ಚಿತ್ರ ವಿಮರ್ಶೆ: ದುಷ್ಟನ ಜಾಲಕ್ಕೆ ಅವನದೇ ದೌರ್ಬಲ್ಯದಲ್ಲಿ ಮದ್ದರೆಯುವ ನಾಯಕ- ಹೀಗಿದೆ 100 ಸಿನಿಮಾ

ಉತ್ತಮ ಗುಣಮಟ್ಟದ ಫೋನ್‌ಗಳು ಹಾಗೂ ಅಂತರ್ಜಾಲ ಸೌಲಭ್ಯ ಕೈಗೆಟಕುವ ದರಗಳಲ್ಲಿ ಸುಲಭವಾಗಿ ಸಿಗುವಂತಾಗಿರುವುದು ಅವುಗಳ ದುರ್ಬಳಕೆಗೂ ದಾರಿ ಮಾಡಿಕೊಟ್ಟಿದೆ. ಸಾಮಾನ್ಯ ಜನರು ಅದರಲ್ಲೂ ಹೆಣ್ಣುಮಕ್ಕಳು ಸಾಮಾಜಿಕ ಜಾಲತಾಣಗಳಲ್ಲಿ ಇತರರೊಂದಿಗೆ ಸ್ನೇಹ ಬೆಳೆಸುವಾಗ ಹಾಗೂ ಸಂವಾದ ನಡೆಸುವಾಗ ಎಚ್ಚರ ತಪ್ಪಿದರೆ ಮೋಸಗೊಳಿಸಲೆಂದೇ ಕಾದಿರುವ ಜನರ ಜಾಲದಲ್ಲಿ ಸಿಲುಕಿ ಅಪಾಯಕ್ಕೀಡಾಗುವುದರ ಬಗ್ಗೆ ರಮೇಶ್‌ ಅರವಿಂದ್‌ ನಿರ್ದೇಶನದ ಚಿತ್ರ 100 ಎಚ್ಚರಿಸುತ್ತದೆ.

ನಿಷ್ಠಾವಂತ ಪೋಲೀಸ್‌ ಅಧಿಕಾರಿ ವಿಷ್ಣು ಪ್ರಕರಣವೊಂದರ ತನಿಖೆ ಕೈಗೆತ್ತಿಕೊಂಡಾಗ ಇಂತಹ ಪ್ರಕರಣಗಳು ಅವನ ಗಮನಕ್ಕೆ ಬರುತ್ತವೆ. ಯುವತಿಯರನ್ನು ಬಣ್ಣದ ಮಾತುಗಳಿಂದ ಬಲೆಗೆ ಹಾಕಿಕೊಂಡು ಸ್ವಲ್ಪ ಮಟ್ಟಿನ ನಂಬಿಕೆ ಬೆಳೆದು ಸ್ನೇಹ ಪ್ರೇಮಕ್ಕೆ ತಿರುಗಿದ ನಂತರ ಅವರನ್ನು ದುರುಪಯೋಗಪಡಿಸಿಕೊಳ್ಳುವ ಅನೇಕ ಪ್ರಕರಣಗಳು ನಮ್ಮ ಕಣ್ಣ ಮುಂದಿವೆ. ಇಂತಹ ಜ್ವಲಂತ ಸಮಸ್ಯೆಯ ಬಗ್ಗೆ ಸಮಾಜದ ಕಣ್ಣು ತೆರೆಸುವ ಪ್ರಯತ್ನದಲ್ಲಿ ಚಿತ್ರ ಯಶಸ್ವಿಯಾಗಿದೆ.

ಅನೇಕ ಯುವತಿಯರ ಬಾಳಿನೊಂದಿಗೆ ಚೆಲ್ಲಾಟವಾಡುವ ದುಷ್ಕರ್ಮಿ (ಹರ್ಷ)ಯ ಮೋಸದ ಜಾಲದಲ್ಲಿ ನಾಯಕನ ಪತ್ನಿ ಹಾಗೂ ತಂಗಿಯೇ ಸಿಲುಕಿದಾಗ ಎಲ್ಲರನ್ನೂ ನಾಯಕ ಕಾಪಾಡುವುದೇ ಚಿತ್ರದ ಮುಖ್ಯ ಕತೆ. ಇದರ ಮಧ್ಯೆ ಪೋಲೀಸ್ ಇಲಾಖೆಯ ಹಾಗೂ ರಾಜಕೀಯದ ದುರ್ವ್ಯವಹಾರಗಳ ಸನ್ನಿವೇಶಗಳೂ ಬಂದುಹೋಗುತ್ತವೆ. ತನ್ನದೇ ಮಗುವಿನ ಚಿಕೆತ್ಸೆಗೆ ಬೇಕಾಗುವ ದೊಡ್ಡಮೊತ್ತದ ಹಣವನ್ನು ಹೊಂದಿಸಲು ನಾಯಕನೇ ಕೆಟ್ಟ ಹಾದಿ ಹಿಡಿಯುವ ಪ್ರಸಂಗವೂ ನಡೆಯುತ್ತದೆ. ದುಷ್ಕರ್ಮಿ ಹರ್ಷನ ಜಾಲದಲ್ಲಿ ನಾಯಕನ ಪತ್ನಿ ಹಾಗೂ ತಂಗಿ ಸಿಲುಕುತ್ತಾರೆ.  ಹರ್ಷನ ಮಾನಸಿಕ ದೌರ್ಬಲ್ಯದ ಬಗ್ಗೆ ತಿಳಿಯುವ ನಾಯಕ ವಿಷ್ಣು ಅದನ್ನೇ ಉಪಯೋಗಿಸಿ ಅವನಿಗೆ ಅಂತ್ಯ ಹಾಡುವ ಮೂಲಕ ಕತೆ ಸುಖಾಂತ್ಯವಾಗುತ್ತದೆ.

ಚಿತ್ರದ ಛಾಯಾಗ್ರಹಣ ಹಾಗೂ ಹಿನ್ನೆಲೆ ಸಂಗೀತ ಉತ್ತಮವಾಗಿದ್ದು ನಿರ್ದೇಶನ ಸಾಧಾರಣ ಮಟ್ಟದಲ್ಲಿದೆ. ಆದರೂ ಒಂದು ಉತ್ತಮ ಸಂದೇಶವನ್ನು ಸಮಾಜಕ್ಕೆ ತಲುಪಿಸುವಲ್ಲಿ ಚಿತ್ರ ಯಶಸ್ವಿಯಾಗುತ್ತದೆ. ನಟನೆಯ ವಿಷಯಕ್ಕೆ ಬಂದರೆ ಎಲ್ಲರೂ ತಮ್ಮ-ತಮ್ಮ ಪಾತ್ರಗಳಿಗೆ ತಕ್ಕಂತೆ ನಟಿಸಿದ್ದಾರೆ. ಒಂದು ಸದಭಿರುಚಿಯ ಚಿತ್ರವನ್ನು ನೋಡಿದ ಸಮಾಧಾನವನ್ನು ಕೊಡುವಲ್ಲಿ ಚಿತ್ರ ಯಶಸ್ವಿಯಾಗಿದೆ.

Ramesh Aravind Movie 100 succeeds in conveying an important social message

ಇದನ್ನೂ ಓದಿ: #ಕನ್ನಡಕಡ್ಡಾಯ: ‘ಕೂ’ನಲ್ಲಿ ಭರಪೂರ ಚರ್ಚೆ, ನೆಟ್ಟಿಗರ ಅಭಿಪ್ರಾಯ ಇಲ್ಲಿದೆ

ಇದನ್ನೂ ಓದಿ: Kannada language : ಅನ್ಯಭಾಷೆಗಳ ವ್ಯಾಮೋಹದಿಂದ ಕನ್ನಡ ಮೂಲೆಗುಂಪು