ನಿಮ್ಮ ಆದಾಯ, ವೆಚ್ಚ ನಿರ್ವಹಿಸಲು ಸಹಾಯ ಮಾಡುವ ಆಪ್‌ ಫಿಸ್ಕಸ್

ಹಣ ಸಂಪಾದಿಸಲು ಹೆಚ್ಚಿನ ಜನರಿಗೆ ಒಂದೇ ಮಾರ್ಗವಾದರೆ ಖರ್ಚಿನ ಮಾರ್ಗಗಳು ಮಾತ್ರ ನೂರಾರು. ಹಣಕಾಸಿನ ನಿರ್ವಹಣೆಯನ್ನು ಯಾರು ಯೋಜಿತ ರೀತಿಯಿಂದ ಮಾಡುತ್ತಾರೋ ಅಂಥವರಿಗೆ ಹಣಕಾಸಿನ ವಿಚಾರದಲ್ಲಿ ಹೆಚ್ಚಿನ ಗೊಂದಲಗಳಿಲ್ಲದೆ ಮಾನಸಿಕ ನೆಮ್ಮದಿಯಿರುತ್ತದೆ.

ಕೆಲವೊಮ್ಮೆ ನಾವೇ ಖರ್ಚು ಮಾಡಿರುವ ಹಣ ಯಾವುದಕ್ಕೆ ಖರ್ಚು ಮಾಡಿದ್ದೇವೆಂಬುದು ಮರೆತುಹೋಗಿ ಎಷ್ಟು ತಲೆಕೆಡಿಸಿಕೊಂಡರೂ ಜ್ಞಾಪಕ ಬರದೆ ಪರಿತಪಿಸಿದ ಉದಾಹರಣೆಗಳೂ ಇವೆ. ಇತ್ತೀಚಿನ ವರ್ಷಗಳಲ್ಲಿ ಮೊಬೈಲ್ ಆಪ್‌ಗಳು ಬಂದಿದ್ದು ಅವುಗಳ ಮುಖಾಂತರ ಜನರು ಹಣ ಪಡೆಯಲು ಹಾಗೂ ಪಾವತಿ ಮಾಡಲು ಸಹಾಯಕವಾಗಿದ್ದು ಸ್ವಲ್ಪ ಮಟ್ಟಿನ ಖರ್ಚು-ವೆಚ್ಚದ ಮಾಹಿತಿ ಸಾಧ್ಯವಾದರೂ ಸಂಪೂರ್ಣವಾದ ಮಾಹಿತಿ ಸಿಗಲು ಸಾಧ್ಯವಿಲ್ಲ.

ನಾವು ಖರ್ಚು ಮಾಡುವ ಹಣದ ಮೇಲೆ ಸರಿಯಾದ ಗಮನವಿಡದೇ ಮನಬಂದಂತೆ ಖರ್ಚುಮಾಡತೊಡಗಿದರೆ ಆರ್ಥಿಕ ಶಿಸ್ತಿನ ಕೊರತೆಯಿಂದಾಗಿ ನಮ್ಮ ಹಣಕಾಸು ಪರಿಸ್ಥಿತಿಯ ಮೇಲೆ ನಿಯಂತ್ರಣ ಸಾಧಿಸುವುದು ಅಸಾಧ್ಯ ಮಾತ್ರವಲ್ಲದೇ ಗೊತ್ತು-ಗುರಿಯಿಲ್ಲದೇ ಖರ್ಚು ಮಾಡುವ ಅಭ್ಯಾಸವೂ ಉಂಟಾಗಿ ಹಣ ಉಳಿಸಲು ಸಾಧ್ಯವಾಗುವುದಿಲ್ಲ. ಸ್ವಲ್ಪವೇ ಪ್ರಮಾಣದಲ್ಲಾದರೂ ಹಣ ಉಳಿಸಲು ಪ್ರಾರಂಭಿಸಿದರೆ ಅದನ್ನು ಬೇರೆಡೆ ಹೂಡಿಕೆ ಮಾಡಿ ಲಾಭಗಳಿಸುವು ಸಾಧ್ಯತೆ ಹೆಚ್ಚಾಗುತ್ತದೆ. ನಮ್ಮ ಹಿರಿಯರೂ ಕೂಡ ಇಂತಹ ಅಭ್ಯಾಸವನ್ನು ಇಟ್ಟುಕೊಂಡಿದ್ದುದನ್ನು ನಾವು ನೋಡಿಯೇ ಇರುತ್ತೇವೆ.

