ಪ್ರಸಿದ್ಧ ತಿರುಪತಿ ತಿರುಮಲ ದೇಗುಲದ ಹೆಸರಾಂತ ಉದ್ಯೋಗಿ, ಡಾಲರ್ ಶೇಷಾದ್ರಿ ಎಂದೇ ಖ್ಯಾತರಾಗಿದ್ದ ಪಿ ಶೇಷಾದ್ರಿ ಅವರು ಇಂದು (ನವೆಂಬರ್ 29) ನಿಧನಹೊಂದಿದ್ದಾರೆ. 74 ವರ್ಷ ವಯೋಮಾನದ ಅವರ ನಿಧನಕ್ಕೆ ಆಂದ್ರಪ್ರದೇಶದ ಮುಖ್ಯಮಂತ್ರಿ ಜಗನ್ಮೋಹನ್ ರೆಡ್ಡಿ ಸೇರಿ ಹಲವು ಕಂಬನಿ ಮಿಡಿದಿದ್ದಾರೆ.
ಡಾಲರ್ ಶೇಷಾದ್ರಿ ಹೆಸರಿನ ಹಿಂದಿನ ಕಥೆ; ಚಲನಚಿತ್ರ ನಿರ್ದೇಶಕ ರವೀಂದ್ರ ಕೊರಕಿ ಅವರ ಬರಹ ಇಲ್ಲಿದೆ
ತಿರುಪತಿ ತಿರುಮಲ ದೇವಸ್ಥಾನದ ಕಣ್ಣು-ಕಿವಿ ಮೂಗು ಕೊನೆಗೆ ಆತ್ಮವೇ ಆಗಿದ್ದ. ದೇಶ-ವಿದೇಶದ ವಿವಿಐಪಿಗಳು ದರ್ಶನಕ್ಕೆ ಬಂದಾಗಲೂ ಅದರ ಸಂಪೂರ್ಣ ಹೊಣೆಗಾರಿಕೆ ಶೇಷಾದ್ರಿ ಅವರದೇ. ಎಲ್ಲಾ ಸೇವಾ ಕಾರ್ಯಗಳ ಉಸ್ತುವಾರಿ ಕೂಡ ಇವರದೇ. ದರ್ಶನದ ಸಮಯ ನಿಗದಿ ಮಾಡುವುದರಿಂದ ಹಿಡಿದು ಯಾವ ಯಾವ ಕಾಲದಲ್ಲಿ ಯಾವ ಯಾವ ತರದ ಪೂಜೆಗಳಿಗೆ ಯಾವ ಯಾವ ತರದ ವ್ಯವಸ್ಥೆಗಳು ಆಗಬೇಕು ಅಂತ ನೋಡಿಕೊಳ್ಳುತ್ತಿದ್ದವರು ಶೇಷಾದ್ರಿ.
1978 ರಲ್ಲಿ ಸಾಧಾರಣ ಟಿಟಿಡಿ ಉದ್ಯೋಗಿಯಾಗಿ ಕೆಲಸಕ್ಕೆ ಸೇರಿದ ಶೇಷಾದ್ರಿ 2007 ರಲ್ಲಿ ಹುದ್ದೆಯಿಂದ ಅಧಿಕೃತವಾಗಿ ನಿವೃತ್ತಿಯನ್ನು ಹೊಂದಿದ್ದರು. ಮೊದಲೇ ಹೇಳಿದಂತೆ ಅವರು ಆ ಹೊತ್ತಿಗೆ ತಿರುಪತಿ ತಿರುಮಲ ದೇವಸ್ಥಾನದ ಆತ್ಮವೇ ಆಗಿಬಿಟ್ಟಿದ್ದರು ಹೀಗಾಗಿ ಅವರ ಸೇವೆಯನ್ನು ಮುಂದುವರಿಸಲು ನಿರ್ಧರಿಸಿದ ಟಿಟಿಡಿ ಅವರನ್ನು OSD (ಆಫೀಸರ್ ಇನ್ ಸ್ಪೆಷಲ್ ಡ್ಯೂಟಿ) ಹುದ್ದೆಯನ್ನು ಸೃಷ್ಠಿಸಿ ಅವರನ್ನು TTD ಯಲ್ಲಿ ಮುಂದುವರಿಸಿತು. ಸರ್ಕಾರಗಳು ಬದಲಾದರೂ, ಮುಖ್ಯಮಂತ್ರಿಗಳು ಬದಲಾದರೂ ಅವರ ಸ್ಥಾನ ಟಿಟಿಡಿಯಲ್ಲಿ ಅಬಾಧಿತ. ಮಕ್ಕಳಿಲ್ಲದ ಶೇಷಾದ್ರಿ ದಂಪತಿಗಳು ಟಿಟಿಡಿಯ ಒಂದು ಸಾಧಾರಣ ಕ್ವಾರ್ಟರ್ಸ್ ನಲ್ಲಿ ವಾಸಿಸುತ್ತಿದ್ದರು.
ಬಹುಶಃ ಮಕ್ಕಳಿಲ್ಲ ಎಂಬ ಕೊರಗು ಇಲ್ಲದಷ್ಟು ಮಟ್ಟಕ್ಕೆ ಶೇಷಾದ್ರಿಯವರು ತಮ್ಮನ್ನು ತಾವು ಶ್ರೀವಾರಿ ಸೇವೆಯಲ್ಲಿ ತೊಡಗಿಸಿಕೊಂಡು ಬಿಟ್ಟಿದ್ದರು. ಅವರಿಗೆ ಇದ್ದ ಸಂಪರ್ಕದಲ್ಲಿ ಬೇಕಾದರೆ ಬೆಟ್ಟದಷ್ಟು ಹಣವೇ ಮಾಡಬಹುದಾಗಿತ್ತು. ಆದರೆ ಡಾಲರ್ ಶೇಷಾದ್ರಿ ಅಂತಹ ಅವಕಾಶಗಳಿಗಾಗಿ ಕೈ ಒಡ್ಡಲಿಲ್ಲ. 2016ರಲ್ಲಿ ದೇವರ ಹೃದಯಾಘಾತಕ್ಕೆ ಒಳಗಾದ ಅವರನ್ನು ತೀವ್ರ ನಿಗಾ ಘಟಕದಲ್ಲಿಟ್ಟು ಪ್ರಾಣಪಕ್ಷಿ ಹಾರದಂತೆ ಅಪೋಲೋ ಆಸ್ಪತ್ರೆ ಸಿಬ್ಬಂದಿ ನೋಡಿಕೊಂಡಿದ್ದರು.
ಇಂದು ಮುಂಜಾನೆ ವೈಜಾಗ್ ನಲ್ಲಿ ಟಿಟಿಡಿ ವತಿಯಿಂದ ಕಾರ್ತಿಕ ಸೋಮವಾರದ ಆಚರಣೆಗಾಗಿ ಬಂದಿದ್ದ ಶೇಷಾದ್ರಿ ಅವರು 4:00 ಹೊತ್ತಿನ ಸಮಯದಲ್ಲಿ ಹೃದಯಾಘಾತದಿಂದ ದೈಹಿಕವಾಗಿ ಸಮಾಜದಿಂದ,ಶ್ರೀವಾರಿ ಸೇವೆಯಿಂದ ದೂರವಾಗಿದ್ದಾರೆ.
ಇಷ್ಟಕ್ಕೂ ಅವರನ್ನು ಯಾಕೆ ಡಾಲರ್ ಶೇಷಾದ್ರಿ ಅಂತ ಕರೆಯುತ್ತಿದ್ದರು ಗೊತ್ತೆ?
ಶೇಷಾದ್ರಿ ಅವರು ಶ್ರೀವಾರಿ ವಾಹನವಾದ ಗರುಡ ವಾಹನದ ಡಾಲರ್ ಸದಾ ತಮ್ಮ ಕೊರಳಿನಲ್ಲಿ ಧರಿಸಿರುತ್ತಿದ್ದರು. ಹೀಗಾಗಿಯೇ ಅವರು ಡಾಲರ್ ಶೇಷಾದ್ರಿ ಅಂತಲೇ ಎಲ್ಲರಿಂದಲೂ ಕರೆಯಲ್ಪಟ್ಟರು.
ಇದನ್ನೂ ಓದಿ: ಸಂತಕವಿ ದಾರ್ಶನಿಕ ಭಕ್ತ ಕನಕದಾಸರು: ಕನ್ನಡ ಸಾಹಿತ್ಯ ಸಿರಿಪದಕದ ಅಮೂಲ್ಯ ಹೆಸರು!
Discussion about this post