ದೀರ್ಘಕಾಲ ಕುಳಿತು ಕೆಲಸ ಮಾಡುತ್ತೀರಾ? ಬೆನ್ನುನೋವು ನಿಮ್ಮನ್ನು ಬಾಧಿಸುತ್ತಿದೆಯೇ? ಇಲ್ಲಿವೆ ಕೆಲವು ಮುನ್ನೆಚ್ಚರಿಕೆಗಳು ಹಾಗೂ ಸುಲಭ ಉಪಾಯಗಳು

ಗಣಕಯಂತ್ರಗಳು ನಮ್ಮ ನಿತ್ಯಜೀವನದ ಭಾಗವೇ ಆಗಿಹೋಗಿದ್ದು ನಮ್ಮಲ್ಲಿ ಹೆಚ್ಚಿನ ಸಂಖ್ಯೆಯ ಜನರು ಕುಳಿತೇ ಕೆಲಸ ಮಾಡುವವರಾಗಿದ್ದಾರೆ. ಕೊರೋನಾ ಮಹಾಮಾರಿಯ ನಂತರ ಎಲ್ಲರ ಉದ್ಯೋಗಗಳು ಅವರವರ ಮನೆಗೇ ಸ್ಥಳಾಂತರಗೊಂಡಿದ್ದು ಹೆಚ್ಚಿನ ವ್ಯಾಯಾಮವಿಲ್ಲದೆ ಒಂದೇ ಭಂಗಿಯಲ್ಲಿ ಕುಳಿತು ಕೆಲಸ ಮಾಡುವುದರಿಂದ ದೀರ್ಘಾವಧಿಯಾಲ್ಲಿ ಅನೇಕ ಸಮಸ್ಯೆಗಳಿಗೆ ಕಾರಣವಾಗುತ್ತಿದೆ.

ಕೊರೋನಾ ಮಹಾಮಾರಿಯ ಕಾರಣದಿಂದ ಉಂಟಾದ ಲಾಕ್‌ಡೌನ್‌ನಿಂದ ಮನೆಯಿಂದಲೇ ಕೆಲಸ ಮಾಡುವುದು, ದೈಹಿಕ ಚಟುವಟಿಕೆಗಳಲ್ಲಿ ಕಡಿಮೆಯಾಗಿರುವುದು, ಮನೆಯ ಕೆಲಸಗಳು ಮತ್ತು ಉದ್ಯೋಗದ ಜವಾಬ್ದಾರಿಗಳ ನಡುವೆ ಸಮತೋಲನ ಸಾಧಿಸುವ ಒತ್ತಡ, ನಿಯಮಿತ ವ್ಯಾಯಾಮ ಹಾಗೂ ಸಾಮಾಜಿಕ ಚಟುವಟಿಕೆಗಳ ಕೊರತೆಯಿಂದಾಗಿ ಬೆನ್ನುಮೂಳೆಗೆ ಸಂಬಂಧಿಸಿದ ಸಮಸ್ಯೆಗಳು ಕ್ರಮೇಣ ಪ್ರಾರಂಭವಾಗಲು ಕಾರಣವಾಗುತ್ತಿವೆ. ಇದರಿಂದಾಗಿ, ಇತ್ತೀಚೆಗೆ ಹೆಚ್ಚಿನ ಜನರು ಬೆನ್ನು ನೋವಿನ ಸಮಸ್ಯೆಯಿಂದ ನರಳುತ್ತಿದ್ದಾರೆ.

ಸರಿಯಾದ ಭಂಗಿಯಲ್ಲಿ ಕುಳಿತು ಕೆಲಸ ಮಾಡುವುದರಿಂದ ಕುತ್ತಿಗೆ ಮತ್ತು ಬೆನ್ನುಗಳ ಮೇಲೆ ಬೀಳುವ ಒತ್ತಡವನ್ನು ನಿವಾರಿಸಬಹುದಾಗಿದೆ. ದೀರ್ಘಕಾಲದವರೆಗೆ ಕುಳಿತು ಕೆಲಸ ಮಾಡುವಾಗ ಬೆನ್ನುಮೂಳೆಯು ಹೆಚ್ಚು ಬಾಗುವುದರಿಂದ ಮಾಂಸಖಂಡಗಳ, ಲಿಗಮೆಂಟ್‌ಗಳ, ಡಿಸ್ಕ್‌ಗಳ, ಹಾಗೂ ಅಂಗಾಂಶಗಳ ಮೇಲೆ ಹೆಚ್ಚಿನ ಒತ್ತಡ ಉಂಟಾಗುತ್ತದೆ. ನೀವೇನಾದರೂ ಕಂಪ್ಯೂಟರ್‌ನಲ್ಲಿ ಕೆಲಸ ಮಾಡುವವರಾದರೆ ನಿಮ್ಮ ದೃಷ್ಟಿಯು ಕಂಪ್ಯೂಟರ್ ಪರದೆಯ ಮೇಲ್ತುದಿಯಿಂದ 3 ಅಂಗುಲ ಕೆಳಗಿರುವಂತೆ ನೋಡಿಕೊಳ್ಳಿ. ಗಂಟೆಗಟ್ಟಲೆ ಕುಳಿತು ಕೆಲಸ ಮಾಡದೇ 45-50 ನಿಮಿಷಗಳಿಗೊಮ್ಮೆ ಒಂದು ಸಣ್ಣ ವಿರಾಮವನ್ನು ತೆಗೆದುಕೊಳ್ಳುವುದು ಬಹಳ ಉಪಯುಕ್ತ. ಉತ್ತಮ ಆರೋಗ್ಯಕ್ಕೆ ಹಾಗೂ ಸಾಮಾನ್ಯ ರಕ್ತಪರಿಚಲನೆಗೆ ದೇಹದ ಕೀಲುಗಳು ಚಲನೆಯಲ್ಲಿರುವುದು ಅತ್ಯವಶ್ಯಕವಾಗಿದ್ದು ಕೆಲಸದ ಮಧ್ಯೆ ಆಗಾಗ ಕೆಲಸದ ಕೊಠಡಿಯಲ್ಲೇ ಓಡಾಡುತ್ತಿರುವುದು ಒಳ್ಳೆಯದು. ಕೆಲವು ಸರಳ ಯೋಗಾಸನದ ಭಂಗಿಗಳೂ ಪ್ರಯೋಜನಕಾರಿ.

ಮನೆಯಿಂದಲೇ ಕೆಲಸ ಮಾಡಬೇಕಾದ ಪರಿಸ್ಥಿತಿಯಲ್ಲಿ ಸ್ವಸ್ಥ ಬೆನ್ನುಮೂಳೆಯನ್ನು ಹೊಂದಿರಲು ಅನುಸರಿಸಬೇಕಾದ 3 ಉಪಾಯಗಳೆಂದರೆ:
1. ಯಾವಾಗಲೂ ಸರಿಯಾದ ಭಂಗಿಯಲ್ಲಿ ಕುಳಿತುಕೊಳ್ಳುವುದು.
2. ನಿಶ್ಚಿತ ಅವಧಿಗಳ ಕೆಲಸದ ನಂತರ ಮರೆಯದೇ ವಿರಾಮ ತೆಗೆದುಕೊಳ್ಳುವುದು.
3. ನಿಯಮಿತವಾಗಿ ಮುಖ್ಯ ಮಾಂಸಖಂಡಗಳ ವ್ಯಾಯಾಮ ಮಾಡುವುದು.

ಬೆನ್ನುನೋವಿನ ಶಮನಕ್ಕೆ ಕೆಲ ಉಪಾಯಗಳು:
1. ಬೆನ್ನು ನೋವು ಹೆಚ್ಚಿದ್ದಾಗ ಹೆಚ್ಚು ಹೊತ್ತು ಹಾಸಿಗೆಯಲ್ಲಿ ಮಲಗಿ ವಿಶ್ರಾಂತಿ ಪಡೆಯಬಾರದು.
2. ಹೆಚ್ಚಿನ ದೈಹಿಕ ಚಟುವಟಿಕೆಗಳಿಂದ (ನಿಂತುಕೊಳ್ಳುವುದು ಹಾಗೂ ಓಡಾಡುತ್ತಿರುವುದು) ಬೆನ್ನುನೋವು ಶಮನವಾಗುತ್ತದೆ.
3. ನೋವಿರುವ ಜಾಗಕ್ಕೆ ಶಾಖ ಹಾಗೂ ತಂಪಿನ ಉಪಚಾರದಿಂದ ನೋವು ಶಮನವಾಗುತ್ತದೆ.
4. ಸಕ್ಕರೆಯುಕ್ತ ಪಾನೀಯಗಳು, ಸಂಸ್ಕರಿತ ಆಹಾರ ಪದಾರ್ಥಗಳು, ಬೇಕರಿ ಪದಾರ್ಥಗಳು, ಕರಿದ ಪದಾರ್ಥಗಳು, ಹೆಚ್ಚಿನ ಕೊಬ್ಬಿನಂಶ ಇರುವ ಡೈರಿ ಪದಾರ್ಥಗಳು ಹಾಗೂ ಐಸ್‌ಕ್ರೀಂಗಳನ್ನು ಹೆಚ್ಚು-ಹೆಚ್ಚು ಉಪಯೋಗಿಸುವುದರಿಂದ ದೇಹದ ಮಧ್ಯಭಾಗದಲ್ಲಿ ತೂಕ ಹೆಚ್ಚಾಗಿ ಬೆನ್ನುನೋವು ಹೆಚ್ಚಾಗಲು ಕಾರಣವಾಗಬಹುದು.
5. ನಿಂತಾಗ ಅಥವಾ ಕುಳಿತಾಗ ಯಾವಾಗಲೂ ಬೆನ್ನುಮೂಳೆಯನ್ನು ಬಾಗಿಸದೆ ನೇರವಾಗಿಟ್ಟುಕೊಳ್ಳುವುದರಿಂದ, ಕುಳಿತಿರುವಾಗ ಒಂದು ಮೆತ್ತೆಯನ್ನು ಬೆನ್ನಿನ ಕೆಳಭಾಗದಲ್ಲಿ ಇಟ್ಟುಕೊಳ್ಳುವುದರಿಂದ, ಹಾಗೂ ಕಾಲುಗಳನ್ನು ಒಂದು ಚಿಕ್ಕೆ ಸ್ಟೂಲ್ ಮೇಲಿಟ್ಟುಕೊಳ್ಳುವುದರಿಂದ ಬೆನ್ನು ನೋವು ಗಣನೀಯವಾಗಿ ಶಮನವಾಗುವ ಸಾಧ್ಯತೆ ಹೆಚ್ಚು. ಕುಳಿತುಕೊಳ್ಳುವ ಭಂಗಿಯನ್ನು ನಿಯಮಿತವಾಗಿ ಆಗಾಗ ಬದಲಾಯಿಸುತ್ತಿರುವುದರಿಂದಲೂ ಹೆಚ್ಚು ಉಪಯೋಗವಾಗುತ್ತದೆ.
6. ಹೆಚ್ಚು ತೂಕವಿರುವ ವಸ್ತುಗಳನ್ನು ಎತ್ತುವಾಗ ಬೆನ್ನುಮೂಳೆಯ ಮೇಲೆ ಹೆಚ್ಚಿನ ಒತ್ತಡ ಬೀಳುವುದರಿಂದ ಇದರಿಂದ ದೂರವಿರಬೇಕು.

ಬೆನ್ನುನೋವು ಬಹಳ ಹೆಚ್ಚಾಗಿದ್ದರೆ ತಜ್ಞವೈದ್ಯರಿಂದ ಸಲಹೆ ಪಡೆಯುವುದು ಅತ್ಯಂತ ಸೂಕ್ತವಾಗಿದೆ.

Sitting in a correct posture while working and taking breaks at regular intervals can reduce back pain

ಇದನ್ನೂ ಓದಿ: ಪರಿಸರ ಸ್ವಚ್ಚವಾಗಿದ್ದಾಗ ಉತ್ತಮ ಆರೋಗ್ಯ

ಇದನ್ನೂ ಓದಿ: ಕೊರೊನಾ ಆಯ್ತು, ಅಮೆರಿಕದಲ್ಲೀಗ ಸ್ಯಾಲ್ಮೊನೆಲ್ಲಾ ಸೋಂಕು ಹಾವಳಿ: ಏನಿದು?