ಇತ್ತೀಚೆಗೆ ಅಭಿವೃದ್ಧಿ ಹೊಂದಿದ ಆಪ್‌ಗಳು ಬಂದಿದ್ದು ಅವು ನಮ್ಮ ಖರ್ಚಿನ ಹಾಗೂ ಪಾವತಿಗಳ ನಿಖರವಾದ ಲೆಕ್ಕವಿಡಲು ಸಮರ್ಥವಾಗಿದ್ದು ಯಾವ-ಯಾವ ಕಾರಣಗಳಿಗಾಗಿ ಹಣ ಪಾವತಿ ಮಾಡಿದ್ದೇವೆಂಬ ಖಚಿತ ಮಾಹಿತಿ ನೀಡಬಲ್ಲವು. ಇವು ನಾವು ಮಾಡಿರುವ ಪಾವತಿಗಳ ಆಧಾರದ ಮೇಲೆ ಅವುಗಳನ್ನು ಬೇರೆ-ಬೇರೆ ವಿಭಾಗಗಳಲ್ಲಿ ವರ್ಗೀಕರಿಸಿಕೊಳ್ಳುತ್ತವೆ (ಉದಾಹರಣೆಗೆ: ದಿನಸಿ, ವಿದ್ಯುತ್, ದೂರವಾಣಿ, ದೂರದರ್ಶನ, ಪ್ರಯಾಣ, ಹಾಗೂ ಮನರಂಜನೆ ಇತ್ಯಾದಿ). ಇದರಿಂದ ಪ್ರತಿ ತಿಂಗಳೂ ಯಾವ-ಯಾವ ವರ್ಗೀಕರಣಕ್ಕೆ ಎಷ್ಟು ಖರ್ಚು ಮಾಡುತ್ತೇವೆಂಬ ವಿವರ ನಮಗೆ ಸುಲಭವಾಗಿ ಸಿಗುತ್ತದಲ್ಲದೇ ಅನವಶ್ಯಕ ಖರ್ಚನ್ನು ಉಳಿಸಲೂ ಸಾಧ್ಯವಾಗುತ್ತದೆ.

ಉದಾಹರಣೆಗೆ, “ಫಿಸ್ಕಸ್” ಹೆಸರಿನ ಹಣಕಾಸು ನಿರ್ವಹಣೆಗೆ ಮೀಸಲಾದ ಆಪ್ ಸಂಪೂರ್ಣ ಸ್ವಯಂಚಾಲಿತ ಇಂಟರ್‌ಫೇಸ್ ಹೊಂದಿದ್ದು ನಿಮ್ಮ ಬ್ಯಾಂಕ್ ವ್ಯವಹಾರದ ವಿವರಗಳು, ಖರ್ಚು-ವೆಚ್ಚದ ವಿವರಗಳು, ನಿಮ್ಮ ಡೆಬಿಟ್/ಕ್ರೆಡಿಟ್ ಕಾರ್ಡ್ ವ್ಯವಹಾರಗಳ ವಿವರಗಳು ಮಾತ್ರವಲ್ಲದೇ ನೀವು ಅದರ ಮೂಲಕ ಮಾಡಿದ ಎಲ್ಲ ಹಣಕಾಸಿನ ವ್ಯವಹಾರಗಳ ವಿವರಗಳನ್ನು ಕ್ಷಣಮಾತ್ರದಲ್ಲಿ ನೀಡವಂತೆ ವಿನ್ಯಾಸಗೊಂಡಿದ್ದು ಇಂತಹವುಗಳ ಪ್ರಯೋಜನ ಪಡೆದು ಹಣಕಾಸಿನ ವಿಚಾರದಲ್ಲಿ ನಿರಾಳವಾಗಿರಬಹುದಾಗಿದೆ. ಇಂತಹ ಆಪ್‌ಗಳಲ್ಲಿ ಬಳಕೆದಾರರ ಎಲ್ಲಾ ಮಾಹಿತಿಗಳಿಗೂ ಸೂಕ್ತ ಭದ್ರತಾ ವ್ಯವಸ್ಥೆ ಕಲ್ಪಿಸಲಾಗಿದ್ದು ಉತ್ತಮ ತಂತ್ರಜ್ಞಾನದ ಆಧಾರವೂ ಇರುತ್ತದೆ. ಇಂತಹ ಆಪ್‌ಗಳನ್ನು ಉಪಯೋಗಿಸಿಕೊಂಡು ಸಾರ್ವಜನಿಕರು ತಮ್ಮ ಹಣಕಾಸಿನ ನಿರ್ವಹಣೆಯನ್ನು ಉತ್ತಮ ರೀತಿಯಲ್ಲಿ ಮಾಡಿಕೊಂಡು ನೆಮ್ಮದಿಯಾಗಿರಲು ಸಹಾಯವಾಗಲೆಂದು ಈ ಲೇಖನ.

Use of budgetary apps for money management can relieve a lot of pressure and can lead to peace of mind

ಇದನ್ನೂ ಓದಿ: ಐಎಂಎಫ್‌ ತೊರೆಯಲಿದ್ದಾರೆ ಭಾರತ ಮೂಲದ ಗೀತಾ ಗೋಪಿನಾಥ್

ಇದನ್ನೂ ಓದಿ:ಜಾಗತಿಕ ಅತಿ ಶ್ರೀಮಂತರ ಪಟ್ಟಿಗೆ ಮುಕೇಶ್​ ಅಂಬಾನಿ ಸೇರ್ಪಡೆ