Health: ವ್ಯಾಯಾಮಕ್ಕೂ ಮಾನಸಿಕ ಆರೋಗ್ಯಕ್ಕೂ ಸಂಬಂಧವಿರುವುದನ್ನು ನಿರೂಪಿಸಿದ ಅಧ್ಯಯನ

ಇತ್ತೀಚೆಗೆ ನಡೆದ ಒಂದು ಅಧ್ಯಯನದ ಪ್ರಕಾರ ಸಾಂಕ್ರಾಮಿಕ ರೋಗಗಳಿಂದ ಹಾಗೂ ಸಾಮೂಹಿಕ ಆರೋಗ್ಯ ಸಮಸ್ಯೆಗಳಿಂದ ಜನರು ನರಳುವ ಸಂದರ್ಭಗಳಲ್ಲಿ ಹೆಚ್ಚಿನ ದೈಹಿಕ ಚಟುವಟಿಕೆ ಹಾಗೂ ನಿಯಮಿತ ವ್ಯಾಯಾಮ ಪದ್ಧತಿಗಳನ್ನು ಅನುಸರಿಸುವ ಮೂಲಕ ಉತ್ತಮ ದೈಹಿಕ ಹಾಗೂ ಮಾನಸಿಕ ಆರೋಗ್ಯವನ್ನು ಕಾಪಾಡಿಕೊಳ್ಳಬಹುದೆಂದು ಕಂಡು ಬಂದಿದೆ.

ಅಧ್ಯಯನದಲ್ಲಿ ಕಂಡು ಬಂದಿರುವಂತೆ ಕೋವಿಡ್‌-19ರ ಸಮಯದಲ್ಲಿ ನಿಯಮಿತವಾಗಿ ವ್ಯಾಯಾಮ ಮಾಡುವ ಆಭ್ಯಾಸವಿದ್ದ ಜನರು ಇಂತಹ ಅಭ್ಯಾಸವಿರದಿದ್ದ ಜನರಿಗಿಂತ ಕಡಿಮೆ ಉದ್ವೇಗ ಹಾಗೂ ಖಿನ್ನತೆಯನ್ನು ಅನುಭವಿಸಿದರು. ಇದೇ ರೀತಿ, ಮನೆಯ ಹೊರಗೆ ಹೆಚ್ಚಿನ ಸಮಯ ಕಳೆಯುತ್ತಿದ್ದವರು ಮನೆಯೊಳಗೇ ಇರುತ್ತಿದ್ದ ಜನರಿಗಿಂತ ಕಡಿಮೆ ಉದ್ವೇಗ ಹಾಗೂ ಖಿನ್ನತೆಯನ್ನು ಅನುಭವಿಸಿದರು. ಈ ಸಂಗತಿಗಳನ್ನು “ಪ್ರಿವೆಂಟಿವ್‌ ಮೆಡಿಸಿನ್” ಜರ್ನಲ್‌ನಲ್ಲಿ ಪ್ರಕಟಿಸಲಾಗಿದೆ.

ಅಮೆರಿಕಾ ಸಂಯುಕ್ತ ಸಂಸ್ಥಾನದ ಹವಾಯ್‌, ಕೊಲೊರೇಡೋ, ಜಾರ್ಜಿಯಾ, ಉತ್ತರ ಮತ್ತು ದಕ್ಷಿಣ ಕ್ಯಾಲಿಫೋರ್ನಿಯಾ, ಹಾಗೂ ಮಧ್ಯ ಅಟ್ಲಾಂಟಿಕ್‌ ರಾಜ್ಯಗಳ 6 ಪ್ರದೇಶಗಳಲ್ಲಿ ನಡೆದ ಈ ಸಮೀಕ್ಷೆ-ಆಧಾರಿತ ಅಧ್ಯಯನದಲ್ಲಿ 20 ಸಾವಿರಕ್ಕೂ ಹೆಚ್ಚಿನ ಜನರು ಭಾಗವಹಿಸಿದ್ದರು.

ಈ ಅಧ್ಯಯನದಲ್ಲಿ ಕಂಡುಬಂದ ಪ್ರಮುಖ ಅಂಶವೆಂದರೆ “ಸಾಮೂಹಿಕ ಆರೋಗ್ಯ ಸಮಸ್ಯೆಗಳ ಹಾಗೂ ಸಾಂಕ್ರಾಮಿಕ ಆರೋಗ್ಯ ಸಮಸ್ಯೆಗಳ ಸಂದರ್ಭದಲ್ಲಿ ಜನರನ್ನು ಹೆಚ್ಚಿನ ದೈಹಿಕ ಚಟುವಟಿಕೆಯಿಂದಿರಲು ಹಾಗೂ ನಿಯಮಿತ ವ್ಯಾಯಾಮ ಪದ್ಧತಿಗಳನ್ನು ಅನುಸರಿಸಲು ಪ್ರೋತ್ಸಾಹಿಸುವುದರಿಂದ ಅವರು ಉತ್ತಮ ದೈಹಿಕ ಹಾಗೂ ಮಾನಸಿಕ ಆರೋಗ್ಯವನ್ನು ಹೊಂದಲು ಸಹಾಯಕವಾಗುತ್ತದೆ. ಹೀಗೆಂದು ಹೇಳಿರುವ ಅಧ್ಯಯನವನ್ನು ಕೈಗೊಂಡ ತಂಡದ ಮುಖ್ಯಸ್ಥೆ ಡಾ.ಡೆಬೊರಾ ಯಂಗ್ ತಿಳಿಸಿದ್ದಾರೆ. ಉದ್ಯಾನವನಗಳು ಮತ್ತು ಸುಂದರ ನಿಸರ್ಗವನ್ನು ಹೊಂದಿರುವ ಪ್ರದೇಶಗಳನ್ನು ಇಂತಹ ಸಾಂಕ್ರಾಮಿಕಗಳ ಸಂದರ್ಭಗಳಲ್ಲಿ ತೆರೆದಿಟ್ಟು ಜನರು ಹೊರಾಂಗಣ ಸ್ಥಳಗಳಲ್ಲಿ ದೈಹಿಕ ಚಟುವಟಿಕೆಗಳನ್ನು ಕೈಗೊಳ್ಳುವ ವ್ಯವಸ್ಥೆಯಿರಬೇಕು ಎಂದಿದ್ದಾರೆ.

ಮಾರ್ಚ್‌ 2020ರಲ್ಲಿ ವಿಶ್ವಾದ್ಯಂತ ಕೋವಿಡ್‌ ಹರಡಿದಾಗ ಅದಕ್ಕೆ ಯಾವುದೇ ಔಷಧೋಪಚಾರಗಳು ಇರದಿದ್ದ ಕಾರಣ ಜನರು ತಮ್ಮಲ್ಲಿ ಅಂತರ ಕಾಯ್ದುಕೊಳ್ಳುವ ಹಾಗೂ ಒಳಾಂಗಣದಲ್ಲೇ ಇರುವಂತಹ ನಿಯಮಗಳನ್ನು ಸರಕಾರಗಳು ವಿಧಿಸುವಂತಾಯಿತು. ವ್ಯಾಪಾರ ಸಂಸ್ಥೆಗಳು ಹಾಗೂ ಉದ್ದಿಮೆಗಳು ತಾತ್ಕಾಲಿಕವಾಗಿ ತಮ್ಮ ವ್ಯವಹಾರದ ಅಭ್ಯಾಸಗಳನ್ನು ಬದಲಿಸಿಕೊಳ್ಳಬೇಕಾದ ಅಥವಾ ನಿಲ್ಲಿಸಬೇಕಾದ ಪರಿಸ್ಥಿತಿಗಳು ಬಂದೊದಗಿದವು. ಇಂತಹ ಸಂದಿಗ್ಧ ಪರಿಸ್ಥಿತಿಯಿಂದಾಗಿ ಸಾಮಾಜಿಕ ಕಾರ್ಯಕ್ರಮಗಳು ಕಡಿಮೆಯಾದವಲ್ಲದೇ ಬಂಧು-ಮಿತ್ರರೊಂದಿಗೆ ಸೇರುವ ಅವಕಾಶಗಳೂ ವಿರಳವಾಗಿ ಜನರು ಉದ್ವೇಗ ಹಾಗೂ ಖಿನ್ನತೆಗಳಿಂದ ನರಳುವಂತಾಯಿತು.

ದೈಹಿಕ ಚಟುವಟಿಕೆಗಳು, ವ್ಯಾಯಾಮಗಳು, ಹಾಗೂ ಮಾನವ ನಿಸರ್ಗದೊಂದಿಗೆ ಬೆರೆಯುವ ಹವ್ಯಾಸಗಳು ಮಾನಸಿಕ ಆರೋಗ್ಯವನ್ನು ಸದೃಢವಾಗಿಟ್ಟುಕೊಳ್ಳುವಲ್ಲಿ ಸಹಕಾರಿಯಾಗುತ್ತವೆಂಬ ಸಂಗತಿ ಈಗಾಗಲೇ ಅಧ್ಯಯನಗಳಿಂದ ತಿಳಿದಿರುವ ವಿಷಯವಾಗಿದೆ. ಅಮೆರಿಕಾದ ದಕ್ಷಿಣ ಕ್ಯಾಲಿಫೋರ್ನಿಯಾದ ಕೈಸರ್‌ ಸಂಸ್ಥೆಯು ಕೋವಿಡ್‌ ಸಮಸ್ಯೆಯು ಉತ್ತುಂಗದಲ್ಲಿದ್ದಾಗ ವ್ಯಾಯಾಮ ಹಾಗೂ ದೈಹಿಕ ಚಟುವಟಿಕೆಗಳು ಮಾನವರ ಮನಸ್ಸಿನ ಮೇಲೆ ಯಾವ ರೀತಿಯ ಪರಿಣಾಮ ಉಂಟುಮಾಡುತ್ತವೆನ್ನುವ ಕುತೂಹಲಕಾರಿ ಸಂಶೋಧನೆ ಕೈಗೊಂಡಿತು.

ಸಮೀಕ್ಷೆಗೆ ಸಂಬಂಧಿಸಿದ ಪ್ರಶ್ನೆಗಳ ಸರಣಿಯನ್ನು 2020ರ ಏಪ್ರಿಲ್‌ನಲ್ಲಿ ಸಮೀಕ್ಷೆಯಲ್ಲಿ ಭಾಗವಹಿಸಿದ 250,000 ಜನರಿಗೆ ಕಳುಹಿಸಿದ ಸಂಸ್ಥೆಯು ಅವರ ಜೀವನ ಶೈಲಿ ಹಾಗೂ ಎಲೆಕ್ಟ್ರಾನಿಕ್ ಆರೋಗ್ಯ ದಾಖಲೆಗಳು ಮುಂತಾದ ಮಾಹಿತಿಯನ್ನು ಕಲೆಹಾಕಿತು. ಕೋವಿಡ್‌-19ರ ಲಕ್ಷಣವಿದ್ದವರನ್ನು ಬಿಟ್ಟ ನಂತರ ಒಟ್ಟು ಭಾಗವಹಿಸಿದವರ ಸಂಖ್ಯೆ ಸುಮಾರು 20,000. ಇವರಲ್ಲಿ ಪ್ರತಿಯೊಬ್ಬರೂ ಕನಿಷ್ಟ 4 ಸಮೀಕ್ಷೆಗಳನ್ನು ಏಪ್ರಿಲ್‌ ಮತ್ತು ಜುಲೈ 2020ರ ಮಧ್ಯದ ಅವಧಿಯಲ್ಲಿ ಪೂರ್ಣಗೊಳಿಸಿದ್ದರು.

ಇವರಲ್ಲಿ 50 ವರ್ಷ ದಾಟಿದ್ದ ಶ್ವೇತ ಮಹಿಳೆಯರು ಹೆಚ್ಚಿನ ಸಂಖ್ಯೆಯಲ್ಲಿ ಭಾಗವಹಿಸಿದ್ದರು. ಇವರಲ್ಲಿ ಹೆಚ್ಚಿನ ಸಂಖ್ಯೆಯ ಮಹಿಳೆಯರು ತಿಳಿಸಿರುವಂತೆ ಅವರೆಲ್ಲಾ ಸಮೀಕ್ಷೆಯ ಸಮಯದಲ್ಲಿ ಮನೆಯೊಳಗೇ ಇದ್ದು ಸುರಕ್ಷಿತವಾಗಿರುವ ಕ್ರಮ ಅನುಸರಿಸಿದವರು.

ಸಮೀಕ್ಷೆಯ ಫಲಿತಾಂಶಗಳೆಂದರೆ:

1. ಕಾಲ ಸರಿದಂತೆ ಉದ್ವೇಗ ಮತ್ತು ಖಿನ್ನತೆಯ ವರದಿಗಳು ಕಡಿಮೆಯಾದವು.
2. ಮಹಿಳೆಯರು ಮತ್ತು ಚಿಕ್ಕ ವಯಸ್ಸಿನವರಲ್ಲಿ ಉದ್ವೇಗ ಮತ್ತು ಖಿನ್ನತೆಗಳು ಹೆಚ್ಚಿನ ಪ್ರಮಾಣದಲ್ಲಿದ್ದರೆ ಕಪ್ಪು ವರ್ಣೀಯರು ಹಾಗೂ ಏಷ್ಯಾದ ಜನರಲ್ಲಿ ಇವು ಶ್ವೇತ ವರ್ಣೀಯರಿಗಿಂತ ಕಡಿಮೆ ಇದ್ದವು.
3. ಕಡಿಮೆ ದೈಹಿಕ ಚಟುವಟಿಕೆಗಳನ್ನು ಹೊಂದಿದ್ದವರು ವ್ಯಾಯಾಮ ಮಾಡುತ್ತಿದ್ದವರಿಗಿಂತ ಹೆಚ್ಚು ಉದ್ವೇಗ ಹಾಗೂ ಖಿನ್ನತೆಗಳನ್ನು ಅನುಭವಿಸಿದರು.
4. ಹೆಚ್ಚಿನ ಸಮಯ ಮನೆಗಳಿಂದ ಹೊರಗಿರುತ್ತಿದ್ದವರು ಹೆಚ್ಚಿನ ಉದ್ವೇಗವನ್ನು ಅನುಭವಿಸಿದ್ದಾಗಿ ವರದಿಯಾಗಿದ್ದು ಇದಕ್ಕೆ ಸಂಶೋದನೆಯು ಸೂಕ್ತ ವಿವರಣೆ ನೀಡಲು ಸಾಧ್ಯವಾಗಿಲ್ಲ.

ಇದರಿಂದ ನಮಗೆ ತಿಳಿದು ಬರುವ ವಿಷಯವೇನೆಂದರೆ “ಮುಂದೇನಾದರೂ ಇಂತಹ ತುರ್ತು ಪರಿಸ್ಥಿತಿಗಳು ಉದ್ಭವಿಸಿದರೆ ಉದ್ಯಾನವನಗಳು ಹಾಗೂ ಹೊರಾಂಗಣ ಪ್ರದೇಶಗಳನ್ನು ಮುಚ್ಚುವ ನಿರ್ಧಾರವನ್ನು ಅವು ಮಾನವರ ಮಾನಸಿಕ ಸ್ಥಿತಿಯ ಮೇಲೆ ಬೀರುವ ದುಷ್ಪರಿಣಾಮಗಳನ್ನು ಗಮನದಲ್ಲಿಟ್ಟುಕೊಂಡು ಎಚ್ಚರಿಕೆಯಿಂದ ಕೈಗೊಳ್ಳಬೇಕು” ಎಂದು ಡಾ. ಯಂಗ್ ಅಭಿಪ್ರಾಯ ಪಟ್ಟಿದ್ದಾರೆ.

Study shows physical activity and exercise programs can boost the mental health during pandemic-like situations

ಇದನ್ನೂ ಓದಿ: ಆರೋಗ್ಯದ ಗುಟ್ಟು ಹಂಚಿಕೊಂಡ ಶಲ್ಪಾ ಶೆಟ್ಟಿ: ಸದಾ ಆರೋಗ್ಯವಾಗಿರಲು ಹೀಗೆ ಮಾಡಬೇಕಂತೆ ನೋಡಿ…

ಇದನ್ನೂ ಓದಿ:Ashwagandha: ಹಾಲಿನೊಂದಿಗೆ ಅಶ್ವಗಂಧ – ಆರೋಗ್ಯಕರ ಲಾಭಗಳು