ಕಾನ್ಪುರ: ಮೇಕೆಗೆ ಸರ್ಕಾರಿ ಕಚೇರಿಯಲ್ಲಿ ಏನು ಕೆಲಸ ಇರುತ್ತದೆ ಹೇಳಿ, ಉತ್ತರ ಪ್ರದೇಶದ ಚೌಬೀಪುರದ ಪಂಚಾಯಿತಿ ಅಭಿವೃದ್ಧಿ ಕೇಂದ್ರಕ್ಕೆ ಮೇಕೆಯೊಂದು ಬಂದಿತ್ತು. ಯಾವುದೋ ದೂರು ತೆಗೆದುಕೊಂಡಲ್ಲ, ಆಸ್ತಿ ಸಂಬಂಧಿಸಿದ ವಿಚಾರಕ್ಕಲ್ಲ. ಹೊಟ್ಟೆ ತುಂಬಿಸಿಕೊಳ್ಳಲು. ಹೌದು, ಇದು ನಿಜ, ಮೇಕೆ ಬಂದಂಗೆ ಬಂದು ಕಡತಗಳಿಗೆ ಬಾಯಿ ಹಾಕಿ, ಅಲ್ಲಿದ್ದ ಒಂದಷ್ಟು ಪೇಪರ್ ಗಳನ್ನು ಅನಾಮತ್ತಾಗಿ ಕಚ್ಚಿಕೊಂಡು ಹೊರಟೇ ಬಿಟ್ಟಿತು. ಪಾಪ, ಮೇಕೆಯ ಹಸಿವು ಎಷ್ಟಿರಬೇಡ. ಇದನ್ನು ಗಮನಿಸಿದ ಸಿಬ್ಬಂದಿ ನೋಡ್ರೋ, ತಿಂದಾಕ್ತು ತಿಂದಾಕ್ತು ಎಲ್ಲ ಪೇಪರ್ ತಿಂದಾಕ್ತು ಅಂತ ಕಿರಿಚಿಕೊಂಡು ಒಂದೇ ಉಸಿರಿಗೆ ಮೇಕೆಯ ಹಿಂದೆ ಓಡಿದ್ದಾನೆ.
ಅತ್ತ ಮೇಕೆ, ಯಾವುದೋ ಫೈಲಿನ ಹಾಳೆಯನ್ನು ತಿಂದು, ತೇಗಿ, ಮೂತಿ ತಿರುಗಿಸುತ್ತಿದೆ. ಫೈಲನ್ನು ಉಳಿಸಲು ಮೇಕೆಯ ಹಿಂದೆ ಓಡಿದ ಸರ್ಕಾರಿ ಉದ್ಯೋಗಿಯ ಪಡಿಪಾಟಲು ಹೇಳತೀರದು. ಸಾಮಾಜಿಕ ಜಾಲತಾಣದಲ್ಲಿ 20 ಸೆಕೆಂಡಿನ ಮೇಕೆಯ ಈ ವೀಡಿಯೋ ಭಾರಿ ಸದ್ದು ಮಾಡುತ್ತಿದೆ. ಮೇಕೆಯ ಹಸಿವಿನ ಮುಂದೆ ಸರ್ಕಾರಿ ಉದ್ಯೋಗಿಯ ಅಸಹಾಯಕತೆ ನಗಪಾಟಲಿಗೆ ಈಡಾಗಿದೆ.
In Kanpur block office, the employees kept sunbathing outside, the goat ran away with the file. This is Uttar Pradesh!#योगी_शाह_वापिस_जाओ pic.twitter.com/eeRuYHP227
— Mahmood (@hai_mahmoodul) December 2, 2021
ಈ ಘಟನೆಗೆ ಸಂಬಂಧಿಸಿದಂತೆ ಹೇಳಿಕೆ ನೀಡಿರುವ ಬ್ಲಾಕ್ ಡೆವಲಪ್ ಮೆಂಟ್ ಆಫೀಸರ್ ಯಾದವ್, ಮೇಕೆ ಕ್ಯಾಂಟೀನ ಬಳಿ ಇರುವ ಕಚೇರಿಗೆ ನುಗ್ಗಿ, ಚಿಂದಿ ಪೇಪರ್ ಗಳನ್ನು ಕಚ್ಚಿಕೊಂಡು ಓಡಿ ಹೋಗಿದ್ದು ನಿಜವಾದರೂ, ಅದು ಯಾವುದೇ ಸರ್ಕಾರಿ ದಾಖಲೆಗಳನ್ನಲ್ಲ ಎಂದು ಸಮರ್ಥಿಸಿಕೊಂಡಿದ್ದಾರೆ. ಈ ಘಟನೆಗೆ ಸಂಬಂಧಿಸಿದಂತೆ ಸಂಬಂಧಪಟ್ಟ ಉದ್ಯೋಗಿಯಿಂದ ಮಾಹಿತಿ ಪಡೆಯಲಿದ್ದೇವೆ. ಇದು ಉಡಾಫೆಯ ಪ್ರತಿಫಲವಾಗಿದ್ದು, ಸಿಬ್ಬಂದಿ ಕಚೇರಿಯ ಕೋಣೆಯಲ್ಲೇ ಪಟ್ಟಾಗಿ ಕುಳಿತು ಕೆಲಸ ಮಾಡುವಂತೆ ನಿರ್ದೇಶನ ನೀಡಿದ್ದೇನೆ ಎಂದು ಹೇಳಿದ್ದಾರೆ.
ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿರುವ ಈ ವೀಡಿಯೋ ನೋಡಿದ ವೀಕ್ಷಕರು, ಮೇಕೆಯು ಪೇಪರ್ ನಲ್ಲಿದ್ದ ನಂಬರ್ ಗಳನ್ನು ಅಗಿಯುತ್ತಾ, ಸತ್ಯಾಸತ್ಯತೆಗಳನ್ನು ಅರಗಿಸಿಕೊಳ್ಳುತ್ತಿದೆ ಎಂದು ಕಾಮೆಂಟ್ ಮಾಡಿದ್ದಾರೆ. ಮತ್ತೊಬ್ಬರು, ಇಂಥ ಪೋಸ್ಟ್ ಗಳನ್ನು ಹಾಕುವುದರಿಂದ ಸರ್ಕಾರದ, ಉದ್ಯೋಗಿಗಳ ಘನತೆ ಕಡಿಮೆಯಾಗುತ್ತದೆ. ಈ ಉಡಾಫೆಯ ಫಲವನ್ನು ಸಾರ್ವಜನಿಕರು ಉಣ್ಣಬೇಕಾಗುತ್ತದೆ ಎಂದಿದ್ದಾರೆ.
ಇದನ್ನೂ ಓದಿ: ವಧುವಿನ ಬ್ರಾ ಸೈಜ್ ಕೇಳಿದ ಭೂಪ; ವೈರಲ್ ಆದ ಜಾಹೀರಾತಲ್ಲಿ ಏನೆಲ್ಲಾ ಇತ್ತು?
Discussion about this post