಾದ ಗಡ್ಜಾ ಮಡ ವಿಶ್ವವಿದ್ಯಾಲಾಯ ಮತ್ತು ಆಸ್ಟ್ರೇಲಿಯಾದ ಮೋನಶ್‌ ವಿಶ್ವವಿದ್ಯಾಯಲದ ತಂಡ ಹೇಳಿದೆ.
ಈ ‘ಒಳ್ಳೆಯ’ ಸೊಳ್ಳೆಗಳು ‘ವೋಲ್ಬಾಚಿಯಾ’ ಎಂಬ ಡೆಂಘಿ ಸೇರಿದಂತೆ ಇನ್ನಿತರ ಸೋಂಕು ತಡೆಯುವಂತಹ ಬ್ಯಾಕ್ಟೀರಿಯಾಗಳನ್ನು ಪ್ರಸರಣ ಮಾಡುತ್ತವೆ ಎಂದು ವಿಶ್ವ ಸೊಳ್ಳೆ ಕಾರ್ಯಕ್ರಮದ (ಡಬ್ಯ್ಲುಎಂಪಿ) ಕುರಿತು ವರದಿ ಮಾಡಿರುವ ಗಲ್ಫ್‌ ನ್ಯೂಸ್‌ ತಿಳಿಸಿದೆ. ಈ ಬ್ಯಾಕ್ಟೀರಿಯಾವು ಪಂತಗ, ಡ್ರಾಗ್ಯನ್‌ ಫ್ಲೈ, ಹಣ್ಣಿನ ರಸ ಹೀರುವ ನೊಣಗಳು, ಚಿಟ್ಟಿಗಳಲ್ಲಿ ಸಾಮಾನ್ಯವಾಗಿ ಶೇ. 60ರಷ್ಟು ಇರುತ್ತದೆ. ಆದರೆ, ಸೊಳ್ಳೆಯ ಪ್ರಭೇದಲ್ಲಿ ಕಡಿಮೆ ಸಂಖ್ಯೆಯಲ್ಲಿ ಕಂಡುಬಂದಿವೆ. ಈಗ ಸಂಶೋಧಕರು ಈ ಬ್ಯಾಕ್ಟೀರಿಯಾ ಇರುವ ತಳಿಯ ಸೊಳ್ಳೆಯ ಸಂತತಿಯನ್ನು ಹೆಚ್ಚು ಮಾಡುತ್ತಿದ್ದಾರೆ.
‘ಒಳ್ಳೆಯ’ ಸೊಳ್ಳೆಗಳ ಪರಿಣಾಮಕಾರಿ ಮಟ್ಟ ಕುರಿತು ಒಂದು ಟ್ರಯಲ್‌ ನಡೆಸಲಾಗಿದೆ. ಡೆಂಘಿ ಸೋಂಕು ವ್ಯಾಪಕವಾಗಿದ್ದ ಕೆಂಪು ವಲಯವೆಂದು ಗುರತಿಸಲಾಗಿದ್ದ ಯೋಗಾಕರ್ತಾದಲ್ಲಿ ‘ವೋಲ್ಬಾಚಿಯಾ’ ಬ್ಯಾಕ್ಟೀರಿಯಾದ ಸೊಳ್ಳೆಗಳ ಹಿಂಡನ್ನು ಬಿಡಲಾಗಿತ್ತು. ಈ ಸೊಳ್ಳೆಗಳ ಹಾವಳಿ ಹೆಚ್ಚಾದಷ್ಟು ಡೆಂಘಿ ಸೋಂಕು ಪ್ರಸರಣ ಇಳಿಮುಖವಾಗಿದ್ದನ್ನು ಸಂಶೋಧನೆ ದಾಖಲಿಸಿದೆ. ಆಸ್ಪತ್ರೆಗೆ ದಾಖಲಾಗುವವರ ಸಂಖ್ಯೆ ಶೇ. 77ರಷ್ಟು ಇಳಿಕೆ ಆಗಿದೆ ಎಂದು ಹೇಳಿದೆ ಎಂದು ಈ ಅಧ್ಯಯನ ವರದಿ ಮಾಡಿದ ನ್ಯೂ ಇಂಗ್ಲೆಂಡ್‌ ಜರ್ನಲ್‌ ಆಫ್‌ ಮೆಡಿಸನ್‌ ಕಳೆದ ಜೂನ್‌ನಲ್ಲಿ ವರದಿ ಮಾಡಿದೆ.
ಜಾಗತಿಕವಾಗಿ ಡೆಂಘಿ ಸೋಂಕಿನ ಪ್ರಮಾಣ ಈ ವರ್ಷ ಅತಿ ಹೆಚ್ಚಾಗಿದೆ.40 ಕೋಟಿ ಡೆಂಘಿ ಪ್ರಕರಣಗಳು ವರಿದಯಾಗಿದೆ. ಭಾರತದಲ್ಲಿ ಹರಿಯಾಣ, ಉತ್ತರ ಪ್ರದೇಶ, ಪಂಜಾಬ್‌, ಕೇರಳ, ತಮಿಳುನಾಡು, ರಾಜಸ್ಥಾನ, ದೆಹಲಿ, ಉತ್ತರಾಖಂಡದಲ್ಲಿ ಒಂದು ಲಕ್ಷಕ್ಕೂ ಅಧಿಕ ಡೆಂಘಿ ಪ್ರಕರಣಗಳಿವೆ. ಡೆಂಘಿ ಹರಡುವ ಸೊಳ್ಳೆಗಳಾಗಲಿ ಅಥವಾ ‘ಒಳ್ಳೆಯ’ ಸೊಳ್ಳೆಯಾಗಲಿ ಕಚ್ಚಿಸಿಕೊಳ್ಳುವುದರಿಂದ, ಕಿವಿಯ ಬಳಿ ಗ್ಞೂ ಗುಡುವುದು ತಪ್ಪುವುದಿಲ್ಲ!
New Species of Mosquitoes Developed in Indonesia to curtail Dengue
ಇದನ್ನೂ ಓದಿ: ಹೆಚ್ಚುತ್ತಿದೆ ಡೆಂಗ್ಯೂ ಪ್ರಕರಣ: ಸೋಂಕಿನಿಂದ ರಕ್ಷಣೆಗೆ ಏನೇನು ಮಾಡಬೇಕು?
Discussion about this post