ಈಗ ದೇಹ ತೂಕ ಇಳಿಸಿಕೊಳ್ಳಲು ಅನೇಕರು ಶ್ರಮಿಸುತ್ತಾರೆ. ಇದಕ್ಕಾಗಿ ವಿವಿಧ ಮಾರ್ಗಗಳನ್ನು ಕಂಡುಕೊಂಡಿದ್ದಾರೆ. ಆಹಾರ ಪಥ್ಯ, ವ್ಯಾಯಾಮ, ಔಷಧ ಸೇವನೆ. ಇದರಲ್ಲೂ ಅಲೋಪಥಿ, ಹೋಮಿಯೋಪಥಿ, ನ್ಯಾಚರೋಪಥಿ, ಆಯುರ್ವೇದ ಇನ್ನಿತರ ಕ್ರಮಗಳನ್ನು ಅನುಸರಿಸುತ್ತಾರೆ. ಆಯುರ್ವೇದೀಯ ಶೈಲಿಯಲ್ಲಿ ದೇಹ ತೂಕ ಇಳಿಸಿಕೊಳ್ಳಲು ಅಷ್ಟ ಸಲಹೆಗಳನ್ನು ಆಯುರ್ವೇದ ವೈದ್ಯರು ಇಲ್ಲಿ ನೀಡಿದ್ದಾರೆ.
ತೂಕ ಇಳಿಸಲು ವ್ಯಾಯಾಮ ಮತ್ತು ಆಹಾರ ಕ್ರಮ ಸುಸ್ಥಿರವಾಗಿದ್ದರೆ ಹೆಚ್ಚು ಪರಿಣಾಮಕಾರಿ. ಹೀಗಾಗಿ ತೂಕ ತಗ್ಗಿಸಲು ಪಯಾರ್ಯ ಉಪಕ್ರಮಗಳನ್ನು ಅಳವಡಿಕೆ ಮಾಡಿಕೊಳ್ಳಬೇಕು ಎಂದು ಆಯುರ್ವೇದ ತಜ್ಞೆ ಡಾ.ದೀಕ್ಷಾ ಭಾವಸರ್ ಹೇಳಿದ್ದಾರೆ.
1. ಸಕ್ಕರೆಗಿಂತ ಪೌಷ್ಟಿಕಾಂಶ ಇರುವ ಬೆಲ್ಲದ ಬಳಕೆ ಉತ್ತಮ.
2. ತಣ್ಣನೆಯ ನೀರು ಕುಡಿಯುವುದಕ್ಕಿಂತ ಬೆಚ್ಚಗಿರುವ ನೀರು ಕುಡಿಯುವುದು ಒಳ್ಳೆಯದು. ಇದರಿಂದ ದೇಹದ ಜಠರಾಗ್ನಿ ಉದ್ದೀಪನಗೊಂಡು ಪಚನ ಕ್ರಿಯೆ ಸಲೀಸಾಗುತ್ತದೆ.
3. ಕುಳಿತಲ್ಲೇ ಕುಳಿತಿರುವುದಕ್ಕಿಂತ ನಿತ್ಯ ಐದರಿಂದ 10 ಸಾವಿರ ಹೆಜ್ಜೆ ನಡೆಯುವುದು ಉತ್ತಮ. ಇದರಿಂದ ದೇಹದ ಜಡತ್ವ ದೂರವಾಗಿ ಸಕ್ರಿಯವಾಗುತ್ತದೆ. ನರನಾಡಿಗಳು ಸಡಿಲವಾಗುವುದರಿಂದ ರಕ್ತ ಚಲನೆ ಸುಗಮ.
4. ಹಣ್ಣಿನ ರಸ (ಜ್ಯೂಸ್) ಸೇವನೆ ಮಾಡುವುದಕ್ಕಿಂತ ಹಣ್ಣನ್ನು ತಿನ್ನುವುದು ಉತ್ತಮ. ಹಣ್ಣನ್ನು ಜ್ಯೂಸ್ ಮಾಡಿದರೆ ಅದರಲ್ಲಿರುವ ನಾರಿನಂಶ ನಶಿಸುತ್ತದೆ. ಹೀಗಾಗಿ ಹಣ್ಣನ್ನು ತೊಳೆದು ಅಥವಾ ಸಿಪ್ಪೆ ತೆಗೆದು ತಿನ್ನುವುದನ್ನು ರೂಢಿಸಿಕೊಳ್ಳಬೇಕು. ಇದರಿಂದ ಪಚನ ಕ್ರಿಯೆ ಬಾಯಿಂದಲೇ ಆರಂಭವಾಗುತ್ತದೆ.
5. ಮಧ್ಯಾಹ್ನದ ಊಟ ಬಿಟ್ಟು ಉಪವಾಸ ಮಾಡುವುದು ಉತ್ತಮ ಮಾದರಿಯಲ್ಲ. ಇದರ ಬದಲು ಅತಿಯಾಗಿ ತಿನ್ನುವುದನ್ನು ಬಿಡಬೇಕು. ನಿರ್ದಿಷ್ಟ ಕಾಲದಲ್ಲಿ ಆಹಾರ ತೆಗೆದುಕೊಳ್ಳದಿದ್ದರೆ ಪಿತ್ತವಿಕೋಪ ಆಗಬಹುದು.
6. ರಾತ್ರಿ ವೇಳೆ ಅತಿಯಾಗಿ ಊಟ ಮಾಡುವುದನ್ನು ಬಿಡಬೇಕು. ಇದರಿಂದ ಚಯಾಪಚಯ ಕ್ರಿಯೆ ಉತ್ತಮ ಆಗುತ್ತದೆ. ಲಘು ಆಹಾರವನ್ನು ರಾತ್ರಿ 8ರೊಳಗೆ ಸೇವಿಸುವುದು ಸೂಕ್ತ.
7. ದೀರ್ಘವಾದ ನಿದ್ರೆಯಿಂದ ಯಕೃತ್ ನಲ್ಲಿರುವ ನಂಜಿನಂಶ ನಾಶವಾಗುತ್ತದೆ ಮತ್ತು ನಿದ್ರೆಯ ಕಾಲಕ್ರಮ ಸರಿ ಇದ್ದರೆ ತೂಕ ಇಳಿಕೆ ಆಗುತ್ತದೆ. ರಾತ್ರಿ 10ಗಂಟೆಗೆ ಮುಂಚೆ ಮಲಗಿ ಬೆಳಗ್ಗೆ ಬೇಗ ಏಳುವುದು ಉತ್ತಮ ರೂಢಿ.
8. ವ್ಯಾಯಾಮದಿಂದ ದೇಹದ ಆಲಸ್ಯ ದೂರವಾಗಿ ಚಟುವಟಿಕೆಯುಕ್ತವಾಗುತ್ತದೆ. ಇದರಿಂದಲೂ ತೂಕ ಇಳಿಕೆ ಇದೆ. ಆದರೆ ವಿಪರೀತ ಆಯಾಸವಾಗುವಷ್ಟು ವ್ಯಾಯಾಮ ಬೇಡ. ವ್ಯಾಯಾಮ ರೂಢಿಯಲ್ಲಿ ಇರಿಸಿಕೊಂಡರೆ ನಿದ್ರಾಹೀನತೆ ದೂರವಾಗುತ್ತದೆ. ಒತ್ತಡದಿಂದ ಮುಕ್ತವಾಗಬಹುದು. ಯೋಗ, ಬಿರುಸಿನ ನಡಿಗೆ, ಜಾಂಗಿಂಗ್, ಸೈಕಲ್ ತುಳಿಯುವುದು, ಈಜುವಿಕೆ ಮುಂತಾದವು ತೂಕ ಕಡಿಮೆ ಮಾಡಲು ಸಹಕಾರಿ.
ಇದನ್ನೂ ಓದಿ: Health: ವ್ಯಾಯಾಮಕ್ಕೂ ಮಾನಸಿಕ ಆರೋಗ್ಯಕ್ಕೂ ಸಂಬಂಧವಿರುವುದನ್ನು ನಿರೂಪಿಸಿದ ಅಧ್ಯಯನ
Discussion about this